Qamshy.kz اقپارات اگەنتتىگى "وسىناۋ قۇندى دۇنيەلەردى زامانۋي ناقىشقا كەلتىرىپ، ىقشام ەتىپ، كۇندەلىكتى كيە الاتىنداي ءونىم جاسالسا، اتتەڭ، كيەر ەدىك-اۋ" دەگەن قانداستاردىڭ سۇرانىسىن قاناعاتتاندىرۋعا قاۋقارلى تىگىن سەحىنىڭ، دۇكەننىڭ بار ەكەنىن ءدۇيىم جۇرتقا جاريا ەتۋدى ءجون كوردى.
ەل نارىعىندا جۇرگەنىنە 8-9 جىل شاماسىنداعى ۋاقىت وتكەن ابىرويلى كومپانيا، بەدەلدى Abyroikz.kz دۇكەندەر جەلىسىنىڭ باسشىسى ايدار ماسىمعازىمەن بولعان سۇحبات، قۇرمەتتى وقىرمان، ءسىزدىڭ نازارىڭىزدا.
***
ابىرويدىڭ باسشىسىنان سۇحبات الامىن دەگەن ويمەن كۇن نايزا بويى كوتەرىلە سول باعىتتى بەتكە الىپ تارتىپ وتىردىق. قوس قاباتتى عيماراتىنىڭ باسپالداعىنان وتكەندە-اق ءبىز تاڭ ساناپ جۇرگەن ۋاقىتتا بۇل جەردىڭ تىرشىلىگى قىز-قىز قايناپ جاتقانى كورىنىپ تۇردى.
قاسيەتتى جۇما كۇنىنە ءدوپ كەلگەن بۇل اڭگىمەنىڭ قايىرى ەرەك بولار دەپ باسشى كابينەتىنىڭ ەسىگىن قاعىپ، رۇقسات سۇراپ، ىشكە ەندىك.
"سىرت كوز سىنشى" دەگەن قازاقتىڭ ءسوزى بار. توبەسىندە ەلىمىزدىڭ كوك بايراعى ىلىنگەن ءيمانجۇزدى اعانىڭ اڭگىمەدەن اۋلاق ەمەستىگى، كىشىپەيىلدىلىگى كوزگە ۇرىپ-اق تۇر. "ءيا، ءسات!" دەگەننەن-اق اڭگىمە تيەگى اعىتىلىپ جۇرە بەردى. بالا كەزدىڭ قىزىعى ءبىر بولەك، كاسىپ باستاعانداعى ماشاقاتى ءبىر بولەك، ايتەۋىر، ديكتوفونداعى قىزىل باتىرمانى باسقاندا ساعات جارىمنان اسا ۋاقىت وتكەنىن ءبىر-اق بىلدىك.
ەندەشە قامشى اقپارات اگەنتتىگىنىڭ ءتىلشىسى مەن Abyroikz.kz باسشىسىنىڭ اڭگىمەسىن ءارى قاراي وقي بەرىڭىز، ءبىز جازا بەرەلىك.
***
- ايدار اعا، ۇلتىن قۇپ كورمەيتىن قانشا ۇلىق، قانشا قالتالىنى كوز كورىپ ءجۇر. كاسىپتىڭ مۇددەسىن ءبىر، ۇلتتىق رۋحتىڭ مۇددەسىن ەكى ەتىپ، ابىرويلى كاسىپتىڭ تىزگىنىن ۇستاپ وتىرعان ازاماتتىڭ بالالىق شاعىنان باستاساق اڭگىمەنى...
- ۇيدە توعىز اعايىندى بولدىق. مەن – كەنجەسىمىن. الدىمەن، وسى كۇنگە جەتكەنىمە اللاعا شۇكىرلىك ايتقىم كەلەدى. ەكىنشىدەن، مەنى ومىرگە اكەلگەن اكە-شەشە، مەن وسكەن ورتا جاقسى بولدى.
