وسى كۇنگە دەيىن قازاقستان مۇسىلماندارى ءدىني باسقارماسىنىڭ زەكەت قورىنا 52 682 143 تەڭگە جيناقتالعان. «ءدىني باسقارما 2013 جىلدىڭ 1 قاڭتارىنان باستاپ جيناقتالعان قوردىڭ ەسەبىنەن ءوزىن-وزى قاراجاتپەن قامتاماسىز ەتە المايتىن 144 اۋىل يمامدارىنا 20 مىڭ تەڭگە مولشەرىندە جالاقى بەرە باستادى. بيىلعى جىلدىڭ العاشقى ءۇش ايىندا قمدب زەكەت قورىنان ءار وڭىردەگى يمام-مولدالارعا 7 548 000 تەڭگە مولشەرىندە جالاقى بەردى» دەلىنگەن حابارلامادا. ماسەلەن، اقتوبە قالاسى اكىمشىلىگى ءدىن جاناشىرلارىنىڭ، كاسىپكەرلەردىڭ كومەگى ارقىلى 50 400 000 تەڭگە زەكەت بەرگەن. وسى زەكەتتەن وبلىستىق يمام-مولدالارعا جالاقى بەرىلىپ، بۇدان بولەك مەشىتتەردىڭ كوممۋنالدىق شىعىندارىنا، جوندەۋ جۇمىستارىنا جۇمسالۋدا ەكەن. قمدب زەكەت قورى – الەۋمەتتىك، قايىرىمدىلىق، مادەني، ءبىلىم بەرۋ جانە قوعامعا پايدالى يگى دە ىزگى ماقساتتاردى جۇزەگە اسىرۋ ءۇشىن قۇرىلعان كوممەرسيالىق ەمەس ۇيىم. قوردىڭ نەگىزگى ماقساتى بولسا زەكەتتىڭ جيناقتالۋى مەن تاراتىلۋىن جۇزەگە اسىرۋ. سونىمەن قاتار، قوردىڭ جارعىسىنا سايكەس، ءوزىن-وزى قاراجاتپەن قامتاماسىز ەتە المايتىن شالعايداعى اۋىل مەشىتتەرىندەگى ءدىن قىزمەتكەرلەرىنە جالاقى بەرىلەدى.