XVIII عاسىرداعى ءسان قۋعاندار قاقاعان قىستا شيفون كيىمدەر كيىپ، پنيەۆمونيادان قايتىس بولعان. جىندى ما دەرسىڭ، ءبىراق بۇل سول كەزدە ءسان بولعان. الايدا ولارعا زاماناۋي ءسان قۋعانداردىڭ ەسۋاستىعىنا جەتۋ قايدا! سۇيەگى كورىنگەنشە سالماق جوعالتىپ، جۇيكەلەرى بۇزىلعانشا دۇكەن ارالاپ، ءسان ءۇشىن دەنەسىن تىلىمدەگەن سانگەرلەرگە نە دەرسىڭ دەپ جازادى Qamshy.kz اقپارات اگەنتتىگى.
مىسالى، يزرايلدىك ايەل شەكەسىنە Swarovski كريستالدى تاستارىنان جۇلدىز بەينەسىندەگى تاتۋ جاساتقان. قىزدىڭ سوزىنە قاراعاندا، وپەراسيادان كەيىنگى العاشقى كۇندەردە شەكەسىندەگى تاس كريستالدار الاقانىن تالاي رەت جارالاعان. سۋرەتتى جاساعان شەبەرلەردىڭ ايتۋى بويىنشا، كريستالدى تاتۋيروۆكانى الىپ تاستاۋ مۇمكىن ەمەس. الىپ تاستاعان كۇننىڭ وزىندە، ودان قالعان ءىز ەشقاشان كەتپەيدى. وسىنداي جۇلدىزدى سالدىرۋ ءۇشىن سۋپەرمودەل 34 000 دوللار اقشا جۇمساعان.
قازىرگى ۋاقىتتا "Fashion victim" (اعىل. ءسان قۇربانى) تەرمينى تانىمال. ونى عىلىمعا وسكار دە لا رينس اتتى ديزاينەر ەنگىزگەن.
ءسان قۇربانى - سانگە دەگەن تىم ارتىق سۇيىسپەنشىلىگى مەن ونىڭ زاڭدارىنا شەكتەن تىس مويىنسۇناتىن ادام. ىڭعايسىز كيىمدەر كيىپ، ۇنەمى ديەتا ۇستاپ، پلاستيكالىق وپەراسيا جاساتىپ، ءسان ءۇشىن وزدەرىن ايامايتىندار دارىگەرلەر مەن پسيحولوگتاردىڭ، پسيحياترلاردىڭ الاڭداۋشىلىعىن تۋدىرىپ وتىر.
ساراپشىلاردىڭ پىكىرىنشە جۇلدىزداردان بولەك جاسوسپىرىمدەر، 45 جاسقا دەيىنگى ايەلدەر، مەگاپوليس تۇرعىندارى جانە جارناما بيزنەسى، ءسان يندۋسترياسىنداعى جانە PR سالاسىنداعى ماماندار ءجيى ءسان قۇربانىنا اينالادى. كاسىبي مامانداردان باسقا پسيحولوگياسى ءالسىز نەمەسە كوپتىڭ نازارىندا بولۋدى ۇناتاتىندار سۇمدىق قادامدارعا بارادى.
وسىلاي ءسان قۋعاندار ءتۇرلى اۋرۋلارعا شالدىعادى:
- انورەكسيا
سالماق جوعالتۋعا بولمايتىن جاعدايدىڭ وزىندە تاماق جەۋدەن باس تارتاتىن ءسان قۇرباندارى اراسىنداعى ەڭ تانىمال اۋرۋ. وسىنداي اۋرۋ تۇرلەرىنىڭ اراسىندا انورەكسيا ءولىم سانى بويىنشا ءبىرىنشى ورىندا تۇر. اۋرۋ العاش رەت وتكەن عاسىردىڭ 80 - جىلدارى اتاقتى ءانشى كارەن كارپەنتەر انورەكسيادان قايتىس بولعان كەزدە ايتىلدى. بۇل اۋرۋ اكتريسا ەددي سەدجۆيك، يزابەل كارو، ءاپالى-سىڭىلى ليۋسەل جانە ەليانا راموس اتتى مودەلدەردىڭ ءومىرىن العان.
- بۇلشىق ەت ديسمورفياسى
بۇل – وزدىگىنەن بۇلشىق ەت ماسساسىن كوبەيتۋگە ۇمتىلۋ. بۇلشىق ەت ديسمورفياسى انورەكسيانىڭ ەركەك نۇسقاسى دەپ اتالادى. پسيحولوگتاردىڭ پىكىرىنشە، جاسوسپىرىمدەر مەن جاستاردىڭ 30-دان 75 پايىزىنا دەيىن ءوز دەنەلەرىنە قاناعاتتانبايدى. سوندىقتان پسيحولوگيالىق زارداپ شەگەدى. جاس جىگىت ءوزىنىڭ ءالسىز، نازىك كورىنەتىنىنە ىزالانىپ، جاتتىعۋ زالدارىنان شىقپاۋى مۇمكىن. ول ديەتا ۇستاپ، اۋىرسىنۋدى سەزدىرتپەيتىن دارىلەردى قولدانادى. بۇلشىقەت ديسمورفياسىنان زارداپ شەككەن ادامدار اراسىندا ءولىم سانى وتە جوعارى. ولاردىڭ ءومىرى ءقاۋىپتى پرەپاراتتاردى قابىلداۋدىڭ سالدارىنان جانە دەپرەسسيا نەگىزىندە وز-وزىنە قول جۇمساۋمەن اياقتالادى.
