ءتورت سانتەحنيكتىڭ قازاسىنا بايلانىستى قاماۋعا الىنعان «استانا سۋ ارناسىنىڭ» قىزمەتكەرلەرى 7 جىلعا دەيىن سوتتالۋى مۇمكىن. تەرگەۋ يزولياتورىنا جابىلعان مونوپوليست مەكەمەنىڭ ەكى لاۋازىمدى قىزمەتكەرى كىنالارىن مويىنداعان دەپ حابارلايدى Qamshy.kz اقپارات اگەنتتىگى كتك ارناسىنا سىلتەمە جاساي وتىرىپ.
نۇرلان مۇقانوۆ، نۇر-سۇلتان قالالىق پوليسيا دەپارتامەنتى تەرگەۋ باسقارماسىنىڭ ءبولىم باستىعى:
"جاۋاپ الۋ بارىسىندا ۇستالعان ەكى ازامات قاتتى وكىندى. سونىمەن قاتار جەتكىلىكسىز جۇمىس ىستەگەندەرىن مويىندايدى. ەندى 7 جىلعا دەيىن جازا بەرىلۋى مۇمكىن."،- دەپ مالىمدەدى.
قاماۋعا الىنعانداردىڭ ءبىرى «استانا سۋ ارناسىنىڭ» باس مەحانيگى. ول، جۇمىس كەزىندە قاۋىپسىزدىك تالاپتارىنىڭ ساقتالۋىنا جاۋاپتى بولعان. ياعني، قۇدىق ىشىندە ۋلى مەتانعا تۇنشىققان سانتەحنيكتەرگە گازدان قورعايتىن بەتپەردە كيدىرۋى كەرەك ەدى. ءبىراق بۇل ەرەجە ورىندالماعان. ال، قولىنا كىسەن سالىنعان ەكىنشى ادام الماتى اۋدانىنا قاراستى «استانا سۋ ارناسىنىڭ» جەتەكشىسى. ول دا قاۋىپسىزدىك تالاپتارىن ورەسكەل بۇزعان دەگەن كۇدىكپەن يزولياتوردا وتىر. ءقازىر «ەڭبەكتى قورعاۋ ەرەجەسىن بۇزۋ» بابى بويىنشا قىلمىستىق ءىس قوزعالىپ، تەرگەۋ ءجۇرىپ جاتىر. جانتۇرشىگەرلىك قايعىلى وقيعا تۋرا 20 كۇن بۇرىن بولعان ەدى. كارىز قۇدىعىن بىتەمەك بوپ ىشىنە تۇسكەن ءبىر سانتەحنيك گازعا ۋلانىپ ءتىل تارتپاي كەتەدى. كەيىن ونى قۇتقارامىن دەپ تومەنگە بىرىنەن سوڭ ءبىرى تۇسكەن ءۇش جۇمىسشى دا مەتانعا تۇنشىعىپ قازا تاپقان. ولار 24، 26، 31 جانە 51 جاستاعى جۇمىسشىلار.
ۇسىنعان: بەك بايتاس
پىكىر قالدىرۋ