مەملەكەت باسشىسى ءوق-دارى بازاسىندا جارىلىستىڭ سالدارىن انىقتاۋ ءۇشىن جەدەل شتابتىڭ وتىرىسىن وتكىزدى دەپ حابارلايدى Qamshy.kz اقپارات اگەنتتىگى.
ول تۋرالى پرەزيدەنتتىڭ باسپا ءسوز حاتشىسى بەرىك ءۋالي ءوزىنىڭ فەيسبۋك الەۋمەتتىك جەلىسىندە جاريالادى.
قاسىم-جومارت توقايەۆ وبلىس اكىمى ءومىرزاق شوكەيەۆتىڭ وقيعا ورنىندا بولعان جاعداي مەن قولدانىلعان شارالارى تۋرالى بايانداماسىن تىڭدادى.
مەملەكەت باسشىسى ەڭ الدىمەن، قايتىس بولعان ازاماتتىڭ وتباسىنا، جاقىندارىنا قايعىرا كوڭىل ايتتى.
سونىمەن قاتار، ءقاۋىپسىز جەرگە كوشىرىلگەن تۇرعىندارعا ەڭ الدىمەن بارىنشا كومەك پەن مەديسينالىق قولداۋ كورسەتۋدى تاپسىردى. مەملەكەت باسشىسى مەملەكەتتىك رەزەرۆ ەسەبىنەن قالانىڭ جاعدايىن قالپىنا كەلتىرۋدى قامتاماسىز ەتۋ ءۇشىن قاجەتتى تاۋارلار مەن قاجەتتى زاتتاردى جەتكىزۋدى بۇيىردى.
ۇكىمەت پەن وبلىس اكىمدىگىنە قالپىنا كەلتىرۋ جۇمىستارىنىڭ قۇنىن ەسەپتەپ، تۇرعىن ءۇي قۇرىلىسىن، ينجەنەرلىك جەلىلەردى، الەۋمەتتىك جانە باسقا ينفراقۇرىلىمداردى قالپىنا كەلتىرۋ ءۇشىن ۇكىمەت رەزەرۆىنەن قاجەتتى قاراجات ءبولۋدى تاپسىردى.
قاسىم-جومارت توقايەۆ وقيعا ورنىندا قۇتقارۋ جانە قالپىنا كەلتىرۋ جۇمىستارى كەزىندە ناقتى ۆەدومستۆوارالىق جۇمىستاردى باقىلاۋدى، سونداي-اق جارىلىستىڭ سەبەپتەرىن جان-جاقتى زەرتتەۋدى تالاپ ەتتى.
پىكىر قالدىرۋ