سايلاۋالدى دەبات اياقتالا سالىسىمەن الەۋمەتتىك جەلىلەردە قىزۋ تالقىعا ءتۇستى دەپ جازادى Qamshy.kz اقپارات اگەنتتىگى. 

حالىقتىڭ باسىم كوپشىلىگى دەبات كوڭىلدەن شىقپادى، قىزۋ پىكىرتالاس بولعان جوق دەگەن ويلارىن ءبىلدىرىپ جاتىر. ولاي دەۋگە بىرنەشە سەبەپ بار. بىرىنشىدەن، سايلاۋعا تۇسكەن ۇمىتكەرلەر تولىق قاتىسپادى. ەكىنشىدەن، مەملەكەتتىك ءتىل باسىمدىقتا بولعان جوق.

فەيسبۋك الەۋمەتتىك جەلىسىندە ەسبولات ايدابوسىن: "قامشى ۇستاپ، شاپان كيىپ كەلگەن سادى-بەك تۇگەلدەن وزگەسى ەكى تىلدە سويلەدى. ول كەمشىلىكتى ساكەڭ ءسوز سوڭىندا ايتىپ، التى ازاماتتىڭ بەتىنە باستى. ءبىراق ۇيالعان ءبىرى جوق، قۇلاققا دا قىستىرماي ەكى تىلدە دايىنداپ كەلگەن ءسوزىن وقىپ تۇرا بەردى. ۇلى دالا قىرانىنا داۋىس بەرسەم بە ەكەن؟!" ، - دەپ پىكىر قالدىرعان. 

ال سەرىكبول شايمەردەن: "ستۋدەنتتەر ساباققا بارعىسى كەلمەسە، گرۋپپالاستارىنا جازاتىن: "بۇگىن ساباققا بارمايىم، سەندە بارماي اق قوي" دەپ، توقايەۆ تا سولاي جاساعان سياقتى"، - دەپ فەيسبۋك پاراقشاسىنا ءوز ويىن بىلدىرگەن.  

"كەلمەگەندەردى قويا تۇرشى، كەلىپ تۇرىپ، سوۆەتىن ساعىنعان، ءبىر اۋىز قازاقشا ايتپاعان احمەتبەكوۆتەردىڭ پارلامەنتتە وتىرعانىن-اي... ءوزى ۇمىتكەر تاعى. تاۋەلسىزدىك دەگەن نە؟" - دەپ جازدى جاينگۇل حاميدوللا.

امانگەلدى قۇرمەت ۇلى: "دەبات بولدى ما نە؟ "ءححى عاسىر كوشباسشىسى" باعدارلاماسى ەكەن دەسەم"، - دەپ پىكىر قالدىرعان. 

كەزىندە پرەزيدەنت جولداۋىن 90 مينۋت تىكەلەي بەرەتىن تەلەارنا نەگە دەباتقا كەلگەندە 90 سەكۋندقا تىرەلىپ قالدى دەپ جاتقانداردا جوق ەمەس.

حالىقتىڭ الەۋمەتتىك جەلىلەردە جازعان اشىق ويلارىن وقىپ وتىرساق، بۇگىنگى تەلەدەباتقا حالىقتىڭ كوڭىلى تولماعان سياقتى. 

دايىنداعان: مارجان سابەت