قازاقستان رەسپۋبليكاسى پرەزيدەنتىنىڭ سايلاۋى قولدانىستاعى زاڭناما نورمالارىنا سايكەس وتكىزىلدى Qamshy.kz اقپارات اگەنتتىگى. بۇل تۋرالى ق ر باس پروكۋراتۋسىنىڭ باسپا ءسوز قىزمەتى مالىمدەمە جاسادى.

"ەل پرەزيدەنتىنىڭ سايلاۋىندا سايلاۋشىلاردىڭ ءوز ەركىن ءبىلدىرۋىنىڭ ناتيجەلەرىنە كۇمان تۋدىرۋى مۇمكىن قۇقىق بۇزۋشىلىقتار بولعان جوق"، - دەلىنگەن حابارلامادا.

سايلاۋ كەزەڭىندە پروكۋراتۋرامەن 36 اكىمشىلىك قۇقىق بۇزۋشىلىق تۋرالى ءىس قوزعالىپ، سوتقا جىبەرىلدى. ولاردىڭ 30-ى سوتتارمەن قارالدى، 6-ى قارالۋدا.

باسقا ادامدار ءۇشىن داۋىس بەرۋ مۇمكىندىگىن جاساۋ ماقساتىندا ازاماتتارعا بيۋللەتەندەر بەرگەنى ءۇشىن ۋچاسكەلىك سايلاۋ كوميسسياسىنىڭ 11 مۇشەسى اقبتك-نىڭ 110-بابى بويىنشا جاۋاپكەرشىلىككە تارتىلدى. ولارعا 25 اەك كولەمىندە ايىپپۇل سالىندى.

9 سايلاۋشىعا تەڭ سايلاۋ قۇقىعى تۋرالى تالاپتى بۇزعانى ءۇشىن اقبتك–ءنىڭ 108–بابى بويىنشا ايىپپۇل سالىندى (ءبىر سايلاۋشى - ءبىر داۋىس - ءبىر بيۋللەتەن). نەگىزىنەن ولار وتباسى مۇشەلەرى ءۇشىن بيۋللەتەندەر العان. بۇل نۇر-سۇلتان جانە الماتى قالالارىنىڭ، الماتى، شىعىس قازاقستان جانە تۇركىستان وبلىستارىنىڭ تۇرعىندارى. وسىنداي 4 ءىس جامبىل وبلىسىنىڭ مامانداندىرىلعان اكىمشىلىك سوتىنىڭ قاراۋىندا.

پروكۋراتۋرا ورگاندارىمەن ءبىرقاتار باق-تا، سونداي-اق الەۋمەتتىك جەلىلەردە جاريالانعان بيۋللەتەندەر سالۋ مەن وزگە دە بۇزۋشىلىقتار تۋرالى بەينەجازبالار بويىنشا تەكسەرىس جۇرگىزىلۋدە. مالىمەتتەردىڭ كوپشىلىگى راستالمادى.

كوپتەگەن بەينەجازبالاردا وقيعالار بولعان ۋچاسكەلەر، اۋدان، قالا، وبلىس تۋرالى دەرەكتەردىڭ جوقتىعىنا بايلانىستى قالعان فاكتىلەر بويىنشا جۇمىستار ودان ءارى جالعاسۋدا.

تەكسەرۋ قورىتىندىسى بويىنشا زاڭسىز ارەكەتتەر انىقتالعان جاعدايدا كىنالى تۇلعالاردى جاۋاپكەرشىلىككە تارتۋ ءۇشىن ماتەريالدار سوتقا بەرىلەتىن بولادى.