وزگەرۋ كەرەك، وزگەرتۋ كەرەك!
اشىلىپ اسپان، ءسۇيىلسىن تۇنەك.
قورىقپاۋ كەرەك، قايمىقپاۋ كەرەك!...
"جۇيە" — سوڭعى جىلدارداعى ساياسي ءان. كەشەدەن بەرى تالقىلاۋعا تۇسكەن ءاننىڭ ورىنداۋشىسى — مارحابا ءسابي. مارحابا قازاقستاندىق شوۋ-بيزنەستە "ۇنايدى ماعان" انىمەن تانىمال بولدى دەسەك، قاتەلەسپەيتىن شىعارمىز. سونداي-اق ءوز تىڭدارمانىن تاپقان "ايالداما"، "عانا" اندەرى دە بار. ەرەكشە ءانشى باسقا انشىلەردەن مۋزىكالىق جانرى ارقىلى دارالانادى. ەندى سايلاۋدان بىرنەشە كۇن بۇرىن "جۇيە" دەپ اتالاتىن ساياسي ءانىن جارىققا شىعاردى. Qamshy.kz اقپارات اگەنتتىگى مارحابا سابيمەن سۇحباتتاستى.
— مارحابا، كۇنى كەشە جارىققا شىعارعان ءانىڭىز قىزۋ تالقىلانۋدا. جالپى بۇل كىمنىڭ يدەياسى؟ ساياسي استارى بار ءاندى شىعارۋعا قانداي جايت تۇرتكى بولدى؟ مۇنداي ءاندى شىعارۋداعى ماقساتىڭىز نە؟
— بۇل ءاندى شىعارۋعا ءوز كوزقاراسىمىز سەبەپ بولدى. تاڭەرتەڭ ۇيدەن شىققاننان باستاپ قاتە جۇيەنىڭ سەبەپ-سالدارىن ءوز كوزىڭمەن كورەسىڭ. سوندىقتان وزدىگىنەن تۋىنداعان يدەيا بولدى. قازىرگى كەزەڭمەن ۇندەس ءبىر ءان بولۋى كەرەك دەپ شەشتىم.
— بۇل ءاندى شىعارۋ بارىسىندا اتا-اناڭىز قارسى بولدى ما؟ ولارعا قالاي ءتۇسىندىردىڭىز؟
— اتا-انام مەنى قولدايدى.
— ءانىڭىز ارقىلى «قاتە جۇيە، قىڭىر جۇيە» دەپ ەلدەگى كەلەڭسىزدىكتەردى اشىق ايىپتايسىز. ءوزىڭىز قانداي ادىلەتسىزدىكتەرگە تاپ بولدىڭىز؟
— جۇيەنىڭ سالقىنى بارىمىزگە تيەدى. قالاساق تا، قالاماساق تا وسى جۇيەنىڭ اياسىندا ءومىر ءسۇرىپ جاتىرمىز. ءبىراق ۇندەمەي، كونىپ، كەلىسىپ وتىرا بەرۋگە بولمايدى. ءبىزدىڭ ەل جاقسى قوعامعا، جاقسى ومىرگە لايىق.
— قولىڭىزدا بيلىك بولسا، قانداي وزگەرىستەردى جاسايتىن ەدىڭىز؟
— مەن ونەر ادامىمىن. دۇرىس قوعامدا قاتارداعى ادام رەتىندە ءومىر سۇرگىم كەلەدى.
— ءسىزدىڭ ءانىڭىزدى «كەزەكتى حايپ» دەپ سىنعا الاتىندارعا ايتار جاۋابىڭىز؟
— ءوز دەڭگەيىمدە دۇرىس كوزقاراسىم ءۇشىن كۇرەسىپ تازا جۇرگەن اداممىن. حايپ دەپ قابىلدايتىن ادامدار كوپ بولادى دەپ ويلامايمىن.
ونەر اينالاداعى بولىپ جاتقان دۇنيەلەردىڭ ايناسى بولۋى كەرەك. سول كەزدە شىنايى بولادى.
