بۇل جاعداي قازاقستاندا بولىپ جاتىر دەپ ويلاپ قالماڭىز. تۇرىكمەنستاندا ورىن الىپ وتىر. ءبىر عانا ادامعا باعىنعان اۆتوريتارلىق بەيتاراپ مەملەكەت تۇرىكمەنستاننىڭ باسشىسى گۋربانگۋلى بەردىمۇحامەدوۆ ەلدىڭ مادەنيەت جانە ب ا ق  جونىندەگى ۆيسە-پرەمەرى باحارگۇل ابدىيەۆاعا ەسكەرتۋ جاسادى. نەگە؟ پرەزيدەنتتىڭ ايتۋىنشا، «باحارگۇل حانىم ءوز سالاسىنا قاتىستى ب ا ق پەن ەلدەگى تەلەارنا سالاسىنىڭ جۇمىسىن ناشارلاتىپ جىبەرگەن».

وسىعان بايلانىستى پرەزيدەنت گۋربانگۋلى بەردىمۇحامەدوۆ  جۇمىسىندا ولقىلىقتار جىبەرىپ العانى ءۇشىن تۇرىكمەن مەملەكەتتىك باسپا قىزمەتىنىڭ ءتوراعاسى اقمۇرات حۇدايبەردييەۆكە قاتاڭ سوگىس جاريالادى. بۇل ەڭ سوڭعى ەسكەرتۋ، مۇنان دەيىن تاعى كەمشىلىكتەر ورىن السا، ول قىزمەتىنەن ءبىرجولا قوشتاسادى. سونداي-اق بەردىمۇحامەدوۆ «Nesil» گازەتىنىڭ باس رەداكتورى ماحريبان گايدىموۆانى دا جۇمىسىنان بوساتتى. ول مۇنىمەن توقتاعان جوق. وسىدان بىرنەشە كۇن بۇرىن تۇرىكمەن باسشىسى مەملەكەتتىك تەلەارنا، راديو حابارلارىن تاراتۋ جانە كينەماتوگرافيا كوميتەتىنىڭ ءتوراعاسى نۇرمامبەت گاردىيەۆكە دە قاتاڭ سوگىس بەردى.  «Miras» تەلەارناسىنىڭ باسشىسى بياشيم اتايەۆ تا پرەزيدەنت بۇيرىعىنان كەيىن  قىزمەتىنەن كەتكەن.  

جالپى تۇرىكمەنستان باسشىسى گۋربانگۋلى بەردىمۇحامەدوۆكە  وتاندىق ب ا ق پەن تەلەارنانىڭ جۇمىسى ۇناي بەرمەيدى. وتكەن جىلى دا ول ەلدەگى ءبىرقاتار باق-تىڭ باسشىلارىن ورنىنان بوساتقان.

پرەزيدەنت گۋربانگۋلى بەردىمۇحامەدوۆتىڭ ويىنشا، «مەملەكەتتىك تەلەارنالار مەن بۇقارالىق اقپارات قۇرالدارى تۇرىكمەنستاننىڭ تاڭعاجايىپ دامۋى مەن ءوسىپ -وركەندەپ، كوركەيگەنىن جالپاق جۇرتقا كورسەتە الماي وتىر».