قازاقستان رەسپۋبليكاسىنىڭ زاڭناماسىنا سايكەس، 2019 جىلدىڭ ءساۋىر ايىنان باستاپ 340 مىڭعا جۋىق كوپبالالى انالارعا جاردەماقى تاعايىندالۋى ءتيىس بولعان. سول ۋاقىتتان بەرى، "بەرەمىز دەپ تۇرعان ۇكىمەتتەن، الامىز" دەگەن حالىق كوپ. اتاۋلى الەۋمەتتىك كومەك الۋ ماسەلەسى تۋرالى قاسىم-جومارت توقايەۆ ءوز تۆيتتەر پاراقشاسىندا ەكى اۋىز ءسوز جازىپ قالدىردى دەپ حابارلايدى  Qamshy.kz اقپارات اگەنتتىگى. 

ءار بالاعا 20789 تەڭگە تاعايىنداعان ۇكىمەتتەن الەۋمەتتىك كومەك الۋ ءۇشىن قاراپايىم حالىق ءارتۇرلى  قۇيتىرقى ارەكەتتەرگە بارىپ جاتىر. ااك ماسەلەسى بويىنشا ءبىر عانا شىمكەنت قالاسى ەڭبەكشى اۋداندىق سوتىنىڭ وزىنە اجىراسۋ تۋرالى كۇنىنە 10-15 ارىز تۇسەتىنى ءمالىم بولعان. ايەلى جوق اكەگە، كۇيەۋى جوق اناعا دا بولىنەتىن قاراجاتتى ەشكىم دە جىبەرىپ العىسى كەلمەيدى. كەرەك دەسەڭىز، بالاسىنان باس تارتىپ جاتقاندار دا كەزدەسەدى.

وتباسىنىڭ جالپى ايلىق كىرىس كولەمى 20789 تەڭگەدەن اساتىن بولسا، ااك قاراستىرىلمايدى. مىسالى، 25 000 تەڭگە جالاقى الاتىن بولساڭىز، دەمەك ءومىر ءسۇرىپ، وتباسىن اسىراي الاتىن جانداردىڭ قاتارىنانسىز. وتباسىلىق كىرىستى قۇجات بويىنشا ازايتۋ ءۇشىن، ايەلى مەن كۇيەۋى اجىراسىپ، زەينەتاقىسى بار اناسىن نەمەسە اكەسىن ءۇي كىتاپشاسىنان شىعارىپ تاستاپ جاتىر. حالىق ۇكىمەتتىڭ راقىمىنان ايىرىلىپ قالامىز با دەپ، "تەڭگە بەرەمىن" دەپ تەكسەرىس كەلسە، تاۋىعىن دا تىعىپ قويۋعا دايىن وتىر.

وسى ماسەلە بويىنشا پرەزيدەنت قاسىم-جومارت توقايەۆ:

"اتاۋلى الەۋمەتتىك كومەك الۋ ماقساتىندا كوپبالالى اتا-انالاردىڭ اجىراسۋى جيىلەپ كەتتى. ۇكىمەت پەن پرەزيدەنت اكىمشىلىگىنە الاياقتىققا توسقاۋىل قويۋ ءۇشىن سيفرلاندىرۋ جۇيەسىن ەنگىزۋدى جەدەلدەتۋ تاپسىرىلدى. ااك – بۇل مۇقتاج ازاماتتارعا بەرىلەتىن مەملەكەتتىڭ جاردەماقىسى"، - دەپ جازدى ءوز پاراقشاسىندا.

پرەزيدەنتتىڭ جازباسىنا ايگەرىم اتتى جەلى قولدانۋشىسى: "كوپبالالىلار بالاسىن اسىراۋعا اقشا تاپپاي اجىراسىپ جاتىر. ەلىمىزدەگى جەمقورلار ۇلكەن سومادا اقشا جەيدى. ال كوپبالالىلاردىڭ اجىراسۋىن الاياقتىق دەپ ويلايسىز با؟ قاتەلەسەسىز"، - دەپ پىكىر قالدىرعان.

دەمەك، سيفرلاندىرۋ ەنگىزىلگەن كۇنگە دەيىن، جاردەماقىعا مۇقتاج ەمەس حالىق الاياقتىق جولمەن اقشا الىپ وتىرا بەرمەك. بىر-بىرىمەن سول ءۇشىن اجىراسىپ جاتقان جاستاردىڭ ويىن بۇزعان دا وسى  – 21 مىڭ تەڭگە. «قازاننان قاقپاق كەتسە، يتتەن ۇيات كەتەدى» - دەپ قازاق بەكەر ايتپاعان. 

اتاۋلى الەۋمەتتىك كومەك الۋ ماقساتىندا كوپبالالى اتا-انالاردىڭ اجىراسۋى جيىلەپ كەتتى. ۇكىمەت پەن پرەزيدەنت اكىمشىلىگىنە الاياقتىققا توسقاۋىل قويۋ ءۇشىن سيفرلاندىرۋ جۇيەسىن ەنگىزۋدى جەدەلدەتۋ تاپسىرىلدى. ااك – بۇل مۇقتاج ازاماتتارعا بەرىلەتىن مەملەكەتتىڭ جاردەماقىسى.

— Qasym-Jomart Toqayev (@TokayevKZ) 30 مايا 2019 گ.

دايىنداعاندار: بەك بايتاس، مارجان سابەت