دۇنيەجۇزىلىك دەنساۋلىق ساقتاۋ ۇيىمىنىڭ باستاماسىمەن جىل سايىن تەمەكىگە قارسى كۇرەس كۇنىنە وراي ۇيىمداستىرىلاتىن ءداستۇرلى شارا بيىل «تەمەكى جانە وكپە اۋرۋلارى» تاقىرىبىنا ارنالدى دەپ حابارلايدى Qamshy.kz اقپارات اگەنتتىگى الەۋمەتتىك مەديسينالىق ساقتاندىرۋ قورىنىڭ باسپا ءسوز قىزمەتىنىڭ مالىمەتىنە سۇيەنىپ. 

شىلىمقورلىق – الەمدەگى ەڭ ۇلكەن زياندى ادەتتەردىڭ ءبىرى. قازىرگى تاڭدا الەمدەگى ءار ءتورتىنشى ەركەك پەن ءار جيىرماسىنشى ايەل نيكوتينگە تاۋەلدى.

دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، جىل سايىن الەمدە 7 ميلليون ادام تەمەكى سالدارىنان كوز جۇمادى ەكەن. سونىڭ 890 مىڭعا جۋىعى وزگەلەر شەككەن شىلىمنىڭ تۇتىنىنە ۋلانعاندار. ياعني، ءپاسسيۆتى شىلىمقورلىق تا ءقاۋىپسىز ەمەس. ول – جۇرەك-قان تامىرى، جۇرەكتىڭ يشەميالىق اۋرۋى، وكپە، وڭەش، اسقازان وبىرى سىندى ت.ب. اۋرۋلاردىڭ بىردەن-بىر سەبەپكەرى.

رەسمي ستاتيستيكاعا سۇيەنسەك، ءولىم-جىتىم جاعىنان العاشقى ورىندا تۇرعان جۇرەك-قان تامىرى اۋرۋلارى، تىنىس الۋ ورگاندارى اۋرۋلارى مەن قاتەرلى ىسىكتىڭ قاي-قايسىسى دا شىلىمقورلىق سالدارىنان بولاتىن دەرتتەر.

نۇرسۇلتان قالاسىنداعى ونكولوگيالىق اۋرۋلاردىڭ ەلەكتروندى تىزبەسىنىڭ 2019 جىلدىڭ 1 ماۋسىمىنداعى دەرەكتەرى بويىنشا، وڭەش وبىرىمەن – 95 ناۋقاس تىركەلىپ، 1-ەۋى قايتىس بولعان، اسقازان وبىرىمەن – 110 ناۋقاس تىركەلىپ، 18ء-ى قايتىس بولعان، وكپە وبىرىمەن – 345 ناۋقاس تىركەلىپ، 46-سى قايتىس بولعان. بايقاپ وتىرعاندارىڭىزداي، نەگىزىنەن تەمەكى شەگۋ سالدارىنان بولاتىن وكپە وبىرىنان زارداپ شەگۋشىلەر سانى جوعارى.

شىن مانىندە، «ەگەر ىشكى ورگانداردى جىل سايىن تەكسەرىپ وتىراتىن بولسا مۇنىڭ الدىن الۋعا بولار ەدى» دەيدى ماماندار. تەمەكى شەگەتىندەر ءۇشىن جۇرەك پەن وكپەنى تۇراقتى باقىلاۋدا ۇستاۋدىڭ ماڭىزى زور. ونىڭ ۇستىنە، مەملەكەت حالىققا جاردەم رەتىندە كەپىلدەندىرىلگەن تەگىن مەديسينالىق كومەك پاكەتىن ۇسىنادى. اتالعان پاكەتكە جالپى پراكتيكا دارىگەرىنىڭ قابىلداۋى مەن كونسۋلتاسياسى، كوزدىڭ كورۋ قابىلەتى مەن كوز قىسىمىن تەكسەرۋ، قانداعى حولەستەرين، گليۋكوزا دەڭگەيىن تەكسەرۋ ءۇشىن قان تاپسىرۋ، ەلەكتروكارديوگرامما، فليۋوروگرافيا، سپيروگرافيا سىندى قىزمەتتەر كىرەدى. ورگانيزمدە شىلىمنىڭ سالدارىنان بولىپ جاتقان وزگەرىستەر مەن اۋىتقۋلاردى وسى پروسەدۋرالار ارقىلى ەرتەرەك انىقتاۋعا بولادى.

«2019 جىلى نۇرسۇلتان قالاسىنداعى دەنساۋلىق ساقتاۋ مەكەمەلەرىن قارجىلاندىرۋعا قازىنادان 90،7 ملرد تەڭگە ءبولىندى. ونىڭ 13،6 ملرد تەڭگەسى ەمحانالىق-امبۋلاتورلىق كومەككە باعىتتالادى، نەگىزىنەن پروفيلاكتيكالىق شارالارعا دەن قويىلماق.

وعان قوسا، تەگىن مەديسينالىق كومەكتى مەملەكەتتىك قانا ەمەس، جەكە مەنشىك كلينيكالار دا كورسەتەدى. بيىل مەملەكەتتىك تاپسىرىستى ورىنداپ جاتقان 93 مەديسينا ۇيىمىنىڭ 58ء-ى – جەكە مەنشىك. 2018 جىلمەن سالىستىرعاندا جەكەمەنشىك كلينيكالار سانى 9-عا كوبەيگەن»، - دەيدى الەۋمەتتىك مەديسينالىق ساقتاندىرۋ قورى نۇرسۇلتان قالاسى بويىنشا فيليالىنىڭ ديرەكتورى نۇرلىبەك قابدىقاپاروۆ.

مەملەكەتتىك تاپسىرىس شەڭبەرىندە كورسەتىلەتىن كەپىلدەندىرىلگەن مەديسينالىق كومەكتى قازاقستاندا تۇراتىن ءار ازامات پايدالانا الادى. بيۋدجەت قاراجاتى ەسەبىنەن پروفيلاكتيكالىق، دياگنوستيكالىق جانە ەمدىك قىزمەتتەر   كورسەتىلەدى. سوندىقتان، تۇرعىندارعا ايتارىمىز: دەنساۋلىقتارىڭىزدى ۋاقىتىلى تەكسەرتىپ تۇرىڭىزدار، اۋرۋدى ەمدەگەننەن الدىن العان وڭاي. ءوز دەنساۋلىقتارىڭىز – ءوز قولدارىڭىزدا!