بيىلعى جىلدىڭ ورازاسى قاي كۇنى باستالاتىنى انىقتالدى دەپ حابارلايدى Qamshy.kz اقپارات اگەنتتىگى قمدب شاريعات جانە ءپاتۋا بولىمىنە سىلتەمە جاساپ.
رامازان ايىنىڭ باستالۋىن ناقتى انىقتاۋ شاريعي ۇكىمدەر مەن استرونوميالىق ەسەپتەر نەگىزىندە جۇزەگە اسادى. العاشقى كەزەڭدە مۇسىلماندار جاڭا تۋعان ايدى كوزبەن كورەتىن.
پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «ورازانى ايدىڭ تۋۋىنا قاراپ باستاپ، ايدىڭ تۋۋىنا قاراپ اياقتاڭدار. ەگەر اي كورىنبەسە، شاعبان ايىن وتىز كۇنگە تولتىرىپ، باستاي بەرىڭدەر»، – دەگەن.
قازاقستان مۇسىلماندارى ءدىني باسقارماسى ەلىمىزدەگى ىرگەلى زەرتتەۋ ورتالىقتارىنىڭ ءبىرى بولىپ تابىلاتىن ۆ.گ.فەسەنكوۆ اتىنداعى «ۇلتتىق عارىشتىق زەرتتەۋلەر مەن تەحنولوگيالار ورتالىعى» مەكەمەسىنەن جاڭا ايدىڭ كورىنۋىنە قاتىستى رەسمي مالىمەت سۇراتتى.
قمدب شاريعي ۇكىمدى نەگىزگە الىپ، عىلىمي زەرتتەۋ جۇمىسىنىڭ ناتيجەسىن ەسكەرىپ، سونىمەن قاتار، ورتالىق ازيا ەلدەرى ءمۇفتياتىنىڭ شاريعات جانە ءپاتۋا ءبولىمىنىڭ عالىمدارىمەن ورتاق ءپاتۋا قابىلداي وتىرىپ، 6 مامىر – رامازان ايىنىڭ ءبىرىنشى كۇنى دەگەن شەشىم شىعاردى.
بيىل 30 كۇن اۋىز بەكىتەمىز. قاسيەتتى ءقادىر ءتۇنى - 31 مامىردان 1 ماۋسىمعا قاراعان ءتۇن. ال 5 ماۋسىم - ورازا ايتتىڭ ءبىرىنشى كۇنى.
ورازاعا قاتىستى ۇكىمدەر
شاريعات بويىنشا باليعاتقا تولعان، اقىل-ەسى دۇرىس ءاربىر مۇسىلمانعا رامازان ايىندا كۇندە تاڭ اتقاننان باستاپ كۇن باتقانعا دەيىن ورازانى نيەت ەتىپ، ىشىپ-جەۋدەن، توسەك قاتىناسىنان تىيىلۋ پارىز.
حايىز جانە نيفاس كەزىندە ايەلدەر ورازا ۇستامايدى. جۇكتى نەمەسە بالا ەمىزەتىن ايەلدەر ورازا تۇتقان كەزدە وزىنە نەمەسە بالاسىنا زيان كەلۋدەن قورىقسا، سىرقات كىسى اۋرۋىنىڭ اسقىنۋىنان قاۋىپتەنسە، ولاردىڭ ورازا ۇستاماۋلارىنا بولادى. بۇلار ورازانىڭ قازاسىن رامازان ايىنان كەيىن وتەپ بەرەدى.
رامازان ايىندا جولاۋشىعا دا ورازا ۇستاۋ مىندەت ەمەس. ساپاردان قايتا ورالعاندا، قازاسىن وتەيدى.
كارىلىك نەمەسە جازىلمايتىن اۋرۋ سەبەبىنەن ورازا ۇستاۋعا شاماسى كەلمەيتىن ادامدار ورازانىڭ ءار كۇنى ءۇشىن ءپىديا بەرەدى.
ءپىتىر ساداقانىڭ مولشەرى – 300 تەڭگە. بۇل - ءپىتىر ساداقانىڭ ەڭ تومەنگى مولشەرى. بۇل مولشەردەن ارتىق بەرۋگە دە بولادى.
ۇسىنعان: ماقپال سەمباي