- تانورەكسيا
بۇل تەرمين ۋلتراكۇلگىن ساۋلەلەرگە پسيحولوگيالىق تاۋەلدىلىك دەگەندى بىلدىرەدى. ولار بارلىق ۋاقىتىن كۇنگە قىزدىرعىش ماشينالارعا جۇمسايدى، دەنەسىن كۇيدىرۋ ءۇشىن ۋلتراكۇلگىن ساۋلەلەردى شەتتەن تىس قابىلدايدى. بۇل اۋرۋعا اسىرەسە كۇن كوپ تۇسپەيتىن ەلدەردەگى 13-16 جاستاعى قىزدار ۇشىرايدى. جاقسى كورىنۋگە دەگەن نيەت، ارينە، ايەل زاتى ءۇشىن جاقسى. الايدا كۇنىنە ءبىر رەت ۋلتراكۇلگىن ساۋلەلەردى قابىلداۋ ماقساتىنا اينالعاندا، جاعداي باقىلاۋدان شىعادى.
«ەگەر سوليارييگە كەم دەگەندە ءبىر كۇن بارماسام، ءوزىمدى اقشىل جانە ءمولدىر سەزىنەمىن»، - دەيدى تانورەكسيمەن اۋىراتىن ءجاسوسپىرىم قىز.
جىل سايىن تەك ۇلىبريتانيادا 100-گە جۋىق ادام وسىنداي ماشينالاردى كوپ قولدانعاننان ومىردەن وتەدى. دارىگەرلەر ءقازىردىڭ وزىندە 16 جاسقا تولماعان بالالارعا توتىعۋ سالوندارىنا بارۋعا رەسمي تۇردە تىيىم سالعان. امەريكا قۇراما شتاتتارىنىڭ 27 شتاتىندا سوليارييگە بارۋ ءۇشىن جاسوسپىرىمدەر اتا-انالارىنان رۇقسات الۋى كەرەك. اۆستراليادا دەرماتولوگتار ۋلتراكۇلگىن ساۋلەلەردىڭ جانە جاساندى بوياۋلاردىڭ قاۋىپتەرى تۋرالى ستۋدەنتتەرگە ۇنەمى حابارلاپ وتىرادى. بۇل تەرى اۋرۋىنا اكەلىپ سوعادى. اۆسترالياداعى تەرى راگىنىڭ جيىلىگى الەمدە ەڭ جوعارى كورسەتكىشتەردىڭ ءبىرى.
- لەيبلومانيا
بۇل پسيحولوگيالىق تۇرعىدان بۇزىلۋ بولىپ تابىلادى. ادام تەك قانا ءساندى برەندتەردى كيەدى. ساننەن ءبىر ساتكە دە ارتتا قالمايدى. ءار ماۋسىم سايىن گاردەروبىن جاڭارتىپ وتىرادى. مۇنداي ادامدار ول كيىمنىڭ وزىنە جاراسىپ-جاراسپايتىنىنا دا قارامايدى. ۇلكەن اقشالاي شىعىنعا باتىپ، العان كيىمدەرىنىڭ قانشالىقتى دەنساۋلىققا زيان ەكەنىن تۇسىنبەيدى. وتە تىعىز دجينسىلار قان اينالىمىن ازايتادى. اسقازانى اشىق قىسقا يۋبكالار مەن فۋتبولكالار پيەلونەفريتتىڭ شيەلەنىسۋىن تۋدىرادى. ۇلكەن، تىعىز بەلدىكتەر جۇرەكتىڭ جۇمىسىن كۇردەلەندىرەدى: ەركىن قان بەرۋى بۇزىلادى، تىنىس الۋى قيىندايدى، ىشكى اعزالاردىڭ جۇمىسى بۇزىلادى جانە ت.ب.
فرانسۋزداردا "سۇلۋ بولۋ ءۇشىن سۇلۋ بولىپ تۋىلۋ كەرەك، ال ادەمى كورىنۋ ءۇشىن سىزگە ازاپ شەگۋ كەرەك" دەگەن ءسوز بار. دەگەنمەن، سۇلۋلىققا جەتۋ جولىن ءاربىر ايەل ءوزى تاڭدايدى، ال بۇل ىزدەنىستە كوپ ادام ابسۋردتىق كۇيگە جەتۋى مۇمكىن. وسىدان ادەمى بولعىسى كەلەتىن قاراپايىم ەرمەك ۇلكەن زارداپقا، پسيحولوگياعا، دەنساۋلىققا ءتىپتى ءوز ومىرىنە قول جۇمساۋعا اكەلىپ سوعادى.