مەن مەكتەپ وقىپ جۇرگەندە الدىمداعى ءىزاشار اعا-اپالارىمنىڭ الدى وتباسى قۇرىپ، كەيىنگىلەرى ستۋدەنت اتانىپ ۇلگەرگەن. ءوزىڭ بىلەسىڭ، 90-جىلدارداعى تارشىلىق ەلدى ءبىرشاما تيتىقتاتتى. اتا-انام وسىعان قاراماستان، اعايىندارىمنىڭ بارلىعىن شاما-شارقى جەتكەنشە وقىتۋعا تىرىستى. سول قيىن كەزەڭدەردە ءبىرلى-جارىم جاڭا كيىنگەنىمىز بولماسا، ۇيدە جۇرگەننەن كەيىن اسقازاننىڭ ەسەبى تۇگەل بولعانىمەن، الدىڭعىلاردىڭ كيگەنىن كيىپ وستىك.
بالالىق شاقتىڭ كۇللى سيۋجەتىن سۋدىراتا بەرگەن كوپشىلىككە قىزىق بولا قويماس. مەن بىر-ەكى جاعدايدى ايتىپ بەرەيىن. ءالى كۇنگە دەيىن وسى دۇنيەلەر مەنىڭ كاسىپكەر اتانۋىما سەبەپ بولدى دەپ ويلاپ قويامىن. دەگەنمەن، ءبارى اللانىڭ قالاۋىندا عوي.
"كوممەرسانت" ايداردىڭ العاشقى ساۋداسى...
مەكتەپتە التىنشى سىنىپ وقىپ جۇرگەندە باستالدى بۇل باعىتتاعى العاشقى جۇمىستارىم. التىنشى سىنىپتا وقيمىز. سىنىپ جەتەكشىمىز، بىزگە بىلىمنەن بولەك تاربيە بەرىپ، سول قيىن-قىستاۋ ۋاقىتتاردا ءجونىمىزدى تابۋىمىزعا ءجون سىلتەگەن اپايىمىز بولدى. ەسىمى – جۇمانوۆا رىسكۇل.
سودان نە كەرەك، التىنشى سىنىپتى ءتامام قىلعان سوڭ ورتا ازياعا، مىناۋ تاشكەنت، سامارقان، تۇركىستان، بۇقارا سياقتى تاريحي قالالارعا ساياحاتتاماق بولدىق. رىسكۇل اپايىمىزدىڭ بىزگە قويعان تالابى – سول ساياحاتقا جۇمسالاتىن اقشانى ءوزىمىز تابۋىمىز كەرەك.
"قالاي تابامىز؟"
ءدال وسى سۇراق سانامىزعا سوققى بەرگەن توپ بالا شۋ ەتە قالدىق. اپايىمىز ءوز جوسپارىن ايتتى.
جىل سايىن ءبىزدىڭ اۋىلعا تاۋىقتىڭ شوجەسىن الىپ كەلەتىن. اپايىمىز سول شوجەلەردى ساتىپ الىپ ءوسىرۋدى ۇسىندى. قۇپ! بالاپاندى دا الدىق. بارىنە ۇلەستىرگەندە ماعان تيگەنى – شيكىل سارى جەتى بالاپان.
جەتى شوجەمە جاعداي جاساۋ – مەنىڭ بار ماقساتىمنىڭ باستاۋىنداي كورىندى. ساباقتان كەلە سالا سولارعا جەم-سۋ بەرىپ، يت-مىسىق جەپ كەتپەۋىنە الاڭداپ جۇرگەندە ولار دا قاراقاناتتانىپ قالدى. كەيىن الگى شوجە الىپ، وسىرۋگە ۋادە بەرگەن قاتارلارىمنان سۇراسام، ءبىر دە بىرەۋىندا ءتىرى شوجە قالماعان. بىرىنىكىن يت جەگەن، بىرەۋىنىڭ بالاپانى سۋعا ءتۇسىپ ولگەن...
ەندى ساياحاتقا بيلەت الۋ ءۇشىن الگى جەتى تاۋىعىمدى ساۋدالاۋىم كەرەك قوي. ءارى ەسەپتەپ، بەرى ەسەپتەپ، جەتەۋىن شيقىلداتىپ اپارىپ ساتىپ جىبەرگەنمەن بيلەتكە قالتاماداعىنىڭ قاۋقارى جەتە قويمايتىنىن بايقادىم. سودان نە كەرەك، سويىپ، ەتىن ساتسام با دەپ ءبىر ويلاندىم. ءبىراق ودان تۇسەر پايدانىڭ دا شامالى ەكەنىنە كوزىم جەتتى.
