قازاقستان پرەزيدەنتى قاسىم-جومارت توقايەۆ «روسسيا 24» تەلەارناسىنىڭ ءجۋرناليسى اندرەي كوندراشوۆقا بەرگەن سۇحباتىندا، قاراماعىنداعى ادامدارعا WhatsApp ارقىلى تاپسىرما بەرەتىنىن مالىمدەدى دەپ حابارلايدى Qamshy.kz اقپارات اگەنتتىگى.

"الەۋمەتتىك جەلىلەردى پايدالانۋ مەن ءۇشىن تاڭسىق ەمەس، مەن الەۋمەتتىك جەلىلەردە جۇمىس ىستەيمىن. شىندىعىنا كەلگەندە كەيبىر تاپسىرمالاردى WhatsApp ارقىلى بەرەتىن كەزدەرىم دە بولادى. مۇمكىن بۇنى قاۋىپسىزدىك جاعىنان الىپ قارايتىن بولساڭىز، دۇرىس ەمەس تە شىعار. ءبىراق ىڭعايلى ءارى جىلدام"، - دەدى پرەزيدەنت.

ەستەرىڭىزگە سالا كەتسەك، قاسىم-جومارت توقايەۆ قازاقستان ۇكىمەتىندە العاشقىلاردىڭ ءبىرى بولىپ Twitter الەۋمەتتىك جەلىسىندە ءوزىنىڭ جەكە پاراقشاسىن اشقان بولاتىن.

"ءيا، مەن Twitterء-دى بۇۇ-دان الىپ كەلدىم. ول جەردە Twitter-دە جەكە پاراقشاڭدى جۇرگىزۋ كەرەك دەگەن شەشىم شىققان. سول سەبەپتى مەن حالىقپەن بايلانىستىڭ وسى تۇرىنە قوسىلدىم. Twitter دەگەنىمىز نە؟ بۇل ءىس جۇزىندەگى جەكە تەلەگراف اگەنتتىگى. مىسالى، بۇگىن مەن بىر-ەكى جول جازبا جاريالادىم. ىشكى ىستەر مينيسترلىگىنە وبلىستاردىڭ بىرىندەگى پوليسيا باستىعىنىڭ ورىنسىز قىلىعىنا بايلانىستى قالىپتاسقان جاعدايمەن كۇرەسۋدى تاپسىردىم. قىزمەتتىك تەرگەۋ امالدارى تاعايىندالىپ، قاتاڭ جازا قولدانىلاتىن بولادى. تۆيتتەرگە جازبا قالدىرىپ، ناقتى تاپسىرمالار بەرىلگەننەن كەيىن جانە وعان بارلىعى كۋا بولىپ وتىرعاندا مەن نەگە بىرەۋگە حابارلاسىپ، قانداي دا ءبىر ءوتىنىش ايتۋىم كەرەك؟"، - دەدى توقايەۆ.

سونىمەن قاتار جۋرناليستكە بەرگەن سۇحباتىندا قاسىم-جومارت توقايەۆ پرەزيدەنت بولعاننان كەيىن ۇسىنىس بويىنشا Instagram-عا تىركەلگەنىن ايتتى.