بۇگىنگى تاڭدا جامبىل وبلىسىندا 373 اۋىلدىق ەلدى مەكەننىڭ 199-ى ورتالىقتاندىرىلعان اۋىز سۋمەن قامتىلعان. ال، 171 اۋىل ورتالىقتاندىرىلماعان سۋمەن قامتىلىپ، 3 اۋىل تاسىمال سۋمەن قامتىلعان.
سونىمەن قاتار، جامبىل وبلىستىق ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسى اعىمداعى جىلى تاراز قالاسىندا 89،3، قاراتاۋ قالاسىندا 100، جاڭاتاس قالاسىندا 100 جانە شۋ قالاسىندا 60،0 پايىز حالىق ورتالىقتاندىرىلعان سۋمەن قامتىلعانىن مالىمدەدى.
2021 جىلى تاراز جانە شۋ قالالارىنىڭ تۇرعىندارىن 100 پايىز ورتالىقتاندىرىلعان اۋىز سۋمەن قامتۋ جوسپارلانعان. قالا جانە اۋدان باسشىلارى قامتىلماعان القاپتارعا جوبالار ازىرلەپ، وسى ناتيجەگە قول جەتكىزۋ ءۇشىن جۇمىستاردى ۇيىمداستىرۋلارى قاجەت. قازىرگى كەزدە ساراپتاما قاراۋىنداعى شۋ قالاسىنىڭ 7 مىڭنان استام حالىق تۇراتىن «قوسقۇدىق» القابىنىڭ سۋ بەرۋ جۇيەلەرى جوباسىنا وڭ قورىتىندىنى الۋ قاجەت ەكەن. ونىڭ قۇنى شاممەن 300،0 ميلليون تەڭگەنى قۇراپ وتىر. وسى جوبا ىسكە اسىرىلعان جاعدايدا شۋ قالاسى تۇرعىندارىنىڭ 77 پايىزى ورتالىقتاندىرىلعان اۋىز سۋمەن قامتىلادى. وتكەن جىلى اۋداندارداعى 19 نىساننىڭ قۇرىلىسى جانە 13 جوبالىق-سمەتالىق قۇجاتتامانىڭ ازىرلەنۋىنە بيۋدجەتتەن 8،6 ميلليارد تەڭگە ءبولىندى. ونىڭ ىشىندە 8 نىسان 2017 جىلدان بەرى وتپەلى بولىپ ەسەپتەلەدى. ال، 17 نىساننىڭ قۇرىلىسىنا رەسپۋبليكالىق بيۋدجەتتەن 7،5 ميلليارد تەڭگە، 2 نىساننىڭ قۇرىلىسىنا جانە 13 جوبالاۋ جۇمىستارىنا وبلىستىق بيۋدجەتتەن 1،1 ميلليارد تەڭگە بولىنگەن.
قازىرگى تاڭدا وڭىردە تۇرعىنداردى اۋىز سۋمەن قامتۋ قارقىن الۋدا. ماسەلەن، جامبىل اۋدانىنىڭ پريگورودنوە، توعىزتاراۋ اۋىلدارى، قورداي اۋدانىنىڭ اۋقاتتى اۋىلى، تالاس اۋدانىنىڭ ءقىزىلاۋىت اۋىلى، بايزاق اۋدانىنىڭ كەڭەس، اباي، مىرزاتاي، تەگىستىك اۋىلدارى، ت.رىسقۇلوۆ اۋدانىنىڭ لۋگوۆوە اۋىلى جانە شۋ اۋدانىنىڭ د.قونايەۆ اۋىلدارىنىڭ تۇرعىندارىنا اۋىزسۋ بەرىلگەن. ورتالىقتاندىرىلعان اۋىز سۋمەن قامتىلعان 199 اۋىلدىق ەلدى مەكەن ىشىندە تۇرعىندار سانى 362 مىڭ 729 ادام بولىپ وتىر. بۇل ورايدا وڭىردە اۋىلدارداعى اۋىز سۋ ماسەلەسى شەشىمىن تاۋىپ كەلەدى دەۋگە تولىق نەگىز بار. ايتالىق، 2019 جىلعا رەسپۋبليكالىق بيۋدجەتتەن تاراز قالاسىنىڭ سۋمەن قامتۋ سالاسى بويىنشا 2 جوباعا 650،0 ميلليون تەڭگە، ال اۋىلدىق ەلدى مەكەندەردى سۋمەن قامتۋعا 10 جوباعا 3440،2 ميلليون تەڭگە بولىنگەن. وسى جوبالارعا وبلىستىق بيۋدجەتتەن قوسىمشا قارجىلاندىرۋعا 10 پايىز كولەمىندە قاراجات قاراستىرىلعان. جىل سوڭىنا دەيىن جامبىل وبلىسىنىڭ اكىمى اسقار مىرزاحمەتوۆتىڭ تاپسىرماسىمەن وبلىستاعى 209 اۋىلدى ورتالىقتاندىرىلعان سۋمەن قامتۋ كوزدەلۋدە.
باسقارمانىڭ مالىمەتىنشە، قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ مينيسترلىگىنە 2019-2021 جىلدارى اۋىلدارعا اۋىز سۋ تارتۋدى قارجىلاندىرۋ ماقساتىندا بايزاق اۋدانى، سارىكەمەر اۋىلىنىڭ سۋمەن قامتۋ جۇيەلەرى جوباسى بويىنشا قۇنى 3،8 ميلليارد تەڭگە، سارىسۋ اۋدانىنىڭ يگىلىك جانە ءوندىرىس اۋىلدارىنا 705،9 ميلليون تەڭگە، تالاس اۋدانى مايتوبە اۋىلىنا 331،5 ميلليون تەڭگە، مويىنقۇم اۋىلىنىڭ قىلىشباي اۋىلى 413،8 ميلليون تەڭگە سۋمەن قامتۋ جۇيەلەرى قۇرىلىسى جوبالارىنا بيۋدجەتتىك ءوتىنىم تاپسىرىلىپ، اعىمداعى جىلى جۇمىستاردى باستاۋعا 4 اۋىلعا 723،5 ميلليون تەڭگە بولۋگە قولداۋ تاپقان.
دۋلات ايتباي
پىكىر قالدىرۋ