نۇر-سۇلتاندا بيلىكتەن باسپانا ماسەلەسىن شەشىپ بەرۋدى تالاپ ەتكەن كوپ بالالى انالاردىڭ نارازىلىعى ءالى دە جالعاسىپ جاتىر دەپ جازادى Qamshy.kz اقپارات اگەنتتىگى. 

بيلىككە نارازىلىقتارىن 10.00-دە باستاعان انالار اقوردانىڭ الدىنداعى اشىق الاڭدا اشتىق جاريالاعان بولاتىن. نارازى انالاردىڭ تالابىن تىڭداۋعا كەلگەن قالا اكىمى باقىت سۇلتانوۆ، ەڭبەك جانە الەۋمەتتىك قورعاۋ ءمينيسترى بەردىبەك ساپاربايەۆ، پرەمەر-مينيستردىڭ ورىنباسارى گۇلشارا ءابدىحالىقوۆا انالاردى اكىمدىك عيماراتىنا كىرىپ سويلەسۋگە شاقىردى. ءبىراق انالار بيلىك وكىلدەرىنىڭ بۇل ۇسىنىسىنا كەلىسە قويعان جوق. ولار «اكىم مەن ءمينيستردىڭ ۋادەسىنەن شارشادىق» دەپ وتىر.

"ءبىزدىڭ باستى ماسەلەمىز – باسپانا"

نارازى انالار: "ءبىزدىڭ ءبىر عانا ماسەلەمىز بار. ول – باسپانا. باسپانامىز بولسا، بىزدەن باي، بىزدەن باقىتتى ادام جوق. ءبىز تەگىن باسپانا سۇرامايمىز. بىزگە ايىنا 30-40 مىڭ تەڭگە تولەيتىندەي ەتىپ ءۇي بەرىڭدەر" دەدى.

"ءبىز ەش جەردە تۇرمايمىز، دالادا ءجۇرمىز"

انالاردان بولەك، الاڭدا باسپانا سۇراپ بالالار دا ءجۇر. جۋرناليستەرگە ءوزىن جانۇزاق بەرىكپىن دەپ تانىستىرعان جاسى 10-11-لەر شاماسىنداعى ۇلبالا وتباسىندا 10 بالا بارىن، ءقازىر ءۇيسىز، كۇيسىز، تۋىسقاندارىن پانالاپ جۇرگەندەرىن ايتىپ، كوز جاسىن توكتى.

"ءبىز ەش جەردە تۇرمايمىز، دالادا ءجۇرمىز. كۇندە ءار جاقا بارامىز. بىزگە ءۇي بەرىڭىزدەرشى، باسقا ەش نارسە سۇرامايمىز»، - دەگەن ول اناسىنىڭ قۇربىسىنىڭ ۇيىندە تۇرىپ جاتقانىن ايتتى.

ساعات 10.00-دە جينالعان انالار جەتى ساعاتقا جۋىق ۋاقىت اقوردانىڭ الدىنادا تۇرىپ الدى. ولارعا باسقا دا كوپ بالالى انالار كەلىپ قوسىلىپ جاتتى. ءبىراق ارنايى پوليسيا جاساعى انالار تۇرعان اۋماقتى قورشاپ، باسقا ادامداردى وتكىزبەۋگە تىرىستى. ءبىراق كوپتەگەن ادامدار كەلىپ، الاڭدا تۇرعان انالارعا سۋ جانە تاماق اكەلىپ جاتتى.

ساعىنتايەۆ سابىرعا شاقىردى

الاڭنان كەتپەي تۇرىپ العان انالارعا ساعات 17.00 شاماسىندا قازاقستان پرەزيدەنتى اكىمشىلىگىنىڭ جەتەكشىسى باقىتجان ساعىنتايەۆ كەلىپ سابىرعا شاقىردى. "سابىر ساقتاي المايمىز" دەپ ساعىنتايەۆتىڭ سوزىنە قۇلاق اسپاعان انالار اقىرى ماسەلەنى ۇكىمەت ۇيىندە وتىراپ تالقىلاۋعا كەلىستى. ءقازىر ساپاربايەۆ، سۇلتانوۆ، ساعىنتايەۆ ۇشەۋى ۇكىمەت ءۇيىنىڭ ىشىندە انالاردىڭ ءارقايسىنىڭ ارىزىن تىڭداپ وتىر.