مەملەكەت باسشىسى قاسىم-جومارت توقايەۆ ەلورداداعى جولدا ورنالاسقان كارىز جۇيەسىنىڭ قۇدىقتارى بىرنەشە بالانىڭ ءومىرىن جالماعانىن ايتىپ، بۇل جاعدايدى ماسقارا دەپ اتادى دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.

"قۇدىق قاقپاقتارىنىڭ ماسەلەسى – جاي عانا ۇيات. ءبىز «ەۋرازيانىڭ استاناسى» دەپ جۇرگەن قالادا ادامدار تەسىككە ءتۇسىپ كەتىپ جاتىر. جانە ءدال وسى ماسەلەنى بۇكىل بيلىك قۇرىلىمى مەن قالا اكىمدىگى بىرلەسىپ شەشە الماۋدا. راس، ءقازىر بۇل ماسەلە ءبىرشاما شەشىمىن تاپقان. ءبىراق حالىقارالىق سامميتتەر مەن دۇنيەجۇزىلىك كەزدەسۋلەر وتەتىن شاھاردا بالالاردىڭ كارىز قۇدىعىنا ءتۇسىپ، قازا تابۋى – ماسقارا. ادەمى ءسوزدى ازايتىپ، جۇمىستى ىستەۋ كەرەك. ادامدار ءۇشىن"، - دەدى توقايەۆ.

ەسكە سالا كەتەيىك، 29-مامىر كۇنى ەلوردادا كىشكەنتاي بالا ۆەلوسيپەدپەن ءجۇرىپ كارىز قۇدىعىنا ءتۇسىپ كەتكەن. ابىروي بولعاندا، قۇدىق ماڭىنان ءوتىپ بارا جاتقان ادام بالانى كورىپ قالىپ، قۇتقارىپ الدى. اقپان ايىنىڭ سوڭىندا 13 جاستاعى باقداۋلەت ءومىرحان وسىنداي كارىز قۇدىعىنا ءتۇسىپ كەتىپ، قازا بولدى. وسىعان ۇقساس ادام ءولىمى وتكەن جىلدىڭ قاراشاسىندا ورىن العان. ول كەزدە 13 جاستاعى ارۋجان ماراتوۆا كارىز قۇدىعىنىڭ قۇربانى بولعان ەدى.