— سايلاۋعا باراسىز با؟ كىمگە داۋىس بەرەسىز، الدە بايكوت جاريالايسىز با؟
— داۋىس بەرۋگە بارا قالسام، ءامىرجان قوسانوۆقا داۋىس بەرەمىن. بارماۋىم دا مۇمكىن. ويتكەنى حالىقتى بىرنەشە توپقا ءبولىپ جىبەرەتىن تۇسىنىكسىز جاعداي بولىپ جاتىر. قالاي بولعاندا دا بۇگىنگى جۇيەنىڭ وزگەرگەنىن قالايمىن.
— قازىرگى كانديداتتاردان بولەك كىمدى پرەزيدەنت بولۋعا لايىق دەپ ەسەپتەيسىز؟
— ەلىمىزدى شىنىمەن وزگەرتەتىن ءبىر "جاسىلسكييدى" كۇتەمىن.
— سايلاۋدان كەيىنگى قازاقستاندى قالاي ەلەستەتەسىز؟
— ءبارى حالىقتىڭ بەلسەندىلىگىنە بايلانىستى دەپ ەسەپتەيمىن. حالىقتان، كوپشىلىكتەن ءۇمىت كۇتەمىن.
— ءسىز ەكى جوو-نا ءتۇسىپ، ەكەۋىن دە اياقتاماي شىعىپ كەتىپسىز؟ نە سەبەپ بولدى؟
— ءيا، كونسەرۆاتوريا، جۇرگەنوۆ اتىنداعى اكادەميانى اياقتاماي شىعىپ كەتكەنمىن. بۇعان ءتۇرلى كەلىسپەۋشىلىكتەر، ىشتەي قاناعاتتانباۋ، جاڭا يدەيالاردىڭ قولداۋعا يە بولماۋى، قايتالانا بەرەتىن مەملەكەتتىك ماعىناسىز، ساپاسىز كونسەرتتەر سەبەپ بولدى.
— "قازاقستاندا ديپلومسىز كۇن كورۋ مۇمكىن ەمەس" دەگەن ستەرەوتيپ بار. قالاي كۇن كورىپ ءجۇرسىز؟
— ەڭ سورلى ستەرەوتيپ. قازىرگى زاماندا وز-وزىڭە سەنىمدىلىك پەن بىلىكتىلىك بولسا، جەردە قالمايسىڭ. دۇنيە ينتەرنەتپەن العا كەتكەن زاماندا، ديپلومعا ەمەس، ءوز كۇشىڭە، ءوز پاراساتىڭا سەنۋ ورىندى. جوعارى وقۋ ورىنسىز، ديپلومسىز-اق، از ۋاقىتتا كەز كەلگەن ماماندىقتى يگەرىپ الۋعا بولادى. ارينە، ىقىلاس، نيەت بولسا. تاپسىرىس بويىنشا ءان، انگە ءماتىن جازۋ ارقىلى ءناپاقامىزدى تاۋىپ ءجۇرمىز. بىرنەشە كونسەرتتەر دە بار. وزىمىزگە جەتەدى.
— «جۇيە» — ەلىمىزدەگى العاشقى ساياسي اندەردىڭ ءبىرى. مۇنداي اندەر كارەراڭىزعا كەرى اسەرىن تيگىزەدى دەپ قورىقپايسىز با؟
— مەن كەرى اسەرىن تيگىزەتىن مەملەكەتتىك قىزمەتتە جۇرگەن ادام ەمەسپىن. قورقۋعا دا بولادى. قورىقپاۋعا دا بولادى. اركىمنىڭ ءوز تاڭداۋى بار.
— ءسىزدىڭ ارىپتەستەرىڭىز ساياسي ماسەلەگە كەلگەن كەزدە ءۇنسىز قالۋعا، بەيتاراپ پىكىر ايتۋعا تىرىسادى. كوبىسىنىڭ بەلگىلى ءبىر دارەجەدە اتاق-ابىرويى بار. ءسىز اتاق-داڭققا قىزىقپايسىز با؟
— "اش بالا توق بالامەن وينامايدى" دەمەكشى، جاقسى كۇنىنەن ايرىلۋعا قورقاتىن شىعار. مەن ماڭداي تەرىم سىڭبەگەن، ەڭبەگىم سىڭبەگەن اتاق-ابىرويدى قالامايمىن.
— ۋاقىت ءبولىپ، سۇحبات بەرگەنىڭىز ءۇشىن راقمەت! شىعارماشىلىق تابىس تىلەيمىن!
اڭگىمەلەسكەن: اسەل بولات قىزى
پىكىر قالدىرۋ