2019 جىلى 15 قاڭتاردا شۆەيساريانىڭ فەدەرالدى قىلمىستىق سوتى قازاقستاننىڭ باس پروكۋراتۋراسىنىڭ ءوتىنىشحاتىن قاناعاتتاندىرىپ، «قورعاس ءىسى» بويىنشا ۇيىمداسقان قىلمىستىق توپتىڭ مۇشەلەرى زاڭسىز جولمەن العان جانە كەيىننەن ەلدەن تىس اكەتكەن 140 ملن. تەڭگەنى قايتارۋ تۋرالى شەشىم قابىلدادى دەپ حابارلايدى Qamshy.kz اقپارات اگەنتتىگى قازاقستان رەسپۋبليكاسىنىڭ باس پروكۋراتۋراسىنىڭ باسپا ءسوز قىزمەتىنە سىلتەمە جاساپ.

اتالعان قارجى توپتىڭ بەلسەندى مۇشەلەرىنىڭ ءبىرى، 2012 جىلدان باستاپ وسى ىسكە قاتىسى بار دەگەن كۇدىكپەن حالىقارالىق ىزدەستىرۋدە بولعان ماعزۇم ابدىرالييەۆكە تيەسىلى.

وسى جىلدىڭ 25 ساۋىرىندە شۆەيساريادان قازاقستان رەسپۋبليكاسى ۇلتتىق بانكىنىڭ شوتىنا تۇسكەن اقشا جاقىن ارادا مەملەكەت كىرىسىنە الىنادى. بۇعان دەيىن 2018 جىلعى ساۋىردە پروكۋراتۋرا ورگاندارىنىڭ وسى ءىس شەڭبەرىندەگى ءوتىنىش حاتى بويىنشا مەملەكەت پايداسىنا م. ابدىرالييەۆتىڭ 762 مىڭ اقش دوللارى مەن 915 مىڭ تەڭگە قىلمىستىق تابىسى تاركىلەنگەنىن اتاپ وتكەن ءجون.

وسىلايشا، ۇرلانعان اكتيۆتەردى قايتارۋ بويىنشا جاسالعان جۇمىستىڭ ناتيجەسىندە مەملەكەتتىك بيۋدجەتكە تۇسكەن قاراجاتتىڭ جالپى سوماسى 420 ملن. تەڭگە.

قازاقستاننىڭ باس پروكۋراتۋراسى شەتەلدىك ارىپتەستەرىمەن بىرلەسىپ، قىلمىستىق تابىستاردى شەتەلدەن قايتارۋعا باعىتتالعان جۇمىستاردى جالعاستىراتىن بولادى.