25 ماۋسىمدا ارىستان ەۆاكۋاسيالانعان تۇرعىندار جايلى شىمكەنتتەگى مەشىتتەن ۆيدەورەپورتاج ءتۇسىرىپ جۇرگەن Vlast تىلشىلەرى قانات بەيسەكەيەۆ پەن ادىلەت ابىشكە بەلگىسىز ادامدار شابۋىل جاساعان دەپ جازادى Qamshy.kz اقپارات اگەنتتىگى.

وقيعاعا پوليسيا ارالاسىپ، جۋرناليستەردى اباي اۋداندىق ىشكى ىستەر بولىمشەسىنە اپارعان. ولاردان وقيعا جايلى سۇراستىرعان سوڭ ءبىر ساعاتتان كەيىن بوساتقان. جۋرناليستەرگە كىمنىڭ شابۋىل جاساعانى ءالى بەلگىسىز.

وقيعانى ءوز كوزىمەن كورگەن بەلسەندى ايگۇل ورىنبەكتىڭ جازۋىنشا، بەلگىسىز ادامدار جۋرناليستەرگە "وقيعانى شىنايى ايتپايسىزدار" دەپ شاعىمدانىپ، شابۋىل جاساعان.

"اقپارات مايدانىندا ءجۇرۋ وڭاي جۇمىس ەمەس! زارداپ شەككەندەرگە كومەك بەرەمىز دەپ بارىپ، سوققىعا جىعىلدىق. ۇلتتىق قاۋىپسىزدىك كوميتەتىنىڭ ارالاساتىن ۋاقىتى كەلگەن سياقتى. توتەنشە قىزمەت، ۇلتتىق ۇلان، پوليسيا، قورعانىس مينيسترلىگى، اكىمدىك مىنا جاعدايدى يگەرە الماي جاتىر. سەبەبى مەشىتكە كومەك بەرەم دەپ كەلگەن ادامداردىڭ شىن نيەتىن انىقتاۋ كەرەك! پروۆاكاتورلار حالىقتى بيلىككە قارسى قويىپ، قازاق بالاسىن، كارىس بالاسى دەپ ءبىزدىڭ كوزىمىزشە تەپكىلىپ ۇرىپ تاستادى. ولاردى ءتۇسىرىپ تۇرعان ءبىزدىڭ قولىمىزدان قايىرىپ تەلەفونىمدى الماقشى بولدى. "وقيعانى شىنايى ايتپايسىزدار"- دەيدى. "باسى جۇلىنعان ادام بار"- دەپ ايقايلايدى، ءبىراق ناقتى ۆيدەوعا ەشتەڭە ايتپايدى. كوبىسى ساقالدى، قىسقا بالاقتىلار!
سوزدەرى اگرەسسياعا تولى، "قازاقتىڭ جەرى"-دە ايقايلاعاننان باسقا ەشتەڭە ايتا المايدى. "مەشىتتە وتىرىپ الىپ ەشقانداي كومەك جوق بيلىكتەن"- دەپ ايتىپ وتىرعان ۋاعىزدارى، جۇيكەسى توزىپ وتىرعان حالىقتى ودان سايىن ورشىتە تۇسۋدە! ارىستىڭ قايعىسىن اركىم ءوز پايداسىنا پايدالانۋدا!
ۇلتتىق قاۋىپسىزدىك كوميتەتى ءتوراعاسى ك.ءماسىموۆ مىرزا قوعام بەلسەندىسى رەتىندە بىزدەگى وقيعانى ءوز باقىلاۋىڭىزعا الۋىڭىزدى سۇرايمىن!
مەملەكەتتىڭ قاۋىپسىزدىگى ءۇشىن ءدال ءقازىر بۇكىل قۇرىلىمدىق كۇشتەر بىرىگۋ كەرەك!" - دەپ جازدى ايگۇل ورىنبەك.