ىشكى ىستەر ءمينيسترى ەرلان تۇرعىمبايەۆ "حان شاتىر" ساۋدا-ويىن-ساۋىق كەشەنى باسسەيىنىندە كوز جۇمعان ون جاسار قىز بالانىڭ وقيعاسى تۋرالى مالىمدەمە جاسادى دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساي وتىرىپ.
"كەشە قىلمىستىق ءىس قوزعالدى. شىن مانىندە، ول – مەكتەپ اكىمشىلىگى ۇيىمداستىرعان بالالاردىڭ جازعى لاگەرى. كەشە 30 بالا باسسەيندە ءجۇزىپ، قايعىلى وقيعا ورىن الدى، قىز سۋعا كەتتى. ءقازىر قۇتقارۋشىنىڭ قاي جەردە جۇرگەنىن، نەگە دەر كەزىندە شارا قولدانباعانىن انىقتاپ جاتىرمىز. ۇيىمداستىرۋشىلاردىڭ جاۋاپكەرشىلىگى تۋرالى ماسەلە وتە كوپ، لاگەردى جاساقتاپ، قاۋىپسىزدىككە ءمان بەرمەگەن سەكىلدى."،- دەدى مينيستر ۇكىمەت وتىرىسىنان كەيىن جۋرناليستەردىڭ سۇراقتارىنا جاۋاپ بەرە وتىرىپ.
ونىڭ ايتۋىنشا، بەينەباقىلاۋ كامەرالارىنىڭ جازبالارى زەرتتەلىپ، سوت-مەديسينالىق ساراپتاما جۇرگىزىلۋدە. ءبىلىم جانە عىلىم ءمينيسترى كۇلاش شامشيدينوۆا بعم قىزمەتكەرلەرىنىڭ وقيعا ورنىندا بولعانىن حابارلادى.
"بالالاردى جۇزۋگە ۇيرەتۋدى ۇيىمداستىرۋ بويىنشا بعم مەن ءىىم بۇيرىعى بار. مۇنداي جۇمىستار جۇرگىزىلۋدە. جازعى لاگەرلەردە جۇمىس ىستەيتىن ادامدارعا كەلەتىن بولساق، ءاربىر ءمۇعالىم بالالاردىڭ قاۋىپسىزدىگى ءۇشىن جاۋاپتى، سوندىقتان ولار وقۋدان وتەدى. مەكتەپ لاگەرلەرى بۇرىنعى رەجيمدە جۇمىس ىستەيتىن بولادى. قاتاڭدىققا كەلسەك، ءبىز ادامداردى جينادىق، تاعى دا بۇيرىقتار قالاي بولۋى كەرەكتىگىن تۇسىندىردىك"، - دەدى مينيستر.
نۇر سۇلتان قالاسىندا 3-ماۋسىم كۇنى "حان شاتىر" ساۋدا-ويىن-ساۋىق ورتالىعىنىڭ باسسەينىندە ون جاستاعى قىز سۋعا باتىپ كەتتى. ول № 10 ورتا مەكتەپتە ءبىرىنشى سىنىپتى ءبىتىرىپ، كوپ بالالى وتباسىندا ۇلكەن بالا بولعان. بالا باسسەينگە لاگەر توبىمەن بارعان.
پوليسيا "بالالاردىڭ ءومىرى مەن دەنساۋلىعىنىڭ قاۋىپسىزدىگىن قامتاماسىز ەتۋ جونىندەگى مىندەتتەردى تيىسىنشە ورىنداماۋ" قىلمىستىق كودەكسىنىڭ 141-بابى بويىنشا ءىستى تەرگەيدى.
اۋدارعان: بەك بايتاس
پىكىر قالدىرۋ