قىسقاسى، ويلانىپ-تولعانىپ ءجۇرىپ، تاۋىقتاردى سويىپ، ونىڭ ەتىنەن مانتى جاساپ، سول مانتىنى تۇيىرلەپ ساتقاندى ءجون سانادىم. قۇپ!
مانتىنىڭ ماشاقاتى...
ۇلكەن اپالارىمىز تۇرمىس قۇرىپ كەتكەن ۋاقىت – بۇل. اناما ايتىپ، نان يلەپ بەرۋىن سۇرادىم دا، ءوزىم الگى تاۋىقتاردى جايلاي باستادىم. ءبىر تاۋىقتىڭ ەتىنەن ەكى رەت مانتى جاساۋعا بولادى ەكەن.
بۇل جوسپارىمدى ۇيدەگىلەردەن بولەك، رىسكۇل اپايدان وزگە ەشكىم بىلمەيدى. سول كىسىگە ويىمدى جاي جەتكىزدىم. ول كىسى مەكتەپتەن رۇقسات الىپ بەرەتىنىن ايتىپ، قولداي كەتكەنى. سودان ەندى ارتقا قارايلار جول جوق. ءۇشىنشى ساباقتان كەيىنگى ۇلكەن ۇزىلىستە دايىن تۇرعان قوس ىدىستاعى مانتىمدى "قۇلاعىنان سۇيرەپ" مەكتەپتىڭ كىرەبەرىسىنە الىپ كەلدىم. قوڭىراۋ سوعىلدى. جۇرەكتىڭ سوعىسى قوڭىراۋدان دا قاتتى ەستىلىپ تۇر. "ايدار سارت بولىپ كەتىپتى" دەگەن سوزدەردىڭ جەلدەي ەسەتىنىن ويلاعاندا، ءبىر قىزارىپ، ءبىر بوزاردىم. (كۇلىپ)
الگى مانتىمدى ۇستەل استىنا جاسىرىپ قويعانمىن. ءبىراق ونىڭ ءيسىن جاسىرا المايدى ەكەنمىن عوي. ۇزىلىسكە جۇگىرىپ شىققان بالالار الگى ءيىستى ىزدەپ، اۋا يىسكەلەپ تۇرا قالماسى بار ما؟! سودان ايتەۋىر رىسكۇل اپايىم ىسكە ارالاسىپ، العاشقى ساۋدا كۇنىمدى ءساتتى وتكىزگەنمىن. بارلىق تاۋىعىمدى مانتى قىلىپ، قالتامدى ءبىراز قامپايتقانمىن.
كەيىننەن سول اقشالار ۇيدە كەي دۇنيەلەرگە قاجەت بولىپ، جۇمسالىپ كەتتى. ءسويتىپ، شوجە اسىراپ تاۋىق ەتتىم، ول مەنى ساياحاتقا اپارمادى.
نارىنقولدا ءوسىپ، پويىز كورمەگەن مەنى شوجە باقپاي-اق ساياحاتقا بارىپ كەلگەن بالالاردىڭ سۋرەتتەرى قاتتى قىزىقتىردى. ءبىرشاما ۋاقىت ىشتەي قاپا بولىپ ءجۇردىم. كەيىن وسى ارمانىمدى قالاي دا جۇزەگە اسىرامىن دەپ سەرت ەتكەنمىن. اللاعا شۇكىر، وسى ۋاقىتقا دەيىن دۇنيەجۇزىنىڭ بىرنەشە تۇكپىرىنە تابانىمىز ءتيدى.
جاپون جەرىن كورگىم كەلدى. باردىق. ءبىزدىڭ كومپانيا شىعىستاعى شالعاي جەردە التى اي جۇمىس جاسادى. يتاليادا بولدىق. بۋداپەشتى كورگىم كەلىپ، ۆەنگرياعا جول ءتۇستى. بابالارىمىز ەرلىكپەن باسىپ العان بەرلينگە بارىپ، قوشقاربايەۆ اتامىز تۋ تىككەن رەيحستاگتى كوردىم. شۇكىرشىلىك.
