اعىمداعى جىلى وبلىستىڭ اگروونەركاسىپ كەشەن سۋبەكتىلەرىنىڭ ينۆەستيسيالىق سالىنىمدار كەزىندە تارتىلعان ينۆەستيسيا كولەمى بۇگىنگى كۇنگە 12 ميلليارد 444،2 ميلليون تەڭگەنى قۇرادى. وسىعان وراي وبلىستا جاڭا 515 تۇراقتى جۇمىس ورنى اشىلدى. اۋىل شارۋاشىلىعى ونىمدەرىن قايتا وڭدەۋ سالاسىندا 2018 جىلى جۇزەگە اسقان كەلەسى 12 الەۋەتتى ينۆەستيسيالىق جوبالار ءوڭىردىڭ ارنايى كارتاسىنا جانە جوبالىق باسقارۋ ورتالىعىنىڭ باقىلاۋىنا ەندى. ىسكە قوسىلعان جوبالار وڭدەلگەن ءونىمنىڭ يمپورتتىق ۇلەسىن الماستىرۋعا، قوسىلعان قۇنى جوعارى وتاندىق ءونىمنىڭ ەكسپورتتىق الەۋەتىن 2،5 ەسەگە ارتىرۋعا مۇمكىندىك بەرەدى.

  اتالعان جوبالاردان بولەك، 2019-2026 جىلدارى اگروونەركاسىپ كەشەن سۋبەكتىلەرىنىڭ ينۆەستيسيالىق سالىنىمدار كەزىندە كولەمى 111،6 ميلليارد تەڭگەنى قۇرايتىن ينۆەستيسيا تارتۋ كوزدەلۋدە. 2019 جىلى ىسكە اسىرىلاتىن ءىرى جوبالار اۋدانداردا كوپتەپ سانالادى. جۋالى اۋدانىندا «گامبۋرگ» ج ش س 1200 باسقا ارنالعان ءسۇت فەرماسى. جوبا قۇنى 1،2 ميلليارد تەڭگە. جىلدىق قۋاتتىلىعى 4،8 مىڭ توننا ءسۇت. كەرەكتى تولىق جابدىقتار گوللانديادا جاسالعان. قورداي اۋدانىندا «كazMeat» ج ش س – 8 000 باسقا ارنالعان بورداقىلاۋ الاڭى. جوبا قۇنى 1،5 ميلليارد تەڭگە. جىلدىق قۋاتتىلىعى 2،5 مىڭ توننا ءمۇيىزدى ءىرى قارا ەتى. سونىمەن قاتار، جامبىل اۋدانىندا ورنالاسقان «Danver-T» 120 گەكتار جىلىجاي قۇرىلىسى جانە ماۋسىمدىق كوكونىس ءوندىرىسى. جوبا قۇنى 3،1 ميلليارد تەڭگە. جىلدىق قۋاتتىلىعى 500 توننا كوكونىس. سونىمەن قاتار، «كازاگرو» ۇبح» اق ارقىلى قارجىلاندىرىلاتىن ينۆەستيسيالىق جوبالار اياسىندا 2017 جىلدان باستاپ بۇگىنگى كۇنگە دەيىن جالپى ينۆەستيسيالىق قۇنى 3،7 ميلليارد تەڭگەنىڭ 3 جوباسى قورداي، مەركى جانە مويىنقۇم اۋداندارىندا جۇزەگە اسىرىلۋدا. 

  بۇدان بولەك، جامبىل وبلىسىندا وڭدەۋشى كاسىپورىنداردى قولداۋ، ءوندىرىستى ۇلعايتۋ جانە جاڭا جۇمىس ورىندارىن اشۋ ماقساتىندا رەسپۋبليكالىق بيۋدجەتتەن 20 ميلليارد تەڭگە قاراستىرىلۋدا. اتالعان قاراجات جاڭا ينۆەستيسيالىق جوبالارعا ءونىمنىڭ جاڭا تۇرلەرىن وندىرۋگە دە بولىنەتىن بولادى.

دۋلات ايتباي