اياگۇل ميرازوۆا،

قازاقستاننىڭ ەڭبەك ەرى:

توقايەۆتىڭ قىزمەتىنە تابىس تىلەيمىن

قازاقستان حالقى ەلىمىزدىڭ بولاشاعى، ءوسىپ كەلە جاتقان ۇرپاقتاردىڭ تاعدىرى ءۇشىن ءوز تاڭداۋىن جاسادى.

بۇل، ارينە، اياق استىنان شەشىلە سالعان ماسەلە ەمەس. حالىق بۇل قادامعا ون ويلانىپ، ءجۇز تولعانىپ باردى. «مەملەكەت باسىنا كىم كەلەدى، ەلدىڭ ەرتەڭى قالاي بولار ەكەن؟» دەگەن ساۋالداردىڭ بولۋى دا زاڭدىلىق. بۇل ءبىر عانا مەملەكەتتىڭ ىشىندە عانا ەمەس، تورتكۇل دۇنيە تۇگەل كوز تىگىپ، قۇلاق توساتىن تاريحي وقيعا. سوندىقتان ونىڭ توڭىرەگىندەگى ءار ءتۇرلى قاڭقۋ ءسوز، بوس اڭگىمەنىڭ بولۋى دا زاڭدىلىق. وسىناۋ سايلاۋ ءبىزدىڭ بارشامىزدىڭ ساياسي مادەنيەتىمىزدىڭ قالىپتاسا باستاعانىن كورسەتتى. سايلاۋعا بارار الدىندا ءاربىر ازامات وزىنە عانا ەمەس، وتباسىنا، بۇكىل ەلدىڭ تاعدىرىنا جاۋاپ بەرۋگە داۋىس بەرىپ تۇرعانىن سەزىندى. ەلىمىزدىڭ تاۋەلسىزدىككە قول جەتكىزىپ، وسىناۋ جىلدار ىشىندەگى تابىسقا قالاي قول جەتكىزگەنىن سارالاپ، وي ەلەگىنەن وتكىزىپ، ءبىر شەشىمگە كەلدى دەپ ويلايمىن.

وڭاي جولمەن، وڭايلىقپەن ەشتەڭەگە قول جەتكىزگەن جوقپىز. وسىدان بىرنەشە جىل بۇرىنعى جاعدايىمىز قالاي ەدى؟ ەندى قانداي مەملەكەتكە اينالىپ وتىرمىز؟ بالكىم، پەندەشىلىكپەن ءتۇرلى پىكىرلەردى ايتۋعا بولار. ءبىراق بىرەن-ساران ادامنىڭ بۇلاي ويلاۋى قوعامدىق پىكىردى قالىپتاستىرماسا كەرەك. اتام قازاق «بىرلىك بار جەردە – تىرلىك بار» دەپ تەككە ايتپاعان. ەل ىشىنە ادەيى ىرىتكى سالىپ، تىنىشتىعىمىزدى العىسى كەلەتىندەر دە توبە كورسەتىپ قالىپ جاتىر. ونداي ارانداتۋلارعا ارانداپ قالۋعا بولمايدى. وسى رەتتە ءامىرجان قوسانوۆ باۋىرىمىزدىڭ سۇحباتىن تىڭداپ، ازاماتتىعىنا ريزا بولدىم. جاستارعا باسۋ ايتىپ، شەت ەلدە كوفەسىن ءىشىپ، ءوز وتانداستارىن ارازداستىرىپ وتىرعانداردىڭ الداۋىنا ءتۇسىپ قالماۋعا شاقىردى. ەشكىمدى قارالاعان جوق، ەشكىمدى دارالاعان جوق. سوندىقتان بۇل سايلاۋداعى بارلىق 7 كانديداتتىڭ وزدەرىن تۇلعا ەتىپ تانىتىپ، ازامات رەتىندە امانات ارقالاعاندارى ءۇشىن ءوزىمنىڭ ريزاشىلىعىمدى بىلدىرەمىن.

ەلباسىمىز نۇرسۇلتان نازاربايەۆ قازاق دەگەن ەل، قازاقستان دەگەن جەر بار ەكەندىگىن دۇنيە جۇزىنە تانىتتى، ەندى مەملەكەت باسىنا كەلگەن قاسىم-جومارت كەمەل ۇلى توقايەۆتىڭ قىزمەتىنە تابىس تىلەيمىن.

ەلباسىمىزدىڭ بەلگىلەپ بەرگەن تاماشا باعدارلامالارىن جالعاستىرا بەرەتىنىنە سەنىمىم زور