ەلىمىزدە سايلاۋ ناۋقانى ءوتتى. وعان قاتىسقان حالىقارالىق ساراپشىلار وزدەرىنىڭ وڭ باعاسىن بەردى. الايدا، اراعا ءبىپ اپتاداي ۋاقىت سالىپ، سايلاۋ ناۋقانىنىڭ ءادىل وتپەۋىن ايتىپ، سايلاۋدى قارالاعىسى كەلگەن باقىلاۋشىلار پايدا بولدى.

ءبىر توپ ازامات ادام قۇقىقتارى جونىندەگى قازاقستاندىق حالىقارالىق بيۋرونىڭ باسپا ءسوز ورتالىعىندا وتكەن جيىندا وزدەرىن «تاۋەلسىز باقىلاۋشى» رەتىندە تانىستىردى. ايتا كەتۋ كەرەك، سايلاۋ ناۋقانى كەزىندە  ءبىراز ازاماتتار  رەسمي باقىلاۋشى مارتەبەسىن راستاي الماعان ەدى.

«تاۋەلسىز باقىلاۋشىلاردىڭ» ايتۋىنشا، سايلاۋ ناۋقانى ادىلەتسىز وتكەن-مىس. سويتە تۇرا جينالعان قاۋىمعا بەرگەن مالىمەتتەرىندە بۇرمالاۋشىلىق، بىر-بىرىنە سايكەس كەلمەيتىن ساندار، جاڭساق اقپارات تاراتىلدى.

ماسەلەن، «باقىلاۋشى» سەرىك ابىشيەۆ الماتىدا 444 سايلاۋ ۋچاسكەسى بار جانە سول ۋچاسكەلەردە كانديدات قوسانوۆقا 48 پايىز سايلاۋشىلار داۋىس بەرگەن دەپ سەندىردى.

الايدا «امانات» ازاماتتىق پلاتفورماسى شتابىنىڭ جەتەكشىسى قازبەك شايح سپيكەردى بىرنەشە رەت تۇزەتىپ، الماتىدا رەسمي تۇردە 554 ۋچاسكەنىڭ بولعانىن جانە بۇعان دەيىن جاريالانعان سەرىك ابىشيەۆتىڭ مالىمەتتەرى بويىنشا كانديدات ءامىرجان قوسانوۆقا سايلاۋشىلاردىڭ 38 پايىزى داۋىس بەرگەنىن مالىمدەدى.

قازبەك شايحتىڭ ايتۋىنشا، ەگەر قوعام وكىلدەرى دەموكراتيا تۋرالى ايتقىسى كەلسە، ولاردىڭ وي-پىكىرلەرى مەن ۇستانىمدارى دايەكتى بولۋى ءتيىس.

"ماعان باقىلاۋشىلار جينالىسىنىڭ وتەتىنى تۋرالى باسپا ءسوز حابارلاماسى كەلدى. ايتىلعان ۋاقىتىندا وتەتىن جەرىنە باردىم. الايدا، بۇل ازاماتتار مەنىڭ كەلەتىنىمدى كۇتپەگەن. وزدەرىنىڭ عانا مالىمدەمەلەرىن جاساپ، وزگەنىڭ پىكىرىنە قۇلاق اسپاۋعا تىرىستى. ءبىزدىڭ تاراپىمىزدان قويىلعان سۇراقتارعا جاۋاپ بەرمەي، ۇزىلدى-كەسىلدى قارسىلىق بىلدىرۋگە تىرىستى. جينالىس بىتپەي جاتىپ، زالدان شىعىپ كەتۋىمىزدى تالاپ ەتتى. ناتيجەسىندە سياسى ءوشىپ قالاتىن قالام تۋرالى باياندادى. بۇل بەينەجازبانىڭ و باستا دۇرىس تۇسىرىلمەگەنىن ايتقىم كەلەدى. كەيبىر سايلاۋ ۋچاسكەلەرىندە بيۋللەتەندەر قاپ-قابىمەن جاشىككە سالىندى دەگەن ويلار ايتىلدى. ونداي بەينەجازبالاردىڭ قانشالىقتى شىندىققا جاناساتىنى بەلگىسىز. ول بيۋللەتەندەر قاي كانديداتقا بەرىلدى. ول دا تۇسىنىكسىز"، – دەدى قازبەك شايح.

«امانات» ازاماتتىق پلاتفورماسى شتابىنىڭ تاۋەلسىز باقىلاۋشىسى الەكساندر بەليانوۆ تا وتكىزىلگەن جيىننىڭ زاڭعا قايشى كەلەتىن تۇستارى كوپ ەكەنىن جاسىرمادى.

"باقىلاۋشىلار جيىنى وتەتىنى تۋرالى حابارلامانى مەن دە الدىم. پىكىر الماسۋ، سايلاۋعا قورىتىندى جاسالادى دەگەن ۇمىتپەن كەلدىم. الايدا، اياداي عانا تار بولمەگە ءتىلشى، بلوگەر، ءبىرقاتار قوعام وكىلدەرىن جيناپ العان. اياق الىپ ءجۇرۋ بىلاي تۇرسىن، دەمالۋعا مۇمكىندىك جوق. ۇيىمداستىرۋشىلار  ءبىزدىڭ جينالىسقا قاتىسپاي، دەرەۋ كەتۋىمىزدى تالاپ ەتتى. قارسىلىعىمدى ءبىلدىرىپ ەدىم، تىڭداعان دا جوق، شىعارىپ جىبەردى"، – دەيدى  الەكساندر بەليانوۆ.

ونىڭ ايتۋىنشا، جيىندا ءسوز العانداردىڭ سوزدەرى ۇيقاسپايدى.

"ماسەلەن، ءبىزدى تاۋەلسىز باقىلاۋشى رەتىندە قوعامدىق ۇيىمدار سايلايدى. ال، بۇلاردىڭ قايدان شىققانى بەلگىسىز. باستاپقىدا ءوزىن قوسانوۆ شتابىنىڭ جەتەكشىسىمىن دەپ تانىستىرعان سەرىك ابىشيەۆ كەيىننەن بۇل لاۋازىمنان سايلاۋعا دەيىن كەتىپ قالعانىن مالىمدەدى. تاعى ءبىر باقىلاۋشى ءوزىن قاراپايىم ازامات دەپ تانىستىردى"، – دەپ جالعاستىردى ءسوزىن ا.بەليانوۆ.

«امانات» ازاماتتىق پلاتفورماسىنىڭ وكىلدەرى زالدان شىعارىلعان سوڭ جيىندى ۇيىمداستىرۋشىلار بۇل ازاماتتاردىڭ سايلاۋ كەزىندە ءوز مىندەتتەرىن دۇرىس ورىنداماعانىن ايتىپ، جالا جاپتى.

جالپى، جيىندا سايلاۋعا قاتىستى ايتىلعان مالىمەتتەردىڭ راس-وتىرىگى بەلگىسىز، اشىق كۇيىندە قالدى.

ەستەرىڭىزگە سالا كەتەيىك، ەلىمىزدەگى جالعان اقپارات تاراتقان ءاربىر ازامات قازاقستان زاڭدارىمەن قىلمىستىق جاۋاپكەرشىلىككە تارتىلادى.