ەلباسى نۇرسۇلتان نازاربايەۆتىڭ جارلىعىمەن 2019 جىل – «جاستار جىلى» دەپ جاريالانعانى بەلگىلى. وسىعان وراي، ەلىمىزدىڭ بارلىق وڭىرلەرىندە جاستارعا ارنالعان ءتۇرلى باستامالار قولعا الىنىپ، يگى شارالار ۇيىمداستىرىلۋدا. سونىڭ ىشىندە، اسىرەسە جاستاردى جۇمىسپەن قامتۋ ماسەلەسىنە توقتالار بولساق، بۇل باعىتتا جامبىل وبلىسىندا دا  اتقارىلىپ جاتقان شارۋالار از ەمەس ەكەنىنە كوز جەتكىزۋگە بولادى.

  جامبىل وبلىسىنداعى جاستار جەرگىلىكتى حالىقتىڭ 21،2 پايىزىن قۇرايدى. ياعني، وبلىستا بارلىعى 239 151 جاس بولسا، ولاردىڭ ىشىندە قالادا تۇراتىنى 89 577 ادام، ياعني 37،5 پايىز، اۋىلدىق ەلدى مەكەندە 149 574 ادام، ياعني 62،5 پايىز. جالپى، جاستاردىڭ 92 424ء-ى ءبىلىم السا، 6 935ء-ى جۇمىسسىز جاستار،
19 132 NEET جاستار، 57 400ء-ى ءوز بەتىمەن جۇمىسپەن قامتىلعاندار جانە
63 260ء-ى ءتۇرلى سالادا جۇمىس جاسايتىندار.

  وبلىس بويىنشا جاستار اراسىنداعى جۇمىسسىزدىق دەڭگەيى 2018 جىلى 2،9 پايىزدى قۇرادى. رەسپۋبليكا بويىنشا بۇل كورسەتكىش − 3،8 پايىز. بۇل باسقا وڭىرلەرمەن سالىستىرعاندا ەڭ تومەنگى كورسەتكىشتەردىڭ ءبىرى. جالپى، جامبىل وبلىسى اكىمدىگىنىڭ جاستار ساياساتى ماسەلەلەرى باسقارماسى تاراپىنان جاستاردى الەۋمەتتەندىرۋگە باسىمدىق بەرىلىپ، وسى باعىتتا ءتيىستى ۋاكىلەتتى ورگاندارمەن جانە تاراز قالاسى مەن اۋدان اكىمدەرى اراسىندا ناقتى مەجەلەر ايقىندالعان 11 ينديكاتورلىق كورسەتكىشتەر بەلگىلەنگەن. ونىڭ جەتەۋى جاستاردى جۇمىسپەن قامتۋدىڭ بەلسەندى شارالارىنا تارتۋعا باعىتتالعان. ولار ۆاكانتتىق بوس جۇمىس ورىندارىنا؛ «جاستار تاجىريبەسىنە»؛ الەۋمەتتىك جۇمىس ورىندارىنا؛ اقىلى قوعامدىق جۇمىستارعا تارتۋ، كاسىبي وقۋدان وتكىزۋ، كاسىپكەرلىك نەگىزدەرىنە وقىتۋ، شاعىن نەسيەلەندىرۋ بولىپ تابىلادى. بيىلعى جىلى 11 مىڭعا جۋىق جاس جۇمىسپەن قامتۋدىڭ بەلسەندى شارالارىنا تارتىلماق. اعىمداعى جىلدىڭ 1 مامىرىنا 4 مىڭعا جۋىق (ناقتى سانى 3905) جاس جۇمىسپەن قامتۋدىڭ بەلسەندى شارالارىنا تارتىلدى. ولاردىڭ 1429-ى ۆاكانتتىق بوس جۇمىس ورىندارىنا ورنالاسسا، 65ء-ى قىسقا مەرزىمدى كاسىبي وقىتۋعا، 1394 تۇلەك جاستار تاجىريبەسىنە، 241ء-ى الەۋمەتتىك جۇمىس ورىندارىنا، 619-ى اقىلى قوعامدىق جۇمىستارعا جولداندى. ال، 152 جاس «بيزنەس-باستاۋ» جوباسىمەن كاسىپكەرلىك نەگىزدەرىنە وقىتۋعا جولدانىپ، 5-ەۋى وتكەن جىل قارجىسى ەسەبىنەن شاعىن نەسيە الدى. جالپى، بيىل وڭىردە 12 بوس جۇمىس ورىندارى جارمەڭكەسى ءوتىپ، وعان 175 جاس تارتىلعان. ناتيجەسىندە 38 جاس جولداماعا يە بولدى. وسىلايشا، جاستاردى جۇمىسپەن قامتۋ باعىتىندا ءبىرشاما ناتيجەلى جۇمىستار اتقارىلۋدا دەۋگە بولادى. ال «جاستار جىلى» رەتىندە جاريالانعان بيىلعى جىل وڭ وزگەرىستەرگە تولى بولارىنا سەنىم مول.

دۋلات ايتباي