ارىس قالاسىنىڭ تۇرعىندارىن ءقاۋىپسىز جەرگە ورنالاستىرۋ جۇمىستارى جالعاسۋدا. شىمكەنت قالاسىنداعى جەكە مەديسينالىق ورتالىقتاردا جۋىناتىن ورىن، تاماق جانە جاتاتىن ورىن تەگىن بەرىلىپ جاتىر. Qamshy.kz اقپارات اگەنتتىگى ءتىلشىسى اتالمىش ورتالىقتاعى زارداپ شەككەن تۇرعىنداردىڭ حال-جاعدايىن ءبىلدى. ارىس قالاسىنىڭ تۇرعىندارى بۇگىنگى بولعان جارىلىس تۋرالى پىكىر ءبىلدىردى.
— جارىلىستىڭ داۋىسىن ەستىگەن كەزدە قاشا جونەلدىم. مولاعا قاراي قاشا جونەلدىم. مەنى بالام ارقالاپ، كوتەرىپ الىپ شىقتى. ءبىراق قۇجاتتارىمىزدى الىپ ۇلگەرمەدىك. ەشنارسە العانىمىز جوق. جارىلىس بولعان كەزدە سپورتزالدا ەدىك. ءبىر كەزدە سپورت زالدىڭ اينەگى جارىلدى. ءتىپتى اياق كيىمدى دە كيمەدىم. قاشىپ جۇرگەن كەزدە ءبىر جىگىت اياق كيىمىن بەردى. مولادا قايدا قاشارىمىزدى بىلمەي جۇرگەن كەزدە ارنايى كولىك كەلدى. سوعان ءمىنىپ شىمكەنتكە جەتىپ الدىق. سوعىس كوردىك ءبىز... تۋعان-تۋىسىمىزدان حابار الا الماي وتىرمىز. بايلانىس جوق. ازاننان بەرى قاڭعىپ ءجۇرمىز، - دەپ پىكىر ءبىلدىردى وسپانوۆا ايتولقىن.
مەن بالا باقشادا تاربيەشى بولىپ جۇمىس ىستەيمىن. بالالاردى تاڭعى جاتتىعۋ جاساۋعا دالاعا شىعارعانبىز. كەيىن بالا باقشاعا قايتا كىرگەنىمىز سول ەدى، جارىلىستىڭ داۋسىن ەستىدىك. جيىرما شاقتى بالامەن بىرگە قاشتىق. بالا باقشاداعى بالالار قالمادى. ءسويتىپ ءجۇرىپ، ۇيدەگى ءوزىمنىڭ بالامدى ۇمىتىپ كەتىپپىن. ءبىراق امان-ەسەن شىمكەنتكە جەتتىك قوي، - دەيدى ءنۇريا ماقۇلبەكوۆا ەسىمدى ارىس قالاسىنىڭ تۇرعىنى.
