الماتىدا ەلباسىنىڭ قاتىسۋىمەن "كەمەڭگەرلىكتىڭ 30 جىلى" اتتى حالىقارالىق كونفەرەنسيا ءوتتى دەپ حابارلايدى Qamshy.kz اقپارات اگەنتتىگى اقورداعا سىلتەمە جاساپ. 

ول كونفەرەنسيادا سويلەگەن سوزىندە ەلىمىزدىڭ ءبىرىنشى باسشىسى لاۋازىمىنداعى بۇكىل قىزمەتى قازاقستاندى دامىتۋعا ارنالعانىن اتاپ ءوتتى.

نۇرسۇلتان نازاربايەۆ الەمدىك دامۋ ۇدەرىسىنە اسەر ەتەتىن ستراتەگيالىق سىن-قاتەرلەردىڭ بىرنەشە توبىن اتاپ كورسەتتى. اتاپ ايتقاندا، قارقىندى ءارى ۇزدىكسىز تەحنولوگيالىق تولقىن، كەزەكتى يندۋستريالىق ريەۆوليۋسياعا بايلانىستى ەكونوميكالىق پاراديگمانىڭ اۋىسۋى، الەمدەگى گەوساياسي جاعدايدىڭ وزگەرۋى، ءتۇرلى سيپاتتاعى جاھاندىق دەڭگەيدەگى قاقتىعىس.

"تاۋەلسىزدىكتىڭ قانداي قيىنشىلىقپەن كەلگەنىن زەرتتەمەيتىن، بىلمەيتىن جاستار بۇگىنگى ەركىن كۇنىنەن، ازات وتانىنان ايىرىلىپ قالاتىنىن تۇسىنە بەرمەيدى.مەملەكەت بۇعان جول بەرمەۋى قاجەت. بۇكىل حالىق بولىپ بىرلىكتى، تىنىشتىقتى قولداۋ كەرەك. قازاق ءدال بۇگىنگىدەي ءومىردى ەشقاشان كورگەن جوق. ايىرىلىپ قالمايىق. مەنىڭ ەلىمە ايتاتىن نەگىزگى وسيەتىم وسى. ۇلى ابايدىڭ «ءبىرىڭدى، قازاق، ءبىرىڭ دوس كورمەسەڭ – ءىستىڭ ءبارى بوس» دەگەنى دە وسى بولار. ۇمىتپايىق. حالىق پەن پرەزيدەنت ءاردايىم بىرگە"، - دەدى نازاربايەۆ.

نۇرسۇلتان نازاربايەۆ مەملەكەتتى قۇرۋ جولىنداعى جانە ەگەمەندى ەلدى قالىپتاستىرۋداعى قيىندىقتار تۋرالى ايتتى. سونىڭ ىشىندە، قازاقستاننىڭ تۇڭعىش پرەزيدەنتى توقسانىنشى جىلداردىڭ باسىندا ەلىمىزدەگى ۇلتتىق ەكونوميكانىڭ قيراۋىنا، ەتنوسارالىق قاقتىعىستاردىڭ پايدا بولۋ قاۋپىنە بايلانىستى جاعداي جونىندە ايتتى.

"قازاقستان دەموگرافيالىق قۇلدىراۋ شەگىندە تۇردى. 1989 جىلعى حالىق ساناعىنا سايكەس، بايىرعى حالىق – قازاقتار 39 پايىز نەمەسە 6،5 ميلليوننان ءسال عانا استام ادام بولدى. سول كەزەڭدەگى اۋىر ەكونوميكالىق احۋال حالىقتىڭ قازاقستاننان كوپتەپ كوشىپ كەتۋىنە الىپ كەلدى. ول جىلدارى ورتاشا ءومىر ءسۇرۋ جاسى 5 جىلعا قىسقاردى، تۋۋ كورسەتكىشى بىردەن تومەندەدى"، – دەدى نۇرسۇلتان نازاربايەۆ.

"مەنىڭ اعا بۋىن وكىلدەرىنە ايتارىم، سىزدەردىڭ دانالىقتارىڭىز جاستاردىڭ دۇرىس جولمەن جۇرۋىنە، وتاندى سۇيۋىنە، مەملەكەتتى نىعايتۋىنا، تاۋەلسىزدىكتى قورعاۋىنا جانە جارقىن بولاشاق ءۇشىن ەڭبەك ەتۋىنە جاردەمىن تيگىزۋى ءتيىس. ورتا بۋىن وكىلدەرىنە ايتارىم، سىزدەردىڭ جيناعان تاجىريبەلەرىڭىز – قيىندىقتاردى ەڭسەرۋ جولىندا بارىمىزگە كومەگى تيەتىن باعا جەتپەس كاپيتال. ال، جاستارىمىزعا ايتارىم، جاقسى ءومىر ءسۇرۋدىڭ ءبىر عانا جولى بار – ول ەڭبەك ەتۋ. ەلىمىزدىڭ كەلەشەك جولىن سىزدەر انىقتايسىزدار، – دەدى ەلباسى.