قازاقستاندىق كاسىپقوي بوكسشى سادريددين احمەدوۆ بيلىك وكىلدەرىنە سوڭعى ۋاقىتتا قايتا-قايتا الاڭعا شىعىپ جاتقان نارازى حالىقتىڭ وزىمەن ەمەس، ولاردىڭ الاڭعا شىعۋىنىڭ سەبەبىمەن كۇرىسۋگە ءوتىنىش جاسادى.  بۇل تۋرالى بوكسشى ءوزىنىڭ Facebook پاراقشاسىندا جازدى.

"اسسالاۋماعالەيكۋم، قازاق ەلى! شەت ەلدە جۇرسەك تە، ەلىمىزدەگى كەلەڭسىز جايتتارعا ءبىزدىڭ دە جۇرەگىمىزدى قىنجىلادى. "ەرىم" دەيتىن ەل بولماسا، "ەلىم" دەيتىن ەر قايدان بولسىن دەمەكشى، ءارقاشان ماعان قولداۋ كورسەتىپ، ىستىق ىقىلاسى مەن دۇعا-تىلەگىن ايامايتىن xالقىممەن بىرگە ەكەنىمدى ايتقىم كەلەدى. قۇرمەتتى، بيلىكتەگى اعالار نارازى حالىقتىڭ وزىمەن ەمەس، سونىڭ سەبەبىمەن كۇرەسسەڭىزدەر دەگەن ءوتىنىشىمىز بار. 2019 جىل جاستار جىلى ەكەنىن ەسكەرىپ، زامانداستارىمنىڭ بولاشاعىنا بالتا شابىلماسا ەكەن دەيمىن. اللا ەلىمىزدى بالە-جالا، كەساپاتتان ساقتاپ، تاۋەلسىزدىگىمىزدى قيامەتكە دەيىن ەتۋىن تىلەيمىن.

ايتپاقشى، 29-ماۋسىمدا قازاعىمنىڭ مەرەيىن تاعى دا ۇستەم، ابىرويىن اسقاق ەتۋگە بارىمدى سالامىن. ءار قازاق مەنىڭ جالعىزىم، امان بولسىن قازاعىم!"،  – دەپ جازدى احمەدوۆ Facebook پاراقشاسىندا.

21 جاساتاعى سادريددين احمەدوۆ – اۋەسقوي بوكستان جاستار اراسىنداعى الەم چەمپيونى. ول 2018 جىلى كاسىپقوي بوكسقا اۋىستى. كاسىپقوي رينگتە سەگىز جەكپە-جەك وتكىزىپ، سەگىز رەت جەڭىسكە جەتكەن. ونىڭ جەتى جەكپە-جەگىندە مەرزىمىنەن بۇرىن ۇتقان. قازىرگى تاڭدا احمەدوۆ كاسىپقوي بوكستان WBC تۇجىرىمى بويىنشا جاستار اراسىنداعى الەم چەمپيونى (2019) جانە WBC Asia  (2019) بەلبەۋىنىڭ يەگەرى.