ۇلتتىق بانكتىڭ ەسەبىنە سايكەس، قازاقستاندا 5 ميلليون ادامنىڭ كرەديتى بار دەپ حابارلايدى Qamshy.kz اقپارات اگەنتتىگى sputniknews.kz سايتىنا سىلتەمە جاساپ. ازاماتتاردىڭ تۇتىنۋشىلىق كرەديتتەر بويىنشا جالپى قارىزى 4 تريلليون تەڭگەدەن اسىپ كەتكەن.

ق ر ۇلتتىق بانك ءتوراعاسىنىڭ ورىنباسارى ولەگ سمولياكوۆتىڭ ايتۋىنشا، بۇگىندە ونلاين كرەديت بەرەتىن ۇيىمدار كوپ. اتالعان قۇرىلىمدار كوپ جاعدايدا حالىققا جالاقىعا دەيىن اقشانى قارىزعا الۋدى ۇسىنادى. ونداي شاعىن نەسيەلەردىڭ مولشەرلەمەسى دە تىم جوعارى. سونىڭ سالدارىنان ادامدار قارىزعا بەلشەسىنەن باتىپ، اقشانى قايتارا الماي جاتادى. ونلاين كرەديتورلار بولسا، ءبىرقاتار شەكتەۋگە قاراماستان ءوز قىزمەتتەرىن جالعاستىرا بەرەدى. وسىعان بايلانىستى ارنايى زاڭ جوباسى اياسىندا جاڭا جۇيەنى ەنگىزۋ جوسپارلانىپ وتىر.

"بىرىنشىدەن، قارىزدى قايتارۋ مەرزىمى ءوتىپ كەتكەن ازاماتتارعا كرەديت بەرىلمەيدى. ماسەلەن، كرەديت العان ادامنىڭ اقشانى قايتارۋ مەرزىمى 60 كۇننەن اسىپ كەتسە، وعان قوسىمشا كرەديت راسىمدەلمەيدى. ويتكەنى كەيبىر ادامدار ءبىرىنشى كرەديتتى جابۋ ءۇشىن تاعى كرەديت الىپ جاتادى. ەكىنشىدەن، كرەديت سوماسىنىڭ شەكتى مولشەرى بولادى. قارىزدىڭ سوماسىن ارتتىرۋعا مۇمكىندىك بەرىلمەيدى. ايتپەسە، ارتىنان ونداي كرەديتتى وتەۋ قيىنعا تۇسەدى"، - دەدى و.سمولياكوۆ قارجى نارىعى مەن ميكروقارجىلاندىرۋ قىزمەتىن رەتتەۋ بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى زاڭ جوباسىن تانىستىرۋ راسىمىندە.

ونىڭ ايتۋىنشا، جالاقىعا دەيىن بەرىلەتىن نەسيەلەردىڭ مولشەرلەمەسى دە تىم كوپ.

"وسىعان بايلانىستى قايتارىلاتىن اقشانىڭ شەكتى مولشەرى بولادى. ماسەلەن، ءبىر كرەديتتى قايتارۋ سوماسى بارلىق ايىپپۇل مەن مولشەرلەمەنى قوسا ساناعاندا سول كرەديتتىڭ ەكى ەسەلىك مولشەرىنەن اسپاۋى ءتيىس"، - دەپ اتاپ ءوتتى ۇلتتىق بانك ءتوراعاسىنىڭ ورىنباسارى.

ۇسىنعان: داۋرەن سىبانباي