قازاقستاننىڭ بۇرىنعى مادەنيەت جانە سپورت ءمينيسترى ارىستانبەك مۇحامەدي ۇلى مينيسترلىك ۇجىمىمەن قوشتاسىپ، جاڭا تاعايىندالعان مينيستر اقتوتى راحمەتوللاقىزىن قۇتتىقتادى دەپ حابارلايدى Qamshy.kz اقپارات اگەنتتىگى. بۇل تۋرالى ەكس-مينيستر ءوزىنىڭ فەيسبۋك پاراقشاسىندا مالىمدەدى.
"دوستارىم، بۇگىننەن باستاپ قازاقستان رەسپۋبليكاسىنىڭ مادەنيەت جانە سپورت ءمينيسترى قىزمەتىنە رايىمقۇلوۆا اقتوتى راحمەتوللا قىزى كەلدى. مينيسترلىك جۇمىسىنىڭ قىر-سىرىنا قانىق، مەنىڭ ورىنباسارىم بولىپ تالاي جىل بىرگە قىزمەت اتقارعان بىرەگەي مامان، قايىرىمدى ادام رەتىندە بىلەمىن.
سالا باسشىلىعىندا بۇرىننان جۇمىس ىستەپ، جاقىن جۇرگەن ادام قالعانىنا ۇجىم دا قۋانىشتى. اقتوتى راحمەتوللا قىزى العا قويعان ماقساتتاردى ادەتتەگىدەي تابىستى ورىندايدى دەپ سەنەمىن!
اقتوتى راحمەتوللا قىزى، ءسىزدى قازاقستان رەسپۋبليكاسىنىڭ مادەنيەت جانە سپورت ءمينيسترى قىزمەتىنە تاعايىندالۋىڭىزبەن شىن جۇرەكتەن قۇتتىقتاپ، ەڭبەكتە تابىس تىلەيمىن!
ءيا، دوستارىم، بۇگىن مينيستر رەتىندە اتقارعان قىزمەتىمنىڭ ناتيجەلەرىنە ەسەپ بەرەتىن ءسات تۋدى. مەن ق ر مادەنيەت جانە سپورت مينيسترلىگىن 2014 جىلدىڭ تامىز ايىنان باستاپ باسقاردىم. مەنى ۇجىمعا تانىستىرعان كۇن ءالى ەسىمدە، شىعارماشىل، اقىلدى، كوزدەرىندە وت بار ماماندار بىرتىندەپ اشىلا باستاعانى دا ەسىمدە. وسى جىلدار ىشىندە مينيسترلىكتىڭ ءار قىزمەتكەرىمەن جاقىن دوس بولىپ كەتتىك. كوماندامىزبەن بىرلەسە تالاي جۇمىس اتقاردىق. ءارقايسىڭىزعا ەڭبەكتەرىڭىز ءۇشىن العىسىم زور! سىزدەردەي ادامدارمەن بىرلەسە جۇمىس ىستەپ، شامام كەلگەنشە پايدامدى تيگىزگەنىم ءۇشىن تاعدىرىما ريزامىن!
جاڭا مينيستر اقتوتى رايىمقۇلوۆا باستامالاردىڭ ءبارىن جالعاستىراتىنىنا، مينيسترلىكتىڭ جۇمىسى قارقىندى جانە جوعارى ناتيجەلى قالپىندا بولاتىنىنا سەنىمدىمىن. شىنايى كوڭىلمەن قابىل الىڭىزدار، دوستارىم! ەشكىممەن قوشتاسپايمىن - سىزدەرگە دەگەن دوستىق كوڭىلدە قالا بەرەمىن."، - دەلىنگەن ەكس-مينيستردىڭ جازباسىندا.
