ءماجىلىس دەپۋتاتى ساۋىتبەك ءابدىراحمانوۆ الەۋمەتتىك جەلىلەردە تاراعان جاڭساق پىكىرگە قاتىستى تۇسىنىكتەمە بەردى، دەپ حابارلايدى Qamshy.kz اقپارات اگەنتتىگى Sputnik قازاقستان تىلشىسىنە سىلتەمە جاساپ.

مەملەكەت باسشىسى بۇل باستاما جايلى ءوزىنىڭ سايلاۋالدى باعدارلاماسىندا ايتىپ قويعان بولاتىن. دەپۋتات قازاقستاندىقتاردىڭ پرەزيدەنت سايلاۋىنا بەلسەندى قاتىسىپ، تاريحي تاڭداۋ جاساعانىن اتاپ ءوتتى.

"سايلاۋعا داۋىس بەرۋ قۇقىعى بار ادامداردىڭ 80%ء-نىڭ قاتىسۋى، ولاردىڭ ءبىر ادامعا 70% داۋىس بەرۋى وركەنيەتتى الەمدە، دەموكراتيالى قوعامدا جوعارى كورسەتكىش بولىپ سانالادى. دەسە دە تولعاندىراتىن جەكەلەگەن ماسەلەلەر بار. ماسەلەن، توقايەۆتىڭ نەگىزگى وپپونەنتى 17% داۋىس جينادى. ال بۇل 1 ميلليون 495 مىڭ سايلاۋشى – ءبىر جارىم ميلليونعا جۋىق ادام. مەنىڭشە، بۇل كوپ ەمەس، ءبىراق از دا ەمەس. ءسىز بەن ءبىز بۇل سايلاۋشىلاردىڭ ناقتى ءبىر كانديداتتى قولداپ نەمەسە ناقتى ءبىر كانديداتقا قارسى داۋىس بەرمەگەنىن بىلەمىز. ولار، نەگىزىنەن، وزدەرىن باسقاراتىن ادامدارعا دەگەن سەنىمىنىڭ جوقتىعىنان وسىلاي داۋىس بەردى"، - دەدى ءابدىراحمانوۆ ماجىلىستەگى قحا دەپۋتاتتارىنىڭ وتىرىسىندا.

ماجىلىسمەن قازىرگى مىندەت بيلىكتىڭ حالىق الدىنداعى جاۋاپكەرشىلىگىن ارتتىرۋ ەكەنىن ناقتىلاپ ايتتى.

"قوعامدىق سەنىم داعدارىسى، مىنە، ءبىزدى ءقازىر وسى ماسەلە الاڭداتۋى ءتيىس. ءدال وسى قوعامدىق سەنىم داعدارىسىنان قوعامدىق كوڭىل-كۇيدىڭ راديكالدانۋى ورىن الىپ وتىر. كوڭىل-كۇيدىڭ راديكالدانۋىنىڭ باستى سەبەبى – ساياسي پىكىرتالاستاعى مادەنيەتتىڭ جوقتىعىنان. مىنە، توقايەۆ وسى سەبەپتەن ۇلتتىق قوعامدىق سەنىم كەڭەسىن قۇرعالى جاتىر"، - دەدى ول.

وسى ورايدا ءابدىراحمانوۆ الەۋمەتتىك جەلىلەردە توقايەۆتىڭ باستاماسىنا قاتىستى تاراعان جاڭساق پىكىرگە توقتالدى.

"ايتپاقشى، ءقازىر الەۋمەتتىك جەلىلەردە كەيبىر بىلگىشتەر قاسىم-جومارت توقايەۆ بۇل كەڭەستى كوشەلەردەگى نارازىلىق شەرۋلەردەن كەيىن قۇرعالى جاتىر ايتىپ جاتىر. ءتىپتى ولاي ەمەس!"، - دەدى دەپۋتات.

ول ۇلتتىق كەڭەس قۇرۋ جايلى توقايەۆتىڭ سايلاۋالدى باعدارلاماسىندا تايعا تاڭبا باسقانداي جازىلعانىن ايتتى. وسىدان كەيىن سايلاۋالدى تۇعىرنامادان ءۇزىندى كەلتىردى.

"مەن قوعامدىق سەنىم ۇلتتىق كەڭەسىن قۇرۋدى ءجون كوردىم. ۇلتتىق كەڭەسكە ءبىزدىڭ قوعامنىڭ قابىلەتتى وكىلدەرى كىرەتىن بولادى. وسى كەڭەس اياسىندا ماڭىزدى جالپىۇلتتىق زاڭ جوبالارى مەن دامۋ باعدارلامالارىنا قوعامدىق ساراپتاما جۇرگىزەتىن بولامىز"، - دەپ وقىپ بەردى ءابدىراحمانوۆ.