ءقازىر ويلايمىن، وسىلاي ازيا، ەۋروپا ەلدەرىنە جول سالىپ جۇرگەنىم كەزىندەگى سول پويىزعا ءمىنىپ، تاشكەن اسا الماعان اسىل ارماننىڭ ناتيجەسى دەپ. ارمانىمدى ويناتىپ، كاسىپتىك يدەيا بەرگەن ۇستازىم رىسكۇل تاتەيگە اللانىڭ نۇرى جاۋسىن!
ورىندالعان ارمان نەمەسە ءبىر قوراپ شايدىڭ حيكاياسى
11-سىنىپ وقىپ جۇرگەندە مەن ساۋدامەن تولىققاندى اينالىسا باستادىم. قالادا تۇراتىن دوسجان دەگەن اعام اۋىل تۇرعىندارىنا قاجەت بولاتىن دۇنيەلەردى سالىپ جىبەرەتىن. سولاردى كۇتىپ الىپ، اۋىلداعىلارعا ساتا باستادىم. شاي، وسىمدىك مايى، سابىن دەگەن سياقتى دۇنيەلەر عوي. سولاردى تۇستەن كەيىن كوشەگە الىپ شىعىپ، ساتاتىنمىن.
مەكتەپتە وقىپ جۇرگەن سوڭعى جىلدا ورىس تىلىنەن ساباق بەرەتىن ساۋلە راحيموۆا دەگەن ءمۇعالىمىمىز بولدى. سول كىسى ءبىر رەت مەنەن شاي سۇراپ، مەن وعان قارىزعا بەرە المايتىنداي بولىپ، ايتەۋىر ءسوزبۇيداعا سالىپ ءبىرشاما ءجۇرىپ قالدىم.
ءبىر كۇنى ورىس ءتىلى ساباعىندا سول كىسى مەكتەپ بىتىرگەننەن كەيىن نە ىستەيتىنىمىز تۋرالى شىعارما جازۋعا تاپسىرما بەردى.
ءارى ويلانىپ، بەرى ويلانىپ شالا ورىسشامدى قامشىلاپ، ايتەۋىر كەلەسى ماتىندەگىدەي ءسوز جازىپ شىقتىم.
"پوسلە وكونچانيە شكولى پوستۋپليۋ ۆ ۆۋز. ەسلي ۆدرۋگ پو نەكوتورىم وبستوياتەلستۆام نە پولۋچيتسيا، بۋدۋ دو كونسا زانيماتسيا س كوممەرسيەي. بۋدۋ وتكرىۆات تورگوۆىي دوم ۆ اۋلە. نازۆانيە – ماس (ءماسىمعازى ايدار سابەت ۇلى).
دوروگايا، ساۋلە راحيموۆنا! ۆى نە وبيجايتەس! كوگدا يا وتكرويۋ ماگازين، يا ۆام كوروبكۋ چايا بەسپلاتنو دام".
وسىلاي جازدىق تا شىعارمامىزدى وتكىزدىك. جيناپ العان ءمۇعالىم ءبارىن وقىپ وتىردى دا ءبىر كەزدە ىشەك-سىلەسى قاتىپ كەپ كۇلسىن. مەنىڭ قاعازىمدى ۇستاعانىن ءبىلىپ وتىرمىن. ۇيات تا قىسىپ بارادى. سول جەردە ونى بالالارعا وقىپ بەرىپ، العىسىن جاۋدىرىپ جاتىر عوي.
سودان نە كەرەك، مەكتەپتى دە ءتامامدادىق. ءوزىم الگى ورىس ءتىلى ساباعىندا جازعانداي وقۋعا تۇسە المادىم. ساۋداممەن اينالىسا بەردىم. كۇتكەن دۇكەنىمىز دە اشىلدى. سول جىلى جازدا ساۋلە اپايىمىز اۋىلدان كوشىپ كەتتى.
