ماڭعىستاۋ وبلىسىنىڭ كاسىپكەرلەر پالاتاسىمەن "قازپوشتا" اق موف ەكىجاقتى مەموراندۋمعا قول قويدى. نەگىزگى ماقسات - قازىرگى تاڭدا ۇلكەن قارقىنمەن دامىپ جاتقان ەلەكتروندى ساۋدا نارىعىن ماڭعىستاۋ ءوڭىرى جۇرتشىلىعىنىڭ قولدانىسىنا ەنگىزۋ. زاماناۋي، سۇرانىسقا يە سالانىڭ دامۋىنا سەرپىن بەرۋ. مەموراندۋم اياسىندا مىناداي قىزمەت تۇرلەرى كورسەتىلەتىن بولادى:

- ماڭعىستاۋ وبلىسىنىڭ كاسىپكەرلەر پالاتاسىندا ەلەكتروندى ساۋدا بۇرىشىن اشۋ،

- كاسىپكەرلەردى وقىتۋ،

- كاسىپكەردى تانىمال ساۋدا جۇيەلەرىمەن، الاڭدارىمەن تانىستىرۋ جانە سوندا تاۋارلاردى تىركەۋ،

- وبلىسىمىزدا شىعارىلاتىن تاۋاردى ەكسپورتقا شىعارۋ ادىستەرىن جەتىلدىرۋ.

-ەلەكتروندى ساتۋ ءىسىن دامىتۋ بويىنشا ۇلكەن جۇمىستار اتقارىلاتىن بولادى. الداعى ۋاقىتتا كەلىسىمنىڭ ناتيجەلەرى دە كورىنە باستايدى دەگەن سەنىم بار. كاسىپكەرلەردى وقىتاتىن ءبىزدىڭ ترەنەرلەر وسى قىزمەت تۇرلەرىن ءبىلۋى كەرەك. كۋرس وقىتۋ بارىسىندا بولاشاق كاسىپكەرلەرگە پايدالى اقپاراتتى جەتكىزۋدە قاجەت بولادى، دەيدى وڭىرلىك كاسىپكەرلەر پالاتاسىنىڭ ديرەكتورى نۇربەك قاراسايەۆ.

ال، «قازپوشتا» اق موف ديرەكتورىنىڭ ورىنباسارى ماۋلەن عابدۋلقالييەۆتىڭ ايتۋىنشا، «سيفرلى قازاقستان» باعدارلاماسىنىڭ ءبىر تارماعى - ەلىمىزدە ەلەكتروندى ساۋدا نارىعىن دامىتۋ. ساندىق ساۋدانىڭ ءادىسىن مەڭگەرگەندەر اتاقتى سايتتار ارقىلى تاۋارلارىن ەشبىر كەدەرگىسىز وتكىزىپ وتىر. وبلىستا 8 ينتەرنەت دۇكەن بار. وندا ساۋدا سىلبىر، زات ساتىلمايدى. ماڭعىستاۋ- قولونەر بۇيىمدارىنىڭ ورتالىعى دەسەك تە بولار. سونى نەگە الەمدىك نارىققا شىعارماسقا؟ عالامتوردىڭ كۇشىن پايدالانىپ، قايتالانباس بۇيىمداردى حالىقارالىق ساۋداعا شىعاراتىن قادام شيرىعا تۇسەدى دەگەن ۇمىتتەمىز، دەيدى ول.

وسى ماقساتتا وڭىرلىك كاسىپكەرلەر پالاتاسى عيماراتىندا «قازپوشتانىڭ» ءبىر قىزمەتكەرى وتىراتىن بولىپ شەشىلدى. ول كاسىپكەرلەر مەن ءوزىنىڭ جەكە ءىسىن باستاعىسى  كەلەتىن ازاماتتارعا لوگيستيكا جايىن ءتۇسىندىرىپ، الەمدىك نارىققا جولدى قالاي اشۋعا بولادى، تاۋارلارىن ساتۋ، ءىرى ساۋدا سايتتارىنا تىركەلۋگە كومەكتەسۋ  سياقتى مىندەتتەردى اتقارماق. ءقازىر ءىرى لوگيستيكالىق ورتالىقتار نۇر-سۇلتان، الماتى، اقتوبە قالالارىندا اشىلعان. پوشتانىڭ وسى ورتالىعىن اقتاۋدان دا اشىپ، تاۋار اينالىمىنا سەرپىن بەرۋ جوسپاردا بار. مالىمەتتەرگە جۇگىنسەك، بۇگىنگى تاڭدا ساۋدا، تاۋار اينالىمىنىڭ 30 % عالامتور ارقىلى جۇزەگە اسۋدا. ماڭعىستاۋدا العاشقىنىڭ ءبىرى بولىپ «قازپوشتا» اق ەلەكتروندى ساۋدانى قولعا الىپ جاتىر. پوشتا تەك حات تاسيتىن ەسكىشە قىزمەت ەمەس، قازىرگى زامان تالابىنا ساي، جاڭا ۇلگىدە ەڭبەك ەتۋدە.  قولما قول اقشاسىز تولەم كارتاسىن ەنگىزىپ، بارلىق تولەگەن قاراجاتتىڭ 1 % كەشبەك تۇتىنۋشىعا كەرى تۇسەدى. پوشتاعا قاراستى سۋپەرماركەتتەر جەلىسى اشىلۋدا. قالانىڭ ورتالىقتارىندا وز-وزىنە قىزمەت كورسەتۋ «پوچتامات» ورناتىلىپ، كەز-كەلگەن سىيلىق، تاۋار، تاپسىرىستى لەزدە جەتكىزىپ بەرۋ قىزمەتتەرى دە دامىپ وتىر.

الدا «اتامەكەن» كاسىپكەرلەر پالاتاسىمەن بىرلەسىپ باسقا دا ينستيتۋتتاردى تارتۋ ءۇشىن لوگيستيكا، تاۋار تاسىمالىن سۋبسيديالاۋ جولى قاراستىرىلماق.