مامىر ايىنىڭ ورتا شەنىندە دالانىڭ ەركەسى – اقبوكەن تولدەي باستايدى. جاراتۋشىنىڭ شەبەرلىگىنە شەك جوق قوي. ءدال وسى ۋاقىتپەن تۇسپا-تۇس، ياعني، جاڭا ءتول اياققا تۇرىپ كەتكەنشە اۋا-رايى قۇبىلمالى بولا باستايدى. مۇنى قازاق "قۇرالاي سالقىنى"، "قۇرالاي جەلى" دەپ اتاپ كەتكەن.

وسى ەرەكشە ءھام تاڭداي قاقتىرارلىق قۇبىلىس تۋرالى بەلگىلى جۋرناليست نۇربەك بەكباۋ ءوزىنىڭ الەۋمەتتىك جەلىدەگى پاراقشاسىنا جازبا جاريالادى.

زەرتتەۋ ماقالالارى كوپتىڭ كوكەيىندەگىسىن ءدوپ باساتىن ءجۋرناليستىڭ جازباسىن وقىرمان نازارىنا تولىق ۇسىنعاندى ءجون ساناپ وتىرمىز.

"وسى دەيمىن دە، كيىكتەر نەگە باسقا ەمەس، وسىنداي سۋىق كۇندەرى تولدەيدى ەكەن؟! قيسىنعا سالساڭ، ءتولىڭ "جۇگىرىپ" كەتۋى ءۇشىن، اۋا رايى جىپ-جىلى كەزدە تۋعان ءجون ەمەس پە؟ ال، نەگە كيىكتەر لوگيكاعا كەرەعار، وڭمەنىڭنەن وتەر سۋىقتا تۋادى؟ جاراتقاننىڭ دانالىعى بار مۇندا! ەگەر جىلى كۇندە تولدەسە ەدى، جاڭا تۋعان قوزىنىڭ كىندىگى ىستىق اۋادان تەز بىتپەي، وعان شىبىن قونىپ، ىرىڭدەپ، سوڭىرا مەرت بولار ەدى. سوندىقتان، بوكەندەر اۋا رايى 3° گرادۋسقا دەيىن تومەندەپ كەتەتىن "قۇرالاي سالقىنىندا" جاپپاي تۋادى، بۇل كەزدە قالشىلداعان سۋىق ءجۇرىپ، شىركەي بىتكەن تىعىلىپ قالادى!!!

سوسىن، دەنەڭدى قاريتىنداي سۋىق كۇندەر - دالانىڭ نەگىزگى جىرتقىشى قاسقىردى بۇيىعى كۇيگە تۇسىرەدى. ول جارىقتىق، تۇپ-تۋرا 3 كۇنگە تابەتى جوعالادى، ەشتەڭەگە زاۋقى بولماي، اپانىندا جاتادى دا قويادى. ال كيىك وسى ءۇش كۇندە جاپپاي تۋىپ ۇلگەرەدى. سول 3 تاۋلىك ىشىندە قۇتاقانداي-اق قۇرالايلار اتتىلى ادامعا جەتكىزبەس جۇيرىك بوپ ۇلگەرەدى.

قۇدايدىڭ كەرەمەتى ءيا؟! ەگەر وسى سۋىق بولماعاندا، ارقاداعى تالتىرەك ميلليونداعان قۇرالايدى شىبىن-شىركەي تالاپ، قاسقىر پارشالاپ، ۇلى دالا جىرتقىشتاردىڭ پير-داستارحانىنا اينالىپ كەتەر ەدى ءا؟!"

ۇسىنعان: ادىلەت مادەنيەت