ق ر پرەزيدەنتىنە ۇمىتكەر ءامىرجان قوسانوۆتى "ەركىن قازاق" قوزعالىسىنىڭ باسشىسى ەرجان تۇرعىمباي دەباتقا شاقىردى، دەپ جازادى Qamshy.kz اقپارات اگەنتتىگى. 

بۇل تۋرالى ءوزىن "ەركىن قازاق" قوزعالىسىنىڭ باسشىسىمىن" دەپ تانىستىرعان ەرجان تۇرعىمبايدىڭ ءوزى 19 مامىردا Facebook پاراقشاسىندا جاريالاعان ۆيدەوسىندا ايتتى. ەرجان تۇرعىمباي الدىمەن ول ۆيدەونى ءوزىنىڭ يۋتۋب ارناسىنا جۇكتەگەن. ول اتالمىش بەينە جازبادا قازاقستاندا وتەتىن سايلاۋ تۋرالى ايتا كەلىپ، وعان قاتىسىپ جاتقان جەتى كانديداتتىڭ التاۋىن "بيلىكتىڭ قولدان جاساعان قۋىرشاعىنا" تەڭەگەن. 

سونىمەن قاتار، ەرجان تۇرعىمباي كانديداتتاردىڭ اراسىنان "ۇلت تاعدىرى" قوزعالىسى ۇسىنعان ءامىرجان قوسانوۆقا توقتالا كەلە، ونى اشىق پىكىر الماسۋعا شاقىرىپ وتىر. ۆيدەودا قازاقستاننىڭ ۋاقىتشا پرەزيدەنتى قاسىم-جومارت توقايەۆ قازىرگى بيلىك جۇيەسىنىڭ ناقتى مۇشەسى ەكەنىن ايتىپ وتكەن ەرجان تۇرعىمباي ق ر پرەزيدەنتىنە كانديتات ءامىرجان قوسانوۆتان ءوزىنىڭ پوزيسياسىن ايقىنداپ بەرۋدى سۇراعان.  

ەستەرىڭىزگە سالا كەتەيىك، قازاقستاندا 2019 جىلدىڭ 9 ماۋسىمىندا كەزەكتەن تىس پرەزيدەنت سايلاۋى وتپەك. وعان ۇمىتكەرلىككە جەتى كانديدات تىركەلىپ، قازىرگى ۋاقىتتا سايلاۋالدى ۇگىت-ناسيحات جۇمىستارىن جۇرگىزۋدە. ەرجان تۇرعىمباي دەباتقا شاقىرعان ءامىرجان قوسانوۆ بۇعان دەيىن الەۋمەتتىك جەلى ارقىلى تىكەلەي ەفير جاساپ، وزىنە كوپ قويىلىپ جۇرگەن سۇراقتارعا جاۋاپ بەرگەن. سول كەزدە ول الداعى ۋاقىتتا وسك ۇيىمداستىراتىن دەباتتا ق ر پرەزيدەنتىنە كانديدات التى (ءوزىن قوسقاندا جەتى) ۇمىتكەردىڭ كەز كەلگەنىمەن دەبات جاساۋعا  دايىن ەكەنىن ايتقان بولاتىن. 

♦ وقي وتىرىڭىزدار: https://www.qamshy.kz/article/teledebat-kandydattar-qanday-pikirde.html