جەلىدە استانادا ميتينگىگە شىققانداردى ۇستاعان اسكەري قىزمەتكەردىڭ ۆيدەوسى جاريالاندى - دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.

اۆتوبۋس ىشىندە تۇسىرىلگەن ۆيدەودا ۇلتى قازاق اسكەري قىزمەتشىنىڭ نامىسىنا تيەتىن سوزدەر ايتىپ، قىسىم كورسەتكەن ءبىر توپ ادامدى كورۋگە بولادى. ءانشى رايمنىڭ جەكە ورىنداۋىنداعى "اۋىلىمدى ساعىندىم" انىمەن سۇيەمەلدەنگەن روليك الەۋمەتتىك جەلىلەردە تارالىپ جاتىر.

نۇر-سۇلتان قالالىق پوليسيا باسقارماسىنىڭ رەسمي وكىلى سوفيا قىلىشبەكوۆانىڭ ايتۋىنشا، ۆيدەوداعى اسكەري ادام - پوليسيا اعا لەيتەنانتى مارات بايدۇيسەنوۆ. ول قۇقىق قورعاۋ ورگاندارىندا 2015 جىلدان باستاپ قىزمەت ەتەدى. ەكى بالانىڭ اكەسى. 

"بۇل وقيعا 9 ماۋسىمدا قوعامدىق ءتارتىپتى ساقتاۋ شارالارى اياسىندا بولعان جاعداي. پوليسەي ءوزىن مۇنداي جاعدايلاردا ۇستاۋدىڭ ۇلگىسىن كورسەتىپ، اسا بىلىكتى قىزمەتكەر رەتىندە كورىندى. زاڭ اياسىندا ارەكەت ەتىپ، بەرگەن سەرتىنە بەرىك بولدى. نامىسىنا تيەتىن قانشاما سوزدەر مەن ءتۇسىرىپ جاتقان قىسىمعا شىداپ، ارانداتۋعا ەرمەدى. بۇل ناعىز پوليسەيدىڭ ۇلگىسى"، - دەپ پىكىر ءبىلدىردى ول. 

كەيىن وفيسەردىڭ جەلىدە تاراعان ۆيدەوعا قاتىستى جاۋابى ايتىلعان تاعى ءبىر روليك جاريالاندى. وندا پوليسيا اعا سەرجانتى ميتينگ كەزىندە بىرنەشە ادامدى اۆتوبۋسقا وتىرعىزۋعا قاتىسقانىن ايتتى.

"اۆتوبۋس ىشىندە ولار ماعان ءتۇرلى جامان سوزدەر ايتتى. مەن بارىنە شىدادىم. ويتكەنى قارۋسىز ادامعا قارسىلىق كورسەتكىم كەلمەدى. ولاردىڭ جاساعانى دۇرىس ەمەس، ارينە، ءبىراق ونداي ساتتەردە پروۆوكاسياعا جول بەرمەۋ ءۇشىن سوڭىنا دەيىن شىداۋ قاجەت دەپ ويلايمىن. ءبىز جۇمىسقا تۇرعاندا قىزمەتىمىزدى ادال اتقارۋعا، ادامداردىڭ قاۋىپسىزدىگىن ساقتاۋعا، قىلمىسپەن كۇرەسۋگە انت بەرەمىز. سوندىقتان مەملەكەتتىڭ تۇراقتىلىعىن ساقتاۋ ءۇشىن كەز كەلگەن زاڭبۇزۋشىلىقپەن سوڭىنا دەيىن كۇرەسەمىز. بۇل ءبىزدىڭ مىندەت"، - دەيدى مارات بايدۇيسەنوۆ جاۋابىندا.