نۇر-سۇلتاندا جوعارى ەۆرازيا ەكونوميكالىق كەڭەسىنىڭ مەرەيتويلىق ءماجىلىسىنىڭ قادىرمەندى قوناقتارىنا ارنالعان كونسەرت وتكەن بولاتىن دەپ حابارلايدى Qamshy.kz اقپارات اگەنتتىگى.
بۇل تۋرالى مادەنيەت جانە سپورت ءمينيسترى ارىستانبەك مۇحامەدي ۇلى ءوزىنىڭ فەيسبۋك پاراقشاسىندا جازدى. مينيستر كونسەرتتە ءوزى دە ونەر كورسەتىپ، كوپشىلىكتى جاڭا ءبىر قىرىمەن تاڭ قالدىردى.
"دوستارىم، كەشە نۇر-سۇلتاندا وتكەن جوعارى ەۆرازيا ەكونوميكالىق كەڭەسىنىڭ مەرەيتويلىق ءماجىلىسىنىڭ قادىرمەندى قوناقتارىنا ارنالعان كونسەرتىمىز تابىستى ءوتتى. بۇل ءىس-شارا نۇرسۇلتان نازاربايەۆتىڭ ەۆرازيالىق ينتەگراسيا تۋرالى يدەياسىنىڭ 25 جىلدىعىنا جانە ەۆرازيا ەكونوميكالىق كەڭەسى تۋرالى كەلىسىمگە قول قويىلۋىنىڭ 5 جىلدىعىنا ارنالعانى بەلگىلى.
تۇڭعىش پرەزيدەنت نۇرسۇلتان نازاربايەۆ، مەملەكەت باسشىسى قاسىم-جومارت توقايەۆ، رەسەي پرەزيدەنتى ۆلاديمير پۋتين، بەلارۋس پرەزيدەنتى الەكساندر لۋكاشەنكو، قىرعىزستان پرەزيدەنتى سوورونباي جەەنبەكوۆ، ارمەنيا پرەمەر-مينيسترى نيكول پاشينيان، ەاەك جانىنداعى باقىلاۋشى مەملەكەت باسشىسى رەتىندە مولدوۆا پرەزيدەنتى يگور دودون، تاجىكستان پرەزيدەنتى ەمومالي راحمون جانە تمد اتقارۋشى كوميتەتى ءتوراعاسى سەرگەي لەبەديەۆ. مۇنداي قۇرمەتتى قوناقتاردىڭ الدىندا ونەر كورسەتۋ - وتە جاۋاپتى ءىس، دوستارىم!
سۇيىكتى اسپابىم - ۆيولونچەلدى قولىما الىپ، رف حالىق ءارتىسى سەرگەي رولدۋگين باسقارعان ۆيولونچەلشىلەر انسامبلىمەن ونەر كورسەتىپ، فرانسۋز كومپوزيتورى شارل-كاميل سەن-سانستىڭ اتاقتى «اققۋ» حورەوگرافيالىق مينياتيۋراسىن ورىندادىق. ءبىزدى ەكى ارفاشى قىز سۇيەمەلدەپ، اققۋ ءرولىن «استانا وپەرا» موبت جەتەكشى ءسوليسى، ق ر ەڭبەك سىڭىرگەن قايراتكەرى ايگەرىم بەكەتايەۆا ورىندادى. جۇرت الدىندا ويناماعالى ءبىراز بولىپ ەدى، مەنى بيلەگەن قۋانىش سەزىمىن سوزبەن جەتكىزۋ قيىن.
قۇرمەتتى قوناقتار الدىندا سسرو حالىق ءارتىسى، ق ر مەملەكەتتىك سىيلىعىنىڭ لاۋرەاتى الىبەك دىنىشيەۆ، قازاقستاننىڭ ەڭبەك سىڭىرگەن ءارتىسى، ق ر مەملەكەتتىك سىيلىعىنىڭ لاۋرەاتى مايرا مۇحامەد قىزى، قازاقستاننىڭ ەڭبەك سىڭىرگەن ارتىستەرى مەيىر باينەش، مەدەت شوتابايەۆ، «پلاسيدو دومينگو وپەرالياسى» حالىقارالىق انشىلەر كونكۋرسىنىڭ لاۋرەاتى، «استانا وپەرا» موبت ءسوليسى ماريا مۋدرياك، ق ر ەڭبەك سىڭىرگەن قايراتكەرى ارمان جۇدەبايەۆ (قازاقستان رەسپۋبليكاسى)، «سازگەن سازى» فولكلورلىق-ەتنوگرافيالىق ءانسامبلى جانە دومبىراشىلار ءانسامبلى، حالىقارالىق كونكۋرستار لاۋرەاتى تايىر ءتاجىعۇلوۆ، حالىقارالىق كونكۋرستار لاۋرەاتى الفيا ابدۋلمانوۆا ج.ب. ونەر كورسەتتى.
كەرەمەت ونەرى ءۇشىن بارلىق ارتىستەرگە شىن جۇرەكتەن العىس ايتامىن! قادىرمەندى قوناقتارىمىز وسى كونسەرتتەن ەرەكشە اسەر الىپ، ەستەرىندە قالادى دەگەن سەنىمدەمىن!" دەپ جازدى مينيستر.
ۇسىنعان: ماقپال سەمباي
