بۇگىن ءماجىلىستىڭ جالپى وتىرىسىندا دەپۋتات كارىباي مۇسىرمان اقپارات جانە قوعامدىق دامۋ ءمينيسترى داۋرەن ابايەۆقا دەپۋتاتتىق ساۋال جولدادى دەپ حابارلايدى Qamshy.kz اقپارات اگەنتتىگى sputniknews.kz سايتىنىڭ مالىمەتىنە سۇيەنە وتىرىپ. ءبىر توپ دەپۋتات تەلەارنالاردىڭ جۇمىسىنداعى وزەكتى ماسەلەلەردى كوتەرگەن.

"كەيبىر تەلەارنالاردا ۇلتتىق قۇندىلىقتارىمىزدى ناسيحاتتاماق تۇگىل، ولاردى ورەسكەل بۇرمالايتىن، ءتىپتى نەشە ءتۇرلى ازعىندىقتى اشىق دارىپتەيتىن تەلەونىمدەردى كورسەتۋ تىيىلماي تۇر. ماسەلەن، جۋىردا "ءوز ويىم" باعدارلاماسىندا ابىرويىن اقشاعا ساتاتىنىن جاريالاعان قازاق قىزىنىڭ شەكتەن شىققان ۇياتسىز قىلىعى مەن ونى وسىنداي ءرولدى ويناۋعا ۇگىتتەپ كوندىرگەن تەلەارنا قىزمەتكەرلەرىنىڭ "اتىن شىعارۋ ءۇشىن جەر ورتەۋگە" دەيىن باراتىن تەرىس پيعىلى جۇرتشىلىقتىڭ ورىندى اشۋ-ىزاسىن تۋعىزدى"، - دەدى دەپۋتات.

دەپۋتاتتىڭ ايتۋىنشا، قازاقستاننىڭ تۇڭعىش پرەزيدەنتى ۇسىنعان "تۋعان جەر" جانە "اۋىل ەل بەسىگى" باعدارلامالارى مەملەكەتتىك تەلەارنالاردا جەتكىلىكتى دەڭگەيدە ناسيحاتتالماي ءجۇر.

"وسى ورايدا رەسپۋبليكالىق بيۋدجەتتەن مەملەكەتتىك-اقپاراتتىق ساياساتتى جۇرگىزۋگە بولىنگەن قارجى جىلدان-جىلعا كوبەيتىلىپ وتىرعانىن ەسكەرسەك، ماسەلەن، بىلتىر 46 ميلليارد 587 ميلليون تەڭگەدەن استام، ال بيىل 49 ميلليارد 482 ميلليون تەڭگە بولىنگەن. وسىنشا قارجىنىڭ تيىمدىلىگى قانداي دەگەن سۇراق تۋىندايدى"، - دەدى كارىباي مىرزا.

دەپۋتات رەسپۋبليكالىق جانە وڭىرلىك ب ا ق باسشىلارىنىڭ جانە قىزمەتكەرلەرىنىڭ قاتىسۋىمەن "رۋحاني جاڭعىرۋ" باعدارلاماسىن اقپاراتتىق قامتاماسىز ەتۋدىڭ وزەكتى ماسەلەلەرىن كەڭىنەن تالقىلاۋدى ۇيىمداستىرۋدى ۇسىندى. سونداي-اق، باق-تا ۇلتتىق قۇندىلىقتاردى، سالت-داستۇرلەردى، قازاقستاندىق قوعامدا قالىپتاسقان ادامگەرشىلىك پرينسيپتەرىن قاتاڭ قاداعالاۋ كەرەكتىگىن اتاپ ءوتتى.

"قاجەتتىگىنە قاراي، قولدانىستاعى زاڭناماعا ءتيىستى وزگەرىستەر ەنگىزۋ ماسەلەسى قاراستىرىلسىن"، - دەدى ءماجىلىس دەپۋتاتى.

ۇسىنعان: داۋرەن سىبانباي