قازاقستان پرەزيدەنتى قاسىم-جومارت توقايەۆ ءوزىنىڭ پرەزيدەنت بولاتىنى تۋرالى ءۇش جىل بۇرىن بىلگەنىن ايتتى دەپ جازادى Qamshy.kz اقپارات اگەنتتىگى euronews.com سايتىنا سىلتەمە جاساپ.

بۇل تۋرالى توقايەۆ  ەuronewsء-تىڭ "گلوبالنىي ديالوگ" باعدارلاماسىنا بەرگەن سۇحباتىندا ايتتى.

"ءۇش جارىم جىل بۇرىن ول (رەد. قازاقستاننىڭ العاشقى پرەزيدەنتى ن.نازاربايەۆ) ماعان "كەلەسى پرەزيدەنت سەن بولاسىڭ" دەدى. ۋاقىت وتە كەلە ءبىز وڭتايلى ءساتتى تاڭدادىق"، – دەدى توقايەۆ. 

قازاقستان مەملەكەتىنىڭ نەگىزىن قالاۋشى – نۇرسۇلتان نازاربايەۆ

توقايەۆتىڭ ايتۋىنشا، استانا اتىن نۇر-سۇلتانعا اۋىستىرۋ تۋرالى شەشىمى – قازاقستان مەملەكەتىنىڭ نەگىزىن نۇرسۇلتان نازاربايەۆتىڭ قالاعاندىعىمەن بايلانىستى.

"نۇرسۇلتان نازاربايەۆقا كەلسەك، ول – ءبىزدىڭ مەملەكەتىمىزدىڭ نەگىزىن قالاۋشى تۇلعا. ول الداعى ۋاقىتتا دا ساياساتتا قالا بەرەدى. ونىمەن ستراتەگيالىق ماسەلەلەر بويىنشا كەڭەسىپ وتىرۋ كەرەك دەپ ەسەپتەيمىن جانە ۇنەمى سولاي جاساپ ءجۇرمىن. نۇرسۇلتان نازاربايەۆتىڭ ايتۋىنشا، قازاقستاندا ەكى جاقتى بيلىك بولمايدى، ول بيلىكتەن كەتەدى. ءبىراق پرەزيدەنتكە كومەكتەسەدى. پرەزيدەنتكە قانشا ۋاقىتقا دەيىن كومەتەسەتىنى ونىڭ وزىنە بايلانىستى"، – دەدى توقايەۆ.

ءادىل سايلاۋ ءھام حالىقتىڭ نارازىلىعى

سونىمەن قاتار قازاقستان پرەزيدەنتى سوڭعى ۋاقىتتا حالىقتىڭ نارازىلىق ءبىلدىرىپ كوشەگە شىعۋىنا قاتىستى ويىن ايتتى.

توقايەۆتىڭ ايتۋىنشا، الاڭعا نارازىلىعىن ءبىلدىرىپ شىققان ادامداردىڭ تالاپتارى تىڭدالادى.

"ولار شىنىمەن نارازىلىقتارىن ءبىلدىرىپ كوشەگە شىقتى. ولاردىڭ تالاپتارىن تالداۋ جۇمىستارى جۇرگىزىلۋدە. نەگىزىنەن نارازىلاردىڭ تالابى الەۋمەتتىك باعىتقا بايلانىستى. مەنىڭ مىندەتىم – بۇل تالاپتاردى تالداۋ. كوشەگە شىققان ادامداردى تىڭداۋ كەرەك. مەن بيلىك پەن حالىق اراسىنداعى ديالوگتى ورناتۋ قاجەت دەپ ەسەپتەيمىن. وسى ماقساتتا مەن قوعامدىق سەنىم كەڭەسىن قۇردىم"، – دەدى توقايەۆ.

توقايەۆ "سايلاۋ ادىلەتسىز ءوتتى" دەپ كوشەگە شىققاندار بوساتىلاتىن ايتتى. 

"ارينە، ولار بوساتىلادى، ويتكەنى ولاردىڭ ويىنشا سايلاۋ ادىلەتسىز وتكەن. مەن، مىسالى، سايلاۋ باستان-اياق ءادىل ءوتتى دەپ ەسەپتەيمىن"، – دەدى توقايەۆ.

سونداي-اق سۇحبات بارىسىندا توقايەۆ جۇڭگو مەن اقش اراسىنداعى "ساۋدا سوعىسىنا"، رەسەي مەن قازاقستان اراسىنداعى بايلانىسقا، قازاقستانداعى ءبىرقاتار ماسەلەلەرگە قاتىستى ويىن ايتتى.

قازاقستاندى 30 جىلعا جۋىق باسقارعان نۇرسۇلتان نازاربايەۆ 2019 جىلدىڭ 19 ناۋرىزىندا پرەزيدەنتتىك وكىلەتتىلىگىن توقتاتاتىنى تۋرالى ۇندەۋ جاريالادى. سودان كەيىن زاڭعا سايكەس سەنات سپيكەرى قاسىم-جومارت توقايەۆ قازاقستان پرەزيدەنتى لاۋازىمىن ۋاقىتشا يەلەندى. ول 9 ماۋسىمدا وتكەن كەزەكتەن تىس پرەزيدەنت سايلاۋىندا جەڭىسكە جەتىپ، رەسمي تۇردە قازاقستاننىڭ ەكىنشى پرەزيدەنتى بولدى. ءبىراق الەۋمەتتىك جەلى دە كوپتەگەن ادامدار توقايەۆتىڭ جەڭىسىن مويىنداماي، سايلاۋ ادىلەتسىز وتكەنىن ايتتى. ەل استاناسى نۇر-سۇلتاندا جانە الماتى قالاسىندا سايلاۋ زاڭسىز دەپ تانىعان مىڭداعان ادامدار كوشەگە شىعىپ، ءوز نارازىلىقتارىن ءبىلدىردى. ولاردى پوليسيا جانە ارنايى جاساق ۇستادى.