ۇلتتىق ەكونوميكا ءمينيسترى رۋسلان دالەنوۆ ۇستىمىزدەگى جىلدىڭ تامىز ايىنان باستاپ "بيزنەستىڭ جول كارتاسى – 2025" جوسپارى قابىلدانادى دەپ جازادى Qamshy.kz اقپارات اگەنتتىگى.
ونىڭ ايتۋىنشا، جاڭا قۇجاتتارداعى مۇمكىندىكتەرگە سايكەس، كاسىپكەرلەردىڭ اينالىم شىعىنىنا كومەك بەرۋ ماقساتىندا بولىنەتىن قاراجاتتىڭ جالپى قۇنى 60 ميلليون دوللاردان 360 ميلليون دوللارعا دەيىن ارتپاق.
"بۇل كومەكتى باسەكەگە قابىلەتتىلىگى جانە ونىمدىلىگى تومەن كاسىپكەرلەر الا الادى. وسىلايشا ءبىز قازىنادان بولىنگەن قىرۋار قاراجاتتى ۇتىمدى جۇمساپ، ەلدەگى ەكونوميكالىق ءوسۋدى قالىپتاستىرا الامىز"، - دەدى دالەنوۆ.
بۇدان بولەك، ۇلتتىق ەكونوميكا مينيسترلىگى ەلدەگى كەي كاسىپكەرلەردى قارجىلاي ەمەس، ءبىراق ءتۇرلى باعىتتاردا قولداماق. ءمينسيتردىڭ ايتۋىنشا، بيزنەستە جاڭا تەحنولوگيالاردى جەتىك مەڭگەرۋ، ىت-سەرۆيستەردى تولىق تانۋ سىندى دۇنيەلەر ءوز دەڭگەيىندە ەمەس. وسىعان وراي، مينيستر ءتۇرلى كۋرستار مەن بىلىكتىلىكتى ارتتىراتىن تاجىريبەلىك جۇمىستار ۇيىمداستىرۋدى كوزدەپ وتىر.
"جاڭا جول كارتاسىنىڭ جوسپارلارىنا سايكەس، كاسىپكەرلەردگە بەرىلەتىن قاراپايىم نەسيە كولەمىن 20 ميلليوننان 60 ميلليونعا دەيىن ارتتىرۋ كوزدەلۋدە. سونداي-اق، وسى جوباعا ميكروقارجىلىق ۇيىمداردى بانكتەرمەن بىرگە تارتپاقپىز. بۇل جوبانى جۇزەگە اسىرۋعا ايتارلىقتاي ۇلەس قوسادى. قازىرگى ۋاقىتتا شاعىن نەسيە بەرەتىن قارجىلىق ۇيىمدار ورتا جانە شاعىن كاسىپتى قولداۋداعى نەگىزگى قارجى كوزى بولىپ وتىرعانى راس"، - دەدى دالەنوۆ.
سونداي-اق، اتالعان جوبادا نەسيە الۋدىڭ باعىتتارى كەڭەيتىلىپ، فرانشيزالاردى الۋ ماسەلەسى شەشىلگەن جانە سۋبسيدياعا تاعايىندالاتىن سىياقى مولشەرى دە كاسىپكەرلەرگە قولايلى.
"سونىمەن قاتار، جاڭا بيزنەس-يدەيالار ءۇشىن مەملەكەتتەن بەرىلەتىن گرانتتار مولشەرى 3 ميلليوننان 5 ميلليونعا دەيىن ارتادى. "بيزنەستىڭ جول كارتاسى - 2025" باعىتى اياسىندا 30 مىڭنان استام جاڭا جۇمىس ورىنى پايدا بولماق. ال سالىقتىق ءتۇسىمنىڭ كولەمى 1،3 ترلن. تەڭگەگە دەيىن كوتەرىلەدى"، - دەپ ءتۇيدى ءسوزىن مينيستر.
پىكىر قالدىرۋ