بۇرىن بۇل جەردە باي فلورا مەن فاۋناسى بار تروپيكالىق ورمان بولادى، ءبىراق ادامدار اعاشتىڭ ءبارىن شاۋىپ العان سوڭ جويىلىپ كەتكەن. تروپيكالىق ورمان ءولىپ، توپىراق قۇنارسىزدانىپ، جانسىز شولگە اينالدى. برازيليالىق وتباسىلىق جۇپ 20 جىلدىڭ ىشىندە ورماندى قايتا قالپىنا كەلتىردى دەپ جازادى Qamshy.kz اقپارات اگەنتتىگى.
برازيليالىق فوتوجۋرناليست سەباستيان سالگادو وتە ادەمى تابيعات اياسىندا، تروپيكالىق ورماندا دۇنيەگە كەلىپ، ەر جەتەدى. تۋعان جەرىنەن جىراققا كەتىپ، كوپ جىلدان كەيىن ورالعان سەباستيان جايقالعان تابيعاتتىڭ ورنىندا قالعان قاڭىراعان دالانى كورىپ قاتتى قىنجىلادى.
سەباستيان سالگادو تابيعاتتى بۇرىنعى قالپىنا كەلتىرىپ، ادامداردىڭ كەلتىرگەن زالالىن تۇزەتۋگە شەشىم قابىلدادى. ايەلى لەليا دەلۋيس ۆانيك سالگادو سەباستيانعا باتىل وي تاستاپ، ورماندى قايتادان وتىرعىزۋدى ۇسىنادى. وسىلاي وتباسىلى جۇپ Instituto Terra (Earth Institute) اتتى ۇيىم قۇرعان.
1999 جىلدىڭ جەلتوقسانىندا ۇيىم العاشقى تۇقىمداردى وتىرعىزا باستاعان، بۇل كەرەمەت ترانسفورماسيانىڭ باسى بولدى. ولار اعاشتىڭ 300-دەن استام ءتۇرىن وتىرعىزىپ، وسى جەردىڭ فلوراسى مەن فاۋناسىن قالپىنا كەلتىردى.
فوتوسۋرەتتەردەن تابيعاتتىڭ قالاي قالپىنا كەلىپ، ومىرگە قايتا ورالعانىن انىق بايقايسىز.
توپىراق ەروزياسى رەتتەلگەن سوڭ، سۋ رەسۋرستارى قالپىنا كەلگەن. كەسۋدەن كەيىن جويىلعان تابيعي كوزدەر قايتارىلدى. ەڭ ماڭىزدىسى، جانۋارلاردىڭ ورمانعا قايتا ورالۋى بولدى. جاڭا ورماندا قۇستىڭ 172 ءتۇرى، سۇتقورەكتىڭ 33 ءتۇرى، باۋىرىمەن جورعالاۋشىلاردىڭ 15 ءتۇرى جانە امفيبيانىڭ 15 ءتۇرى پايدا بولدى. سونىڭ ىشىندە بۇكىل دۇنيە جۇزىندە جويىلىپ كەتۋ ءقاۋپى تونگەن تۇرلەرى دە بار.
قازىرگى تاڭدا ميناس -جەرايس تروپيكالىق جۇماققا اينالعان. ورماندا كوپتەگەن وسىمدىكتەر مەن جانۋارلار ءومىر سۇرەدى.
20 جىلدىڭ ىشىندە جوعالعان جەردىڭ ءتۇپنۇسقالىق ءپىشىنى قايتارىلدى. ال ءومىرسىز ءشول دالا تەك ەسكى فوتوسۋرەتتەردە قالدى. Instituto Terra ۇيىمى ادامنىڭ تابيعاتتى جويىپ قانا قويماي، قورشاعان ورتانى قالپىنا كەلتىرە الاتىنىن كورسەتتى. جەردى قالپىنا كەلتىرگەننەن كەيىن جەر ينستيتۋتى ءوزىنىڭ جۇمىسىن توقتاتپاي، ەكولوگيانى قورعاۋ جانە پلانەتامىزدى ساقتاۋ يدەياسىن دامىتۋدى جالعاستىرىپ كەلەدى.
