ءتورت اي بۇرىن بۇگىن ەكس اتانىپ وتىرعان زەينەتتەگى اپام كەلگەندە ايتقان ەدىم، "ءساتتى تاعايىنداۋ، ءبىراق كوپ ۇزاماي زەينەتكە كەتەدى" دەپ، ايتقانىمداي بولدى.
ال، وسى جولى "شىنىمەن ءساتتى تاعايىنداۋ" دەپ ايتا الامىن. ءوز باسىم ءبىرعانىم ءايتىموۆادان بەرگى مينيسترلەردىڭ ءبارىنىڭ تاعايىندالۋىنا كۋا بولىپ كەلە جاتسام دا، تۇڭعىش رەت وسى تاعايىنداۋعا شىن قۋانىپ وتىرمىن.
سەبەبىن تالداپ كورەيىن، بىرىنشىدەن، اسحات ايماعانبەتوۆ - قاراعاندى وبلىسى ءبىلىم باسقارماسى باسشىسى، ساعادييەۆ تۇسىندا مينيسترلىككە سىيماعان قابىلەتتى ۆيسە-مينيستر رەتىندە جاقسى تانيمىن. ءبىلىم سالاسىنىڭ ءار باسقىشىنان وتكەن بىلىكتى كادر دەپ ايتا الامىن.
ەكىنشىدەن، بىرەۋلەر سەكىلدى جولدان قوسىلعان بيزنەسمەن، باسقا ەمەس، وسى كۇنگە دەيىن بىلىگىمەن كورىنگەن باسشى.
ۇشىنشىدەن، كۇنى ەرتەڭ 14 ماۋسىمدا 37 جاسقا تولاتىن جاس ءمينيستردى "كوپ بالالى وتباسىنان شىققان، ءوز ەڭبەگىمەن ورلەگەن" دەيدى بىلەتىندەر. مەن دە ارىنى قاتتى بولادى دەپ سەنەمىن.
تورتىنشىدەن، ۆيسە-مينيستر كەزىندە الەۋمەتتىك جەلىدە وتىرىپ، قويىلعان سۇراقتىڭ ءبىرازىنا اشىق جاۋاپ بەرىپ وتىراتىن ەدى. بۇل اشىقتىعىن جالعاستىرادى دەگەن ۇمىتتەمىن.
ساعادييەۆ تۇسىندا نوقتاعا باسى سىيماي، وبلىسقا اكىم ورىنباسارى بولىپ كەتىپ ەدى. ءقازىر تەرگەۋدە جاتقان سول كەزدەگى ۆيسە-مينيستر سۋحانبەردييەۆالار كولەڭكەسىنەن قورىققان جاس جىگىت ءبىلىم سالاسىنا سەرپىن اكەلەدى دەپ سەنەمىن.
شىنى كەرەك، بۇل تاعايىنداۋ - مەنى جاڭا پرەزيدەنت تۋرالى جاقسى يدەياعا جەتەكتەدى. ءيا ءسات. ۇكىمەتكە وسىنداي بىلىكتى، بىلعانباعان جاستار كەلىپ، جاڭا داۋىرگە اياق باسامىز دەپ ۇمىتتەنەمىن.
جاڭا مينيسترگە ايتار جالعىز ءوتىنىشىم - ءبىلىم سالاسىنداعى جەمقورلىقتى تازالاسا. كەشەگى ۇلتتىق تەستىلەۋ ورتالىعىنىڭ قوس باسشىسى، ءار جولعى سوتتالعان ۆيسە-مينيسترلەر بۇل سالاداعى اۋىر ءحالدى كورسەتەدى. ءبىلىم جانە عىلىم سالاسى جەمقورلىقتان تازارماسا، ەل ەشقاشان ىلگەرى باسپايدى.
اياتجان احمەتجان ۇلى
پىكىر قالدىرۋ