قازاقستان LRT قۇرىلىسى ءۇشىن قىتايعا 203 ميلليون دوللار قارىز. بۇل تۋرالى ەلوردا اكىمشىلىگىندە ءسوز بولدى. كولىك جانە جول-كولىك ينفراسترۋكتۋرالارىن دامىتۋ باسقارماسىنىڭ مالىمەتىنشە، ءبىزدىڭ ەل جاسالعان جۇمىستار ءۇشىن قاراجاتتى قىتايلىق كومپانيادان قارىزعا العان دەپ جازادى Qamshy.kz اقپارات اگەنتتىگى.

22 شاقىرىم اۋماقتى الىپ جاتقان قۇرىلىس الاڭىنداعى ارەكەتتىڭ قايتا جاندانار ۋاقىتى بەيمالىم. ءبىر انىق – قۇرىلىس قايتا قارجىلاندىرۋ جۇزەگە اسقاننان كەيىن باستالماق.

ەسكە سالا كەتەيىك، ءبىرشاما ۋاقىت بۇرىن اتالعان جوبانى جەرگىلىكتى اكىمشىلىك پەن ۇكىمەت ىشكى قارجى كوزدەرى ارقىلى جانداندىرۋدى كوزدەپ وتىرعانى ءمالىم بولعان. دەمەك، جەر ءۇستى مەتروسى كەلەسى جىلدىڭ ەكىنشى جارتىسىندا قولدانىسقا ەنۋى مۇمكىن.

قازىرگە دەيىن اتقارىلعان جۇمىستاردىڭ بەلگىلى ءبىر بولىگىن قىتايلىق كومپانيا قارجىلاندىرىپ كەلگەن. ىسكە اسقان جۇمىستىڭ قۇنى – 203 ميلليون اقش دوللارى.