3 ماۋسىمدا قازاقستان استاناسى نۇر-سۇلتان قالاسىندا ءبىر توپ (ناقتى سانى بەلگىسىز، شامامەن 40-قا جۋىق) كوپ بالالى، جالعىزباستى انالار بيلىككە نارازىلىعىن ايتىپ، اقوردانىڭ الدىنا جينالدى دەپ جازادى Qamshy.kz اقپارات اگەنتتىگى.

ولاردىڭ نارازىلىققا شىعۋىنا باستى سەبەپ – باسپانا ماسەلەسىن شەشە الماي جۇرگەندىگى.

جينالعان انالار قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ، قازىرگى پرەزيدەنتى قاسىم-جومارت توقايەۆتىڭ جانە پرەمەر-مينيستر اسقار ءماميننىڭ شىعۋىن تالاپ ەتۋدە. الايدا نارازى انالاردىڭ تالابىن تىڭداۋعا جوعارىدا اتالعان لاۋازىمدى تۇلعالاردىڭ ەشقايسىسى شىققان جوق. نارازى انالار اقوردادان جوعارىدا اتتارى اتالعان لاۋازىمدى تۇلعالار شىقپاعان سوڭ ۇكىمەت ءۇيىنىڭ الدىنا باردى. ولارمەن تىلدەسۋگە پرەمەر-مينيستردىڭ ورىنباسارى گۇلشارا ءابدىحالىقوۆا،  ەڭبەك جانە الەۋمەتتىك قورعاۋ ءمينيسترى بەردىبەك ساپاربايەۆ جانە قالا اكىمى باقىت سۇلتانوۆ شىعىپ، تالاپ-ارىزدارىن تىڭداۋدا. ولار نارازى انالاردى عيمارات ىشىنە كىرىپ سويلەسۋگە شاقىردى، ءبىراق نارازى توپ ىشكە كىرۋدەن باس تارتىپ، "ماسەلەمىزدى وسى جەردە شەشىپ بەرىڭدەر"، "اكىمدىك عيماراتىنا بارىپ شارشادىق" دەپ وتىر.

ساعات 10.00-دە باستالعان نارازىلىق ءالى دە جالعاسىپ جاتىر. نارازى انالار اقوردانىڭ الدىنداعى الاڭدا اشتىق جاريالادى. ولاردى ارنايى پوليسيا جاساعى قورشاپ العان. پوليسيا وكىلدەرىنىڭ سانى جينالعان انالاردان دا كوپ. ولار انالار وتىرعان الاڭدى قورشاپ سىرتتان باسقا ادامداردى كىرگىزبەي تۇر. اشتىق جاريالاعان انالاردىڭ ءبىرى ەسىنەن تانىپ قالدى، ونى جەدەل جاردەم الىپ كەتتى.

نارازى انالار "باسپانا، باسپانا، باسپانا" دەپ ۇرانداپ، قازاقستاننىڭ ءانۇرانىن ايتۋدا. ولارمەن تىلدەسۋگە شىققان لاۋازىمدى تۇلعالاردىڭ بارلىعى عيماراتىنا قايتا كىردى. تەك پوليسيا وكىلدەرى عانا ولاردى قورشاپ تۇر.

ۆيدەو ازاتتىق راديوسىنان الىندى