ارادا ءبىرشاما ۋاقىت وتكەن. ءبىر كۇنى ءبىر تويدا جۇرسەم، ساۋلە اپايىمىز دا كەلىپتى. اپايدى كورە سالا ەسكى ۋادە ەسكە ءتۇسىپ، تويدى تاستاي سالا ۇيگە قاراي قۇستاي ۇشتىم. دۇكەنگە كىرىپ، ءبىر قوراپ شايىمدى كوتەرىپ، اپايدىڭ قوناققا تۇسكەن ۇيىنە تاۋىپ بارىپ، وڭاشا شىعارىپ الدىم. الدىنا كولىكتەن ءبىر قوراپ شايىمدى شىعارىپ قويدىم دا بار جاعدايدى ول كىسىنىڭ ەسىنە ءتۇسىرىپ ايتا باستاعاندا-اق جىلاعان كۇيى قۇشاقتاي الدى. ەكەۋمىز ءبىر جىلاسىپ، ءبىر كۇلىسىپ تابىستىق سولاي.
ول كىسى الگى مەن ۋادە ەتكەن قوراپ شايدا باس تارتپاسى بار ما؟! قىمبات دەدى، قاجەت ەمەس دەدى. مەن دە تابانداپ تۇرىپ الىپ، الماسا رەنجيتىنىمدى ايتىپ، ايتەۋىر قولىنا تابىستادىم. سول كەزدە سىنىپتىڭ الدىندا بەرگەن ۋادەم كوپ ۇزاماي ورىندالعان. مىنە، بۇل دا جاس كەزدىڭ ەنشىسىندە قالعان جىلى ەستەلىكتەردىڭ بىرەۋى.
- راسىندا، اعا، كىشكەنتايدان بۇل سالاعا ارالاسىپ، سۇيەگىڭىز ەرتە قاتايعان ەكەن. Abyroi.kz دۇكەنى نەشىنشى جوباڭىز؟ بۇگىنگى تاقىرىپتىڭ توڭىرەگىنە ورالساق...
- اۋىلدا دۇكەن اشتىق. ونى جۇرگىزدىك. 2004 جىلى ايەلىم قۇرالايمەن شاڭىراق كوتەردىك. سوسىن اقىرىنداپ قالانىڭ كاسىبىنە ارالاسۋ قاجەتتىلىگى تۋعانىن ءتۇسىندىم.
ايەلىم ەكەۋمىز قالادان سۋۆەنير ساتاتىن دۇكەن اشىپ، ونىڭ فيليالى رەتىندە ەلوردادان دا ءبىر دۇكەن اشتىق. وسىلاي كىشكەنە قانات جايىپ كەلە جاتقان مەزگىلدە مينيسترلىكتەن حات كەلىپ ءتۇستى. 2005 جىلى جاپونيادا وتەتىن EXPO-عا قاتىسۋ تۋرالى. كەزىندە نۇر-سۇلتان قالاسىنداعىداي ەمەس، بۇل كورمەنىڭ اۋقىمى كەڭ ەدى. ءۇزىلىسسىز التى اي بويى بولاتىن. ول جاققا الىپ باراتىن تاۋارلاردى باسقا دۇكەندەردەن ءبىر ايعا قارىزعا الىپ، زاتتارىمىزدى جيناقتاپ، شەكاراداعى، تاسىمالداعى قانشاما ماسەلەلەردى شەشىپ، جەتتىك ايتەۋىر جاپون جەرىنە. سول جەردە ءبىزدىڭ ۇلتتىق ناقىشتاعى دۇنيەلەرىمىزدىڭ بارلىعى جاپون حالقىنىڭ اسا قىزىعۋشىلىعىن تۋعىزىپ، سول ساپاردان ولجالى قايتتىق.
ول ساپاردان ورالعان كەزدە، وسى كاسىپتەردى ەندى-ەندى باستاپ كەلە جاتقان كەزدە مەنىڭ جاسىم 24-25 شاماسىندا ەدى. ول كەزدە بىردەن ءىرى سەح اشاتىنداي قاۋقار جوق. الماتىنىڭ ىرگەسىندەگى ىرگەلى دەگەن اۋىلدان جەر تەلىمىن الىپ، سول جەردەن ءۇي سالدىم. سول ءۇيدى سەح رەتىندە پايدالاندىم. ەندى قيىن بولدى. نەسىن ايتايىن، قالاداعى كەپتەلىستە تۇرىپ، ودان كەيىن اۋىلدىڭ ناشار جولىمەن ءوندىرىس ورىنىنا كۇنىنە بىرنەشە مارتە قاتىناپ-اق شارشايتىنمىن.
