اقتاۋداعى نازاربايەۆ زياتكەرلىك مەكتەبىنىڭ قازاق ءتىلى مەن ادەبيەتى ءپانىنىڭ ءمۇعالىمى ايگۇل ايتان جانە نەمىس ءتىلى ءپانىنىڭ ءمۇعالىمى اسەل بايمۇحانبەتوۆا، 11-سىنىپ وقۋشىلارى فاريدا وسپان، نەسىبەلى التىباي، امينا ءابىل مامىردىڭ 9-ى مەن 13ء-ى ارالىعىندا گەرمانيانىڭ برەمەن قالاسىندا وتكەن ەكولوگيا تاقىرىبىنا ارنالعان V حالىقارالىق جاستار كونفەرەنسياسىنا قاتىسىپ قايتتى. كونفەرەنسيا قاتىسۋشىلارى ماڭعىستاۋ وڭىرىندەگى تاماشا تابيعاتى بار ءتۇپقاراعان اۋدانىندا ءتۋريزمدى دامىتا وتىرىپ، ەكوتۋريزمدى دامىتۋدى ۇسىندى.

ماسكەۋدەگى گوتە ۋنيۆەرسيتەتىنىڭ قولداۋىمەن كونفەرەنسياعا الەمنىڭ 11-ەلىنەن 13 كوماندا قاتىسقان. جيىن قوناقتارى ەكولوگيالىق پروبلەمالاردى كوتەرىپ، ولاردىڭ شەشۋ جولىن نەمىس تىلىندە قورعادى. ەڭ الدىمەن پروبلەمالارعا ارنالعان پوستەر-سەسسيا وتسە، ەكىنشى كەزەڭدە قاتىسۋشىلار ءوز ۇسىنىستارىن پرەزەنتاسيا ارقىلى ءبىلدىردى. ايتا كەتەيىك، ماڭعىستاۋلىق زياتكەرلەر قازاقستاننان بارعان جالعىز كوماندا.

وقۋ جىلىنىڭ باسىندا مەكتەپتىڭ عىلىمي جۇمىس جونىندەگى ۇيلەستىرۋشىلەرى عىلىمي جوبالار مەن كونفەرەنسيالاردىڭ سيكلوگرامماسىن جاساقتاعان بولاتىن. وسى سيكلوگراممادان ءوز مۇمكىندىگىم مەن زەرتتەۋ جۇمىسىمىزعا قاراي اتالعان كونفەرەنسيا جايلى ءبىلىپ، قاتىسىپ كورۋدى شەشتىك. باستى ماسەلە جوبا نەمىس تىلىندە قورعالۋى ءتيىس بولدى. بۇل تۇرعىدان وقۋشىلارىمىزدىڭ نەمىس ءتىلى ۇيىرمەسىنە قاتىسۋىنىڭ ارقاسىندا جيناعان ءبىلىمى مەن ءپان ءمۇعالىمى اسەل بايمۇحانبەتوۆانىڭ كومەگى كوپ ءتيدى، - دەيدى جوبا جەتەكشىسى ايگۇل ايتان.

زياتكەرلەر ءتۇپقاراعانداعى كورىكتى جەرلەردە ەكوتۋريزمدى دامىتۋ ماسەلەسىمەن بىرنەشە ايدان بەرى اينالىسىپ كەلەدى. ولار قاپى، تامشالى، اقەسپە، سۇلتان ءۇپى، تۇلكىباس، ساۋرا، فورت-شيەۆچەنكو، سارتاس، شاقپاق اتا  سەكىلدى كورنەكتى ورىندار بەلگىلەنگەن مارشرۋتتىق كارتا سىزىپ، اتالعان جەرلەردىڭ توپىراعىنىڭ، سۋىنىڭ قۇنارلىلىعىن زەرتتەگەن. زەرتتەۋ جۇمىسىن قورىتىندىلاي كەلە، مارشرۋتتىق كارتاعا ەنگەن وڭىرلەردە تابيعي قالپىن ساقتايتىن تۋريستىك ورتالىقتار جاساۋدى ۇسىنىپ وتىر.

ايتا كەتەيىك، 2018-2019 وقۋ جىلىنان باستاپ، زياتكەرلىك مەكتەپ وقۋشىلارى نەمىس، كارىس، فرانسۋز، جۇڭگو تىلدەرىن ەكىنشى شەت ءتىلى رەتىندە مەڭگەرە باستاعان ەدى.