ماڭعىستاۋ وبلىسىنا قاراستى ماڭعىستاۋ اۋدانىنىڭ ءتورت جانە اقتاۋ قالاسىنىڭ ءبىر جۇمىسسىز ايەلى قايتارىمسىز قاراجات الاتىن بولدى. بۇل- ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان "ەڭبەك" مەملەكەتتىك باعدارلاماسى اياسىندا جۇزەگە اسىپ وتىر. باعدارلاما قاتىسۋشىلارىنىڭ ءارقايسىسى جاڭا بيزنەس-يدەيالارىن ىسكە قوسۋ ءۇشىن 250 مىڭ تەڭگە كولەمىندە مەملەكەتتىك گرانت الادى. بولاشاق كاسىپكەرلەرمەن ارنايى كوميسسيا مۇشەلەرى ماڭعىستاۋ وبلىسى «اتامەكەن» كاسىپكەرلەر پالاتاسىندا كەزدەستى. سولاردىڭ ءبىرى - جانار ىبىرايەۆا. ول ءۇش بالانىڭ اناسى. ۇزاق جىلدار جۇمىسسىزدار قاتارىندا. ورتالىقتان شالعاي ورنالاسقان اقشىمىراۋ اۋىلىندا 200 ءتۇتىن بار. شاعىن اۋىلدان جۇمىس تابۋ وڭاي ەمەس. سوندىقتان دا ول شاعىن كونديتەر سەحىن اشۋدى جوسپارلايدى. اۋىلدا تاتتىلەر پىسىرەتىن بىردە-بىر كاسىپكەر جوق. ءقازىر ۇيدە تاپسىرىس قابىلداپ ءجۇر. گرانت ارقىلى الاتىن 250 مىڭ تەڭگەگە زاماناۋي ەلەكتر پەشى، ميكسەر، ءتاتتى توقاشتاردىڭ قالىپتارى سىندى قۇرال-جابدىقتار الماقشى. «باستاۋ» جوباسىنىڭ تۇلەگى.

ال، جانار قاراسايەۆا شەتپە اۋىلىنان تىگىن شەبەرحاناسىن اشقىسى كەلەدى. كورپە-توسەك تىگۋدى بالا كەزدەن ادەت قىلعان انا ەندى ونى كاسىپ كوزىنە اينالدىرعىسى كەلەدى. گۇلجيحان امانعالييەۆا بولسا، شەتپە اۋىلىنان سۇلۋلىق سالونىن اشۋدى جوسپارلايدى. عيماراتتى جالعا الىپ، ءبىر ادامدى جۇمىسپەن قامتۋ ويىندا بار. بەت بوياۋ كاسىبىمەن ءبىر اپتادا 16 ادامدى، ايىنا شامامەن 65 ايەل قابىلداپ، 100 مىڭ تەڭگەدەن استام تابىس تاباتىنىنا سەنىمدى.

اقتاۋلىق جانەركە قۇرمەت قىزى فوتو-ۆيدەو قىزمەتىن ۇسىنباقشى. 250 مىڭ تەڭگەگە مونتاج جاساۋ ءۇشىن اسا قاجەتتى نوۋتبۋك، جادى كارتالارىن الادى. ەكى بالانىڭ اناسى پەرزەنتحانادان شىعارۋ ساتىنەن بەينە-فوتو ەستەلىكتەرىن كاسىپكە اينالدىرماق. ءقازىر ادامداردىڭ تالعامى وزگەردى. نارەستەنىڭ دۇنيەگە كەلۋ ساتىنەن باستاپ ۆيدەوعا تۇسىرۋگە تاپسىوىس بەرىپ جاتادى. سودان ۇيىنە شىققانعا دەيىنگى ارالىقتان فوتو-ۆيدەو توپتاما جاسايمىن. مۇننان باسقا ماڭعىستاۋداعى تۋريزم باعىتىن ەستەلىككە قالدىرعىم كەلەدى. تۋريستەردى وڭىردەگى نەبىر ادەمى جەرلەرگە ساياحاتقا اپارىپ، اۋليەلى ورىنداردان قايتالانباس كادرلار جاساۋعا بولادى،- دەيدى فوتوگراف قىز.

كوميسسيا ءتوراعاسى سەرىك گۋسمان: «بۇگىنگى كوميسسيا وتىرىسىندا قارالعان 5 ايەلدىڭ دە جوبالارى ماقۇلداندى. بارلىعى دا جۇمىسسىز جاندار. وتباسىنا ءناپاقا تاۋىپ، كاسىپ باستاسا ۇلكەن ءىستىڭ بىتكەنى. «باستاۋ» جوباسىمەن ءبىلىم العان بەسەۋ شاعىن بيزنەستىڭ دامۋىنا ات سالىساتىن بولادى. ءارقايسىسىنا بەرىلەتىن 250 مىڭ تەڭگە قايدا جۇمسالدى؟ ولاردىڭ العان قۇرال-جابدىقتارى جاساعان كاسىپتەرى ءبىر جىل بويى تەكسەرىلىپ وتىرادى. «اتامەكەن» كاسىپكەرلەر پالاتاسى الەۋمەتتىك جاعدايى از قامتىلعان ايەلدەردىڭ اياققا تۇرىپ كەتۋىنە ۇلكەن مۇمكىندىك جاساپ وتىر»،- دەيدى.

باعدارلاما قاتىسۋشىلارى ءبىراۋىزدان «اتامەكەندىكتەرگە» العىس ايتىپ، كاسىپتىڭ ءناسىبىن كورەتىن كۇنگە از قالدى دەپ قۋاندى.