"سۋم" ساۋدا ورتالىعىندا ءبىزدىڭ ساۋدا نۇكتەمىز بولدى. وعان تاۋاردى الىپ بارۋ، ىرگەلىگە قايتا كەلۋ قيىن-اق ەدى. شۇكىر، ءقازىر بۇل قيىندىقتاردان وتتىك. ايەلىم ەكەۋمىزدىڭ كۇندىز-تۇنى ۇيىقتاماي جاساعان قىزمەتىمىزدىڭ ناتيجەسى كورىنىپ كەلەدى.
- سىزدەردىڭ ونىمدەرىڭىزگە زەر سالساق، ساپا مەن تۇستەر گارمونياسىنىڭ ۇتىمدى ۇشتاسقانىن بايقايمىز. ۇلتتىق كيىم ۇلگىسىندەگى وسىنداي ىلگەرى قادام كىمنىڭ ىقپالىمەن، كىمنىڭ يدەياسىمەن جاسالدى؟
- جۇمىستى باستار كەزدە ءبىز ءوز باعىتىمىزداعى بارلىق ونىمدەردى سارالاپ شىقتىق. كوزدىڭ، كوڭىلدىڭ سۇزگىسىنەن وتكىزدىك. سولاردىڭ ارتىقشىلىقتارىن، كەمشىلىكتەرىن كورىپ، ءوزىمىزدىڭ دۇنيەمىزدى جاساعانبىز. بىرىنشىدەن، ءبىزدىڭ ونىمدە قانداي دا ءبىر ارتىقشىلىق بولسا، ول ۇجىمدىق تالعامنىڭ، ءبىزدىڭ تۇتىنۋشىلارىمىزدىڭ بيىك تالعامىنىڭ ارقاسىندا.
ادام ءوزى قالاعان نارسەنى كوز الدىنا ەلەستەتە الادى. ءبىز دەر ۋاقىتىندا قاجەت دۇنيەنى جاساي الدىق. جانە ءبىز جاساعان ءونىم تۇتىنۋشىلار تاراپىنان ءوزىنىڭ لايىقتى باعاسىن الىپ كەلەدى دەپ ويلايمىن.
باستى ماقسات – تۇتىناتىن ادامعا ۇيلەسىمدى بولۋى، وعان ۇناۋى. اقشا ەكىنشى ورىندا. سالىستىرمالى تۇردە تالعامىن قاناعاتتاندىرا السا، مىنە، وسى – ەڭ ۇلكەن جەتىستىك.
- ءوزىڭىز جاپونيا جەرىن كورىپ كەلدىم دەدىڭىز. ەكونوميكاسى بىزدەن بىرنەشە جىل العا وزعان ەلدەن كەلىپ، ساۋدانىڭ قايناپ تۇرعان ورتاسىنا تۇسپەي، نەگە ۇلتتىق كيىم ءوندىرۋ ىسىنە كەلدىڭىز؟ قورقىنىش بولمادى ما؟ الدە بەلگىلى ءبىر تاۋار وتكىزەم دەپ كوزدەگەن نۇكتەلەرىڭىز بولدى ما؟
- جاپوندار ەكونوميكالىق الەۋەتى ارتىپ، الەمدەگى كوشباسشى ەلدەردىڭ بىرىنە اينالىپ وتىرسا دا، وزدەرىنىڭ ۇلتتىق يدەولوگياسىنىڭ قازىعىنان شىلبىر ءۇزىپ كەتپەگەن. ولار توي-تومالاعىنا دا، جيىنىنا دا سول كويمونوسى مەن اياقتارىنا ءتورتبۇرىشتى اياق كيىمدەرىن كيىپ الادى.
ءبىزدىڭ ۇلتتىق كيىمدەرىمىز تاماشا. وزگەلەر قىزىعىپ تا، قىزعانىپ تا قارايدى. ءبىراق سول ۇلتتىق قۇندىلىقتارىمىز ساندىق تۇبىندە، قورجىن باسىندا عانا جۇرەتىن حالگە جەتكەن.
بۇل ءوندىرىستى اشقانداعى باستى ماقسات سول – ۇلتتىق ناقىشتاعى ءھام زاماناۋي ستيلدەگى كيىمدەر جاساپ شىعارۋ. ۇلتتىق كيىمدەرىمىزدى جانداندىرۋ ارقىلى ەلدىڭ رۋحىن، ۇلتتىق بولمىسىن، ەڭسەسىن كوتەرۋ. ءوزىنىڭ ءتۇپقازىعىنا جاقىنداعان ۇرپاقتىڭ بويىندا اۆتوماتتى تۇردە ۇلتتىق رۋحى ويانا باستايدى.
راس، مەنىڭ تاۋارىمدى ەلدىڭ بارلىعى جاپپاي الادى دەپ ويلاعان جوقپىن. سونىمەن قاتار، جالداعان جۇمىسشىلارىمنىڭ ەڭبەكاقىسىن تولەۋ، تاۋاردى وتكىزۋ، ونى ەلدىڭ قالاي قابىلدايتىندىعى تۋرالى كوپ ويلاندىم. ءبىراق وزىمە سەندىم. ويتكەنى، ءبىزدىڭ ەلدە مەن سياقتى ويلايتىن، تالعامى مەنىمەن ۇقساس ادامدار بار عوي، تابىلادى عوي. ءوزىم دە كەزىندە جاپونياعا الىپ باراتىن دەنى ساۋ ۇلتتىق كيىم تاپپاعانمىن. تابانىمنان توزىپ، ەلدەگى ءبىرشاما بازار، ساۋدا ورتالىقتارىن ءسۇزىپ شىقتىم. ساپالى دۇنيە جوق. ەگەر سول ساپالى دۇنيەنى مەن جاساسام، الاتىن ادام تابىلادى دەگەن وي باستى نەگىز بولدى.
- مىنا نارسە قىنجىلتادى. ۇلتتىق بولمىسىمىزدىڭ كورىنىسى رەتىندە جۇرەتىن ەتنوقۇندىلىعىمىز – ۇلتتىق كيىم-كەشەك. وسىلاردىڭ شاڭ باسىپ، ساندىق تۇبىندە تىعىلىپ جاتقانىنا قانشا ۋاقىت ءوتتى. ءبىراق ءالى ءبىر كۇندەلىكتى تۇرمىستىق قولدانىسقا ەنگىزە الماي كەلە جاتىرمىز. قالاي ۇلتتىق كيىمدەرىمىزدى برەندكە اينالدىرساق بولادى؟ سىزدەر بۇل باعىتتا قانداي جۇمىس جاساپ جاتىرسىزدار؟
- راس، بىزدە ءالى سول ەسكىلىكتى قالدىعى بار. سانامىزدى. تاقيا مەن شاپان قارتتار ءۇشىن دەگەن ىسپەتتى. ءبىراق ءبىز بەن ءسىز، جاستار كورىپ جۇرگەن قىرعىز ءپىشىپ، جۇڭگو تىككەن شاپاندار قولايسىزداۋ. ۇلتتىق ناقىشتاعى بەدەرى بار كيىمدەردى ءار ادامنىڭ قالاۋىنا وراي تىگۋگە بولادى.
سونداي-اق، بۇل ماسەلەدە ديزاينەردىڭ، تىگىنشىنىڭ جۇمىسى باسىم ءرول وينايدى. ەلىمىزدە دەنى ءتۇزۋ ديزاينەر جوق ەمەس. وسى سالاداعى مامانداردىڭ يدەياسىنا، جوباسىنا قارجى سالاتىن ازامات جوق.
وسى جاعدايلاردى ەسكەرە وتىرىپ، ءبىز كۇنى كەشە ديزاينەرلەرگە كونكۋرس جاريالادىق. جۇلدە قورىن ميلليون تەڭگە دەپ قويدىق. ءبىزدىڭ تاراپتان جاقسى ءھام "جاڭا" يدەياسى بار مامانعا كومەك بولسا، مۇمكىندىك بولسا دەگەن ويمەن. ۇسىنىس جىبەرىپ جاتقاندار، جوباسىن جىبەرىپ جاتقاندار بارشىلىق. بۇل ماسەلە كەزەك كۇتتىرمەيتىن ماسەلە ەكەنىن جاقسى تۇسىنەمىن. الداعى ۋاقىتتا ءبىزدىڭ دۇكەندەردە ەتنوزاماناۋي ۇلگىدەگى كيىمدەر جارىق كورۋى ءتيىس. كوپ ۇزاماي تۇتىنۋشىلاردىڭ وزدەرى دە كۋا بولىپ قالار، بۇيىرسا...
- باعا قىمبات. بۇل – كوپشىلىكتىڭ سىزدەرگە قويعىسى كەلەتىن باستى سۇراعى. قىمبات باعا شيكىزاتقا كەتكەن شىعىننىڭ ەسەبىنەن بە، الدە ءونىمدى ابىرويلى، بەدەلدى ەتىپ كورسەتىپ، برەندكە اينالدىرۋدىڭ ايلاسى ما؟
- برەندكە اينالدىرۋ ءۇشىن باعا كوتەرۋ دەگەنمەن كەلىسە المايمىن. تاۋار ءبىرىنشى برەندكە اينالىپ، سوسىن باعا كوتەرىلەدى، نەگىزىندە.
ال باعانىڭ قىمباتتىعىنىڭ سەبەبىن ايتايىن. مىسالى، ءبىزدىڭ باعا كىممەن سالىستىرعاندا قىمبات؟ بازارداعى جۇڭگو مەن قىرعىزدىڭ تاۋارىمەن سالىستىرعاندا.
تەك باعانى سالىستىرىپ، قاتەلەسۋگە استە بولمايدى. اسىلىندە، الدىمەن ساپانى سالىستىرعان ءجون. باعالى ءارى ساپالى دۇنيە تۇتىنعىڭىز كەلسە، اقشاسىنان ايانۋعا بولمايدى.
- Abyroikz.kz قانشا ادامدى جۇمىسپەن قامتىپ وتىر؟ قانشا قالادا دۇكەن جۇمىس جاساپ تۇر؟
- قازىرگى ۋاقىتتا ءبىزدىڭ كومپانيانىڭ ءوندىرىس ورىنىندا 60-تان استام ادام جۇمىس جاساۋدا.
ەكى قالادا فيليالىمىز بار. قازىرگى ۋاقىتتا باتىس وڭىردەن دۇكەن اشساق پا دەگەن جوسپارىمىز بار. ويتكەنى، سول ايماقتان سۇرانىس كوپ.
- سوڭعى ساۋال بولسىن، اعا. سىزدەردىڭ ونىمدەرىڭىزگە قىزىعۋشىلىق تانىتاتىنداردىڭ قاتارىندا قاراپايىم ازاماتتاردىڭ سانى باسىم با، الدە اكىم-قارالاردىڭ، شەنەۋنىكتەردىڭ، انشى-كۇيشىلەردىڭ قاراسى كوپ پە؟
- ءيا، جوعارى جاقتان ءبىزدىڭ ءونىمدى تاڭدايتىندار بارشىلىق. ءارتىس تە بار، ءانشى دە بار، كاسىپكەرلەر مەن اكىمدەر دە بار. ارالاسىپ جاتىر. ءبولىپ قاراستىرعاندى ءبىز دە ءجون سانامايمىز.
تالعامى جوعارى، بويىنداعى رۋحى وياۋ جىگىتتەردىڭ كوپشىلىگىنىڭ تاڭداۋى بىزگە ءتۇسىپ جاتادى. بۇل ءۇردىس ءبىزدى قۋانتادى. قاراپايىم جۇمىسشىلاردان بەدەلدى تۇلعالارعا دەيىن بىردەي قىزمەت كورسەتە بەرەمىز.
- اڭگىمەڭىزگە راحمەت!
سۇحباتتاسقان: ادىلەت مادەنيەت
پىكىر قالدىرۋ