"حالىق كوممۋنيستەرى" فراكسياسىنىڭ دەپۋتاتتارى مۇگەدەك بالا تاربيەلەپ وتىرعان اتا-انانىڭ زەينەت جاسىن تومەندەتۋدى ۇسىندى دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ.

دەپۋتات ماگەررام ماگەرراموۆتىڭ ايتۋىنشا، وسى ساناتتاعى وتباسىلارعا ارنايى مارتەبە بەرۋ كەرەك. ءسويتىپ، زەينەت جاسىن تومەندەتىپ، جۇمىس ىستەيتىن اتا-انالارعا تاعى ءبىرقاتار جەڭىلدىك بەرگەن دۇرىس.

"ءبىز مۇگەدەك بالانى تاربيەلەپ وتىرعان اتا-انانىڭ زەينەت جاسىن تومەندەتۋدى ۇسىنامىز. سونداي-اق، اتا-انانىڭ بىرەۋىن جۇمىستان ەرتە جىبەرۋ ماسەلەسىن قاراستىرعان ءجون. سەبەبى مۇگەدەك بالاعا تاۋلىك بويى قاراۋ قاجەت. وعان ءبىراز كۇش-جىگەر كەتەدى. پسيحولوگيالىق جۇكتەمە دە از ەمەس"، - دەدى ماگەرراموۆ ءماجىلىستىڭ جالپى وتىرىسىندا.

فراكسيا دەپۋتاتتارى قامقورشىلىقتى راسىمدەۋ ءتارتىبىن دە جەڭىلدەتۋ كەرەك دەپ سانايدى. ويتكەنى قازىرگى كەزدە بۇل پروسەدۋرالارعا 9 ايعا دەيىن كەتەدى. وسى ۋاقىتتىڭ ىشىندە ەشقانداي قارجىلاي كومەك بەرىلمەيدى. وندايدا تولىق ەمەس وتباسىلار قاتتى قينالادى.

قازاقستاندا ايەلدەردىڭ زەينەت جاسىن 2027 جىلعا دەيىن بىرتىندەپ 63 جاسقا دەيىن ۇلعايتۋ جوسپارلانعان. دەگەنمەن، كەيبىر ايەلدەردىڭ زەينەت جاسى وزگەرمەيدى. ولاردىڭ ىشىندە كوپبالالى انالار جانە سەمەي يادرولىق پوليگونىندا تۇرعان ايەلدەر بار.

ماسەلەن، بەس جانە ودان كوپ بالاسى بار ايەلدەر 53 جاستا زەينەتكە شىعا الادى. ال سەمەي يادرولىق پوليگونىنىنىڭ جوعارى رادياسيالىق ءقاۋپى بار ايماقتاردا بەس جىلدان ارتىق تۇرعان ايەلدەرگە 45 جاستا زەينەتكە شىعۋعا رۇقسات بار.