31 مامىردا ق ر پرەمەر-مينيسترى اسقار مامين ماڭعىستاۋ وبلىسىنا جۇمىس ساپارىمەن بارىپ، وندا ق ر تۇڭعىش پرەزيدەنتى – ەلباسى نۇرسۇلتان نازاربايەۆ العا قويعان مىندەتتەردىڭ جۇزەگە اسىرىلۋىمەن جانە مەملەكەت باسشىسى قاسىم-جومارت توقايەۆتىڭ بيىلعى ءساۋىر ايىندا جۇمىس ساپارى بارىسىندا ءوڭىردى الەۋمەتتىك-ەكونوميكالىق دامىتۋ بويىنشا بەرگەن تاپسىرمالارىنىڭ ورىندالۋىمەن تانىستى. ق ر ۇكىمەتىنىڭ باسشىسى ءوڭىر اكتيۆىنىڭ قاتىسۋىمەن جۇمىس كەڭەسىن وتكىزدى. ماڭعىستاۋ وبلىسىنىڭ اكىمى ە. توعجانوۆ ەلىمىزدىڭ الەۋمەتتىك-ەكونوميكالىق دامۋىن قامتاماسىز ەتۋ بويىنشا قابىلدانىپ جاتقان شارالار تۋرالى باياندادى. بيىلعى 4 ايدىڭ قورىتىندىسى بويىنشا وڭىردە ونەركاسىپتىك ءونىم ءوندىرىسىنىڭ كولەمى 943،6 ملرد تەڭگەنى قۇرادى، سونىڭ ىشىندە 20،1%-عا ماشينا جاساۋ ءوسىمىن قامتاماسىز ەتۋ ەسەبىنەن بولدى. نەگىزگى كاپيتالعا ينۆەستيسيالار 121،8 ملرد تەڭگەنى قۇرادى. جالپى العاندا، بيىل ءوڭىردىڭ ينۆەستيسيالىق قورجىنى 1،6 ترلن تەڭگەگە 44 ينۆەستيسيالىق جوبادان تۇرادى، ولاردىڭ ىشىندە 67 ملرد تەڭگەگە 22 جوبانى ىسكە اسىرۋ 2019 جىلعا جوسپارلانعان. كەڭەس بارىسىندا ۇلتتىق ەكونوميكا ۆيسە-مينيسترى ە. الپىسوۆ، يندۋستريا جانە ينفراقۇرىلىمدىق دامۋ ۆيسە-مينيسترى ب. قامالييەۆ، ەنەرگەتيكا ۆيسە-مينيسترى م. مىرزاعالييەۆ «اۋىل – ەل بەسىگى» جوباسىن ىسكە اسىرۋ، وڭىردە كولىك ينفراقۇرىلىمىن جانە مۇناي-گاز كەشەنىن دامىتۋ تۋرالى باياندادى. «ەلباسى ماڭعىستاۋ وبلىسىنىڭ دامۋىنا ەرەكشە كوڭىل بولەدى»، — دەپ اسقار مامين، ق ر تۇڭعىش پرەزيدەنتىنىڭ تاپسىرماسى بويىنشا «نۇرلى جول» باعدارلاماسى بويىنشا ءبىرقاتار ستراتەگيالىق ماڭىزى بار ءىرى ينفراقۇرىلىمدىق جوبالار ىسكە اسىرىلعانىن اتاپ ءوتتى، قازىرگى تاڭدا اتالعان جوبالار ەلىمىزدىڭ ترانزيتتىك جانە ەكسپورتتىق الەۋەتىن دامىتۋعا ەلەۋلى تۇردە ىقپال ەتۋدە. مەملەكەت باسشىسى قاسىم-جومارت توقايەۆتىڭ تاپسىرمالارىن ورىنداۋ اياسىندا وڭىردە جاڭاوزەن قالاسىن الەۋمەتتىك-ەكونوميكالىق دامىتۋدىڭ 2025 جىلعا دەيىنگى كەشەندى جوسپارىن ىسكە اسىرۋ جۇمىستارى باستالدى. 67 ءىس-شارا جوسپارلانعان، سونىڭ ناتيجەسىندە 16،3 مىڭ جۇمىس ورنى اشىلادى. كەڭەس قورىتىندىسىن شىعارا وتىرىپ، اسقار مامين ماڭعىستاۋ وبلىسى قازاقستاننىڭ باتىس قاقپاسى ەكەنىن ايتىپ، ونەركاسىپ جانە كولىك-لوگيستيكا سالالارىن، ءتۋريزمدى ودان ءارى دامىتۋدىڭ قاجەتتىگىن اتاپ ءوتتى. ق ر پرەمەر-مينيسترى اسقار مامين كاسپيي تەڭىزىنىڭ جاعالاۋىندا جاڭا جوبا سالىناتىن جەردە تاس سالۋ راسىمىنە قاتىستى. اكۆاپاركى، سپورت الاڭدارى مەن كونگرەسس-حولى بار 600 ءنومىر 2000 ورىنعا ارنالعان تۋريستىك كەشەندى 2020 جىلدىڭ شىلدە ايىندا پايدالانۋعا بەرۋ جوسپارلانعان. بۇل جوبانى ىسكە اسىرۋ وبلىستا ءتۋريزمنىڭ دامۋىنا زور سەرپىن بەرەدى، اتالعان جوبادا 2000-عا جۋىق جۇمىس ورنىن اشۋ كوزدەلگەن. كاسپيي تەڭىزىنىڭ جاعالاۋى ءتۋريزمدى دامىتۋدىڭ ازىرلەنگەن مەملەكەتتىك باعدارلاماسىنا سايكەس قازاقستاننىڭ باسىم تۋريستىك اۋماقتارىنىڭ ۇزدىك وندىعىنا كىرەدى. وڭىردە جاڭا 45 قوناق ءۇي كەشەنىن سالۋ ءۇشىن جەكە ينۆەستيسيالار تارتۋ جۇمىستارى جۇرگىزىلىپ جاتىر. سونىمەن قاتار، ق ر ۇكىمەتىنىڭ باسشىسىنا جۇمىس ساپارى بارىسىندا ينۆەستيسيالار كولەمى $1،8 ملرد استام بولاتىن «اقتاۋ تەڭىز پورتى» اەا ايماعىندا مەتانول مەن ولەفين ءوندىرۋ زاۋىتىن سالۋ جوسپارلارى تانىستىرىلدى. جوبا يمپورتتى الماستىرۋعا باعىتتالعان، زاۋىتتا گاز مەتانولعا قايتا وڭدەلەدى جانە 40-تان استام ءونىم اتاۋىن شىعارۋعا مۇمكىندىك بەرەتىن باسقا دا قۇراۋىشتار شىعارىلادى.