جامبىل وبلىسىندا جاستار ساياساتىن جۇزەگە اسىرۋعا ۆولونتەرلار دا ءوز ۇلەسىن قوسىپ كەلەدى. ولار قارتتار ءۇيى، جالعىزباستى قارتتاردىڭ جانە مۇمكىندىگى شەكتەۋلى جانداردىڭ شارۋاشىلىعىنا ۇدايى كومەكتەسىپ وتىرادى. سونداي-اق، رەسپۋبليكالىق، وبلىستىق قوعامدىق-ساياسي اۋقىمداعى شارالارعا بەلسەندى ارالاسۋدا.

  بيىلدان باستاپ ۆولونتەرلاردىڭ الەۋەتى قايىرىمدىلىققا، مۇقتاج وتباسىلارىنا ناقتىلى كومەك كورسەتۋگە باعىتتالعان. وبلىستا 2 مىڭعا جۋىق ەرىكتىلەر دەرەكقورى جاسالىپ، بۇل جۇمىستاردى جۇيەلەندىرۋ ماقساتىندا وبلىس اكىمدىگىنىڭ قاۋلىسىمەن «قامقور» ۆولونتەرلىق-قايىرىمدىلىق جوباسىن ىسكە اسىرۋ جونىندەگى جوسپار بەكىتىلگەن بولاتىن. وسى جوبانىڭ شەڭبەرىندە وبلىستاعى از قامتىلعان، تۇرمىسى تومەن، كومەككە مۇقتاج وتباسىلاردىڭ الەۋمەتتىك جاعدايىن انىقتاپ، ساراپتاۋ جۇمىستارىن جۇرگىزۋ، قاجەتتىلىكتەرىنە قاراي جۇيەلى تۇردە جان-جاقتى قولداۋ كورسەتۋ، الەۋمەتتەنۋىنە ىقپال ەتۋ قارالعانىن ەرەكشە اتاپ وتۋگە بولادى.

جامبىل وبلىسىندا 1800 ۆولونتەر بار. ولاردىڭ 550ء-ى تاراز قالاسىندا بولسا، 1250ء-ى اۋدانداردا. جوسپارعا سايكەس وسى ۆولونتەرلار ارنايى ازىرلەنگەن الەۋمەتتىك ساۋالناما تولتىرۋ ماقساتىندا وبلىستاعى 250 مىڭنان استام وتباسىن ارالاۋدى جوسپارلاعان. ناقتىلاي كەتەتىن بولساق، تاراز قالاسىنداعى 89 299 جانە اۋدانداردا 165 232 وتباسى. جالپى 218 736 وتباسىن ارالاپ، 77 385 وتباسىنا ساۋالناما تولتىرىلعان. ەندى تولتىرىلعان وسى ساۋالنامالار ارنايى ازىرلەنگەن دەرەكقورعا ەنگىزىلۋدە. قورىتىندىسى بويىنشا انىقتالعان مۇقتاجدىقتار سارالانا وتىرىپ، ءار اۋدان، قالا، وبلىستىق الەۋمەتتىك كارتا ازىرلەنەتىن بولادى.

  جوبا اياسىندا، سونداي-اق تاراز قالاسىندا 3 قايىرىمدىلىق دۇكەن اشىلدى. بارلىق قاجەتتى جابدىقتارمەن قامتاماسىز ەتىلگەن بۇل دۇكەندەر ارقىلى جىل باسىنان بەرى 752 وتباسىنا 3 تونناعا جۋىق كيىم-كەشەك ۇلەستىرىلدى. بۇدان بولەك، حالىق كوپ شوعىرلاناتىن 5 ساۋدا ورنىندا ارنايى جاشىك ورناتىلدى. سونىمەن قاتار، جوبا اياسىندا ۆولونتەرلاردىڭ ىقپال ەتۋىمەن وبلىس بويىنشا 609 وتباسىنا 3،2 ميلليون تەڭگەگە ازىق-تۇلىك تۇرىندە كومەك كورسەتىلدى. وسىلايشا، وبلىس ۆولونتەرلارى قايىرىمدىلىق شارالارىن ىسكە اسىرۋ باعىتىندا ءبىراز شارۋانىڭ باسىن قايىردى. ولاردىڭ كومەگىن، سونداي-اق جالعىزباستى قارتتار مەن مۇمكىندىگى شەكتەۋلى جاندار دا سەزىنۋدە. سەبەبى، شارۋاشىلىعىنا ۇدايى كومەكتەسىپ وتىرادى.

دۋلات ايتباي