نۇر-سۇلتان قالاسىندا قازاقستان پرەزيدەنتى قاسىم-جومارت توقايەۆتىڭ توراعالىعىمەن سىبايلاس جەمقورلىققا قارسى ءىس-قيمىل ماسەلەلەرى جونىندە كەڭەس ءوتتى دەپ جازادى Qamshy.kz اقپارات اگەنتتىگى پرەزيدەنتتىڭ باسپا ءسوز قىزمەتىنە سىلتەمە جاساپ.

جيىن بارىسىندا قازاقستاندا جەمقورلىقتىڭ دەندەپ كەتكەنىنە الاڭداۋشىلىق ءبىلدىرىپ، بۇنىڭ قوعامعا ءقاۋىپتى دەرت ەكەنىن ايتقان توقايەۆ ونى شەشۋ ءۇشىن بيلىك جەتى نەگىزگى شارا ۇسىنىپ وتىرعانىنا توقتالعان.

سونىمەن قاتار، پرەزيدەنت ءوزىنىڭ ۇستانىمى رەتىندە بيۋدجەت شىعىندارىن جوسپارلاۋعا حالىق وكىلدەرىن قاتىستىرۋ ەكەنىن ايتىپ، بۇدان ەل ەكونوميكاسى دامىپ، تيىسىنشە، حالىقتىڭ ءال-اۋقاتىنىڭ ارتاتىنىنا سەنىم بىلدىرگەن.

"اكىمدەرگە ايتارىم، جەمقورلىقتى تۇبەگەيلى جويۋ - سىزدەردىڭ جۇمىستارىڭىزدىڭ نەگىزگى كورسەتكىشىنىڭ ءبىرى. وعان سىزدەر تىكەلەي جاۋاپتىسىزدار. ءاربىر ەلدى مەكەننىڭ ءوز بيۋدجەتىنە قاراي ءتورتىنشى دەڭگەيلى بيۋدجەت قۇرۋدى اياقتاۋ كەرەك. مەنىڭ پرەزيدەنت رەتىندەگى ۇستانىمىم بيۋدجەت شىعىندارىن جوسپارلاۋعا، اسىرەسە وڭىرلەردە حالىق وكىلدەرىن قاتىستىرۋ كەرەك. بۇدان ەل ەكونوميكاسى دامىپ، تيىسىنشە، حالىقتىڭ ءال-اۋقاتى ارتادى"، – دەدى توقايەۆ.

سونداي-اق، جيىندا توقايەۆ "ەگەر قول استىنداعى جۇمىسشىسى پارامەن ۇستالسا، مەملەكەتتىك ورگانداردىڭ باسشىلارى جۇمىستان كەتۋگە ءوتىنىش جازۋى ءتيىس" دەدى.

توقايەۆتىڭ ايتۋىنشا، وتستاۆكانى قابىلداۋ نەمەسە قابىلداماۋ - پرەزيدەنتتىڭ شارۋاسى، ءبىراق باسشىلار جۇمىستان كەتۋ تۋرالى ءوتىنىش جازۋى مىندەت.

دايىنداعان: ميات كاشىباي