"قازاقفيلم" كينوستۋدياسى اتاقتى قازاق اقىنى مۇقاعالي ماقاتايەۆ تۋرالى كينونىڭ ءتۇسىرىلىم جۇمىستارىن باستادى. بۇل ءفيلمنىڭ رەجيسسەرى – تانىمال كينوتانۋشى بولات قالىمبەتوۆ دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.

• "كينوكارتينا ق ر مادەنيەت جانە سپورت مينيسترلىگىنىڭ ارنايى تاپسىرىسىمەن شاكەن ايمانوۆ اتىنداعى "قازاقفيلم" اق ستۋدياسىندا تۇسىرىلمەك. بۇل فيلم تولىقتاي اقىن تۋرالى بولماۋى مۇمكىن. ءبىراق ادام تاعدىرى تۋراسىندا ەكەنى انىق"، - دەدى قالىمبەتوۆ.

ءتۇسىرىلىم پروسەسى وسكەمەن قالاسىندا باستالدى. ءارى قاراي كوماندا سانكت-پەتەربۋرگ قالاسىنا بارماق. سودان كەيىن الماتىعا ورالادى.

رەجيسسەردىڭ ايتۋىنشا، بۇل كينوكارتينا مۇقاعالي ماقاتايەۆتىڭ ءومىرىنىڭ سوڭعى جىلدارى تۋرالى ايتادى. فيلم قازسسر جازۋشىلار وداعىنىڭ اقىن تاعدىرىن شەشەتىن جينالىسىنان باستالادى. ماقاتايەۆ سول جەردە جينالىس شەشىمىن كۇتپەي، مۇشەلىك بيلەتىن تاستاپ كەتەدى.

سەناريي اۆتورلارى – جۇسىپبەك قورعاسبەك، بولات قالىمبەتوۆ جانە عازيز ناسىروۆ. قويۋشى وپەراتورى – ەدىگە نەسىپبەكوۆ. فيلم پروديۋسەرى – المات ماساليم.