ۇبت-2019 قالاي ءوتىپ جاتىر؟

2019 جىلى ۇبت 20-30 ماۋسىم ارالىعىندا 169 پۋنكتىنىڭ بازاسىندا ءوتىپ جاتىر. تەستىنى 117 242 ادام تاسپىرادى، ولاردىڭ اراسىندا بيىلعى جانە بىلتىرعى تۇلەكتەر، كوللەدج بىتىرگەندەر بار.

2019 جىلى تەستىلەۋ 16-شى رەت وتكىزىلىپ وتىر. وسى ۋاقىتقا دەيىن ۇبت-نى 1 ميلليون 800 مىڭ ادام تاپسىرعان ەكەن.

ەكى بەيىندى ءپان بويىنشا تەست تاپسىرمالارىنىڭ سانى 30. ونىڭ ىشىندە 20 تاپسىرمانىڭ ءبىر عانا دۇرىس جاۋابىن تاڭداۋ كەرەك، قالعان ون تاپسىرمادا ءبىر نەمەسە بىرنەشە دۇرىس جاۋاپ بولۋى مۇمكىن.

تەست جيناعىندا بارلىعى 120 سۇراق بار. تاپسىرمالاردى ورىنداۋعا 3 ساعات 50 مينۋت بەرىلەدى. تۇلەك ەڭ جوعارى دەگەندە 140 بالل جيناي الادى.

ۇبت كەزىندەگى ءتارتىپ

ۇبت تاپسىراتىن جەرلەردە مەملەكەتتىك كوميسسيالار قۇرىلعان. ونىڭ قۇرامىنا قۇقىق قورعاۋ ورگاندارى، قوعامدىق بىرلەستىكتەر مەن بۇقارالىق اقپارات قۇرالدارىنىڭ وكىلدەرى ەندى.

اۋديتوريالار ۇيالى بايلانىستى ءسوندىرۋ قۇرىلعىلارى جانە ۆيدەوكامەرالارمەن جابدىقتالعان.

ۇبت كەزىندە تۇلەكتەرگە اۋديتوريادان رۇقساتسىز جانە جالعىز شىعۋعا، ورىن اۋىستىرۋعا، تەستىلەۋ ماتەريالىن ايىرباستاۋعا، گادجەتتەردى پايدالانعا تىيىم سالىنادى.

ءتارتىپ بۇزىلعان جاعدايدا تەستىلەۋ قورىتىندىسى جويىلادى.

پرەمەر-مينيستر اسقار مامين ۇبت كەزىندە تۇلەكتەردى تەكسەرۋدى دۇرىس جۇرگىزۋدى تاپسىردى.

ۇبت - 2019: شەكتىك بالل

ۇلتتىق جوعارى وقۋ ورىندارىنا تاپسىرۋعا قاجەتتى شەكتىك ۇپاي - 65 بالل. "پەدوگوگيكا عىلىمدارى"، "اۋىل شارۋاشىلىعى جانە بيورەسۋرستار"، "ۆەتەريناريا" ءبىلىم سالالارى بويىنشا 60 بالدان تومەن جيناۋعا بولمايدى. قالعان جوعارى وقۋ ورىندارىنا ءتۇسۋ ءۇشىن - كەم دەگەندە 50 بالل.

"دەنساۋلىق ساقتاۋ جانە الەۋمەتتىك قامسىزداندىرۋ (مەديسينا)" سالاسى بويىنشا - 65 بالدان كەم ەمەس (ءار پاننەن كەم دەگەندە 5 بالدان جيناۋ قاجەت).

ەگەر وقۋعا تۇسەر كەزدە تالاپكەرلەردىڭ ۇپاي سانى بىردەي بولسا، "التىن بەلگى" يەگەرىنە باسىمدىق بەرىلەدى.

ۇبت - 2019: قورىتىندى قاشان شىعادى؟

ۇبت قورىتىندىسى تەستىلەۋ كۇنى بەلگىلى بولادى. سونداي-اق، ۇلتتىق تەستىلەۋ ورتالىعىنىڭ رەسمي سايتىندا جاريالانادى.

تۇلەكتەر قانشا بالل جيناعانىن @edugovkz_bot Telegram-بوتى ارقىلى بىلە الادى. ول ءۇشىن تالاپكەردىڭ جەكە تەستىلەۋ ءنومىرىن ەنگىزسە بولعانى.

ۇبت-دا اپەللياسياعا قالاي ءوتىنىش بەرۋگە بولادى؟

اپەللياسياعا ءوتىنىش ۇبت قورىتىندىسى جاريالانعاننان سوڭ كەلەسى كۇنى ساعات 13.00-گە دەيىن قابىلدانادى. اپەللياسيا كوميسسياسى ولاردى ءبىر كۇنتىزبەلىك كۇن ىشىندە قارايدى.

ءوتىنىش بەرۋشى اپەللياسيا كوميسسياسىنىڭ وتىرىسىنا كەلمەسە، ونىڭ سۇراعىن قاراستىرمايدى.

ءوتىنىشتى تۇلەكتىڭ ءوزى بەرۋى ءتيىس ءارى ناقتى ءپان مەن سۇراقتى كورسەتىپ، شاعىمىن نەگىزدەۋى قاجەت. كوميسسيا وتىرىسىنا جەكە كۋالىگى مەن تەتىلەۋگە قاتىسۋعا رۇقسات قاعازىن الىپ بارۋ كەرەك.