الماتىدا 6 جاسار قىزدىڭ ولىمىنە قاتىستى قىلمىستىق ءىس تەرگەلىپ جاتىر دەپ حابارلايدى Qamshy.kz اقپارات اگەنتتىگى tengrinews.kz سايتىنا سىلتەمە جاساپ.

ەليزاۆەتا پىلايەۆا ەسىمدى ءبۇلدىرشىن 12-مامىردا كوز جۇمعان. قىزدىڭ اتا-اناسى 5 جىل بۇرىن اجىراسقان ەكەن. قىزدىڭ اكەسى الەكساندر پىلايەۆتىڭ ايتۋىنشا، قىزى 9-مامىردان باستاپ اناسىنىڭ قاراۋىندا بولعان. ال 12-مامىر كۇنى قىزىنىڭ اۋرۋحانادا جاتقانى تۋرالى حابار العان.

"قىزىمدى 12-قالالىق اۋرۋحانانىڭ جان ساقتاۋ بولىمىنە اپارىپتى. ونىڭ ولىمىنە ومىرقاسىنىڭ سىنۋى سەبەپ بولعان. دارىگەرلەر قىزىمنىڭ اۋرۋحاناعا كەلمەي تۇرىپ-اق جان تاپسىرعانىن ايتتى. وندا نە ءۇشىن جان ساقتاۋ بولىمىنە جاتقىزىپ، ءدارى ەككەندەرىن سۇراعانىمدا، مەيىربيكە "سۇراعان سوڭ، جاسادىق" دەپ جاۋاپ بەردى. ليزانى اۋرۋحاناعا بيولوگيالىق ءولىم قالپىندا الىپ كەلگەنىن دارىگەرلەر دە مويىنداپ وتىر. ليزانى اۋرۋحاناعا قۇددى ءبىر جۋىندىرىپ اكەلگەن سياقتى، دەنەسىندە دە، كيىمىندە دە قان ىزدەرى جوق. ءبىراق دەنەسىندە جاراقات بار. ماعان ونى كولىك قاعىپ كەتتى دەدى. ءبىراق، مەن سەنبەيمىن. مەنىڭ ويىمشا، بىرەۋ جازاتايىم جاعداي ەتىپ كورسەتىپ، شىن مانىندە ليزانىڭ قالاي ولگەنىن جاسىرىپ قالماقشى"،-دەدى قازا بولعان قىزدىڭ اكەسى. ونىڭ ايتۋىنشا، اۋرۋحانادا قىزدىڭ جانىندا بۇرىنعى جارى مەن ەنەسى بولعان.

الماتى قالالىق پوليسيا دەپارتامەنتىندە بۇل جاعدايعا بايلانىستى ق ر قك 99-بابى بويىنشا قىلمىستىق ءىس قوزعالدى. قىزدىڭ ولىمىنە قاتىستى ناقتى اقپارات سوت-مەديسينالىق تەكسەرىستەر اياقتالعان سوڭ عانا بەرىلەدى.  

اۋدارعان: داۋرەن